ەلباسىنىڭ «رۋحاني جاڭعىرۋ» باعدارلاماسى اياسىندا قازاقتىڭ ايگىلى «قىز جىبەك» ءفيلمىن دۇنيەگە اكەلگەن كورنەكتى كينورەجيسسەر, قازاق كسر مادەنيەتىنە ەڭبەگى سىڭگەن قايراتكەر, مەملەكەتتىك سىيلىقتىڭ لاۋرەاتى سۇلتاناحمەت قوجىقوۆتىڭ 95 جىلدىق مەرەيتويىنا وراي, الماتى قالاسىنىڭ ورتا ءبىلىم بەرۋ مەكەمەلەرىندە رەجيسسەر شىعارمالارىن ناسيحاتتاۋعا باعىتتالعان مادەني ءىس-شارالار وتۋدە.
تالانتتى رەجيسسەر مەرەيتويىن ەل بولىپ اتاپ ءوتۋدىڭ باستاماسى رەتىندە شاھارداعى الپىستان استام مەكتەپتە وتكىزىلىپ جاتقان شارالارعا مۇرىندىق بولعان الماتى قالاسى ءبىلىم باسقارماسىمەن, ش.ايمانوۆ اتىنداعى «قازاقفيلم» كينوستۋدياسىمەن قاتار, س.قوجىقوۆ اتىنداعى №39 مامانداندىرىلعان ليتسەي ۇجىمىنىڭ ۇيىمداستىرۋىمەن وتكەن «تۇلعا. كينو. ۋاقىت» اتتى ەسكە الۋ كەشىنە ءاسانالى ءاشىموۆ, قادىر قۇساەۆ, سەرىك جارمۇحامەتوۆ, ۇلجان قولداۋوۆا, شاياحمەت يماش ۇلى سىندى كينو ونەرىنىڭ مايتالمان تۇلعالارى, ونەر قايراتكەرلەرى, رەجيسسەردىڭ تۋىستارى مەن ۇرپاقتارى قاتىسىپ, تالانتتى تۇلعا جايلى ءوز ەستەلىكتەرىمەن ءبولىستى, سونداي-اق ونەرىمەن سۇيسىنتكەن بالعىندارعا جىلى لەبىزدەرىن ءبىلدىردى, باتالارىن بەردى.
48 جىلدان بەرى ەكراننان تۇسپەي كەلە جاتقان, الەم ەلدەرىنىڭ جارتىسىنا جۋىعىن ارالاپ شىققان, قازاق كينو ونەرىنىڭ ساليقالى كوشىنە جاۋھار تۇمار بولىپ قادالعان «قىز جىبەك» ءفيلمى – حالىقتىق تۋىندىعا اينالعانىن ايتقان كينو ارداگەرلەرى سۇلتاناحمەت قوجىقوۆ ەسىمىن بۇگىنگى ۇرپاققا كەڭىنەن ناسيحاتتاۋدىڭ ماڭىزى زور ەكەنىن اتاپ ءوتتى. رەجيسسەردى ەسكە الۋ كەشىندە ءسوز سويلەگەن ءاسانالى ءاشىموۆ: «ماحابباتقا ادالدىق قانا ەمەس, قازاقتىڭ ۇلتتىق بولمىسى, تۇرمىس-تىرشىلىگى, سىپايىلىق پەن سىيلاستىق سىندى قاسيەتتەرى ءساتتى كورسەتىلگەن «قىز جىبەك» ءفيلمى البەتتە, كوپ ادامنىڭ ەڭبەگى سىڭگەن ۇلكەن تۋىندى, تاريحي فيلم. دەسەك تە, تاريحي فيلمدەر اراسىندا ءدال سۇلتەكەڭ بەينەلەي بىلگەن سول ءفيلمنىڭ دەڭگەيىندەي تۋىندى ءالى جوق دەسەم ارتىق ايتپاسپىن», دەگەن پىكىر ءبىلدىردى.
ايتا كەتسەك, الاش قوزعالىسىنىڭ كورنەكتى وكىلى, حح عاسىردىڭ العاشقى جىلدارىندا ۇلت مۇددەسى ءۇشىن ايرىقشا قىزمەت اتقارعان قوعام قايراتكەرى, اعارتۋشى, عالىم قوڭىرقوجا قوجىقوۆ پەن ونىڭ جارى, ءسان جانە قولدانبالى ونەر شەبەرى, قازاقستان, كسرو سۋرەتشىلەر وداعىنىڭ مۇشەسى ءلاتيپا قوجىقوۆادان تاراعان, قازاق بەينەلەۋ ونەرى مەن كينو الەمىندە وزىندىك قولتاڭبالارىن ايشىقتاپ كەتكەن قوجاحمەت, قۇلاحمەت, نۇراحمەت, سۇلتاناحمەت قوجىقوۆتاردىڭ قاي-قايسىسىنىڭ دا ەسىمدەرى قۇرمەت تۇتۋعا, ەرتەڭگى ۇرپاققا ۇلگى ەتۋگە لايىق. سول ايگىلى «قوجىقوۆتار اۋلەتىنىڭ» ءسۇت كەنجەسى سۇلتاناحمەت قوڭىرقوجا ۇلىنىڭ قازاق كينوسىنىڭ ۇلكەن بەلەسكە كوتەرىلۋىنە مول ۇلەس قوسقان شوقتىعى بيىك تۋىندىسى – «قىز جىبەك» فيلمىنەن وزگە, «ناشە لەتو», «دەۆۋشكا-دجيگيت», «انا مەن بالا», ء«بىز جەتىسۋدانبىز», «جارتاستاعى شىنار», ء«بىزدى تانىپ قويىڭدار» دەپ اتالاتىن كەسەك تۋىندىلارى دا التىن قورعا ەنگەن.
رەسپۋبليكا بويىنشا جالپى ءبىلىم بەرەتىن مەكەمەلەر ىشىندەگى ۇزدىك وندىققا ەنىپ وتىرعان اتالمىش ءبىلىم ۇياسىندا سونداي-اق ءبىرتۋار تۇلعاعا ارنالعان «قازاق كينوسىنىڭ قۇلاگەرى» اتتى ارنايى مۇراجاي دا اشىلىپ, وعان رەجيسسەردىڭ كوزى تىرىسىندە قولدانعان اسىل بۇيىمدارى, «قىز جىبەك» ءفيلمىن ءتۇسىرۋ بارىسىندا پايدالانىلعان كيىمدەر مەن قۇندى جادىگەرلەر قويىلدى. قازاق كينو ونەرىنىڭ الىپ تۇلعاسى سانالاتىن سۇلتاناحمەت قوجىقوۆتىڭ شىعارماشىلىق جولىن بولاشاق ۇرپاق ساناسىنا سىڭىرۋدە سۇبەلى ۇلەس قوسىپ كەلە جاتقان №39 ليتسەيدىڭ ديرەكتورى مەرەيحان جۇماعاليەۆ: «مەكتەبىمىز فيزيكا جانە ماتەماتيكا پاندەرىن تەرەڭدەتىپ وقىتاتىن ءبىلىم ۇياسى دەسەك تە, اتاقتى رەجيسسەر ەسىمىن يەلەنگەندىكتەن, قازاق كينو ونەرىن, سول ونەردىڭ دامۋىنا عۇمىرىن ارناعان تۇلعالاردىڭ ءومىرىن دارىپتەۋ جۇمىستارىن نازاردان تىس قالدىرعان ەمەس», دەيدى.
ايگۇل احانبايقىزى,
«ەگەمەن قازاقستان»
الماتى