مەملەكەت باسشىسى نۇرسۇلتان نازارباەۆتىڭ بەس الەۋمەتتىك باستاماسىن ەلىمىزدىڭ ءاربىر ازاماتتى جىلى قابىلدادى.
بۇل تۋرالى ءدىن ىستەرى جانە ازاماتتىق قوعام مينيسترلىگى ۇيىمداستىرعان ءدىني بىرلەستىكتەر وكىلدەرىنىڭ جيىنىندا ايتىلدى. جيىندى اشقان ءدىن ىستەرى كوميتەتىنىڭ توراعاسى ەركىن وڭعارباەۆ ەلباسىنىڭ بەس الەۋمەتتىك باستاماسى بۇگىندە ەل اراسىندا قىزۋ تالقىلانىپ, جاپپاي قولداۋ تاۋىپ وتىرعاندىعىنا توقتالدى. مەملەكەت تاراپىنان حالىقتىڭ ءال-اۋقاتىن كوتەرۋگە باعىتتالعان شارالاردى ءدىني بىرلەستىكتەردىڭ مۇشەلەرى دە سەزىنىپ, ونىڭ يگىلىگىنەن قالىس قالماۋ كەرەكتىگىن ەسكەرتتى.
جيىنعا ارنايى شاقىرىلعان ۇلتتىق ەكونوميكا مينيسترلىگى ماكروەكونوميكالىق تالداۋ جانە بولجامداۋ دەپارتامەنتى ديرەكتورىنىڭ ورىنباسارى ايگۇل احمەتوۆانىڭ ايتۋىنشا, پرەزيدەنتتىڭ باستامالارىن جۇزەگە اسىرۋ ماقساتىندا جول كارتاسى جاساقتالىپ, ۇكىمەتتە بەكىتىلگەن. الەۋمەتتىك پاكەت ەسەبىندەگى باستامالاردىڭ ورىندالۋ مەرزىمى مەن تەتىكتەرى دە ناقتىلانعان.
– باستامالاردى جۇزەگە اسىرىلۋ جۇمىستارى باستالىپ كەتتى. جول كارتاسى بويىنشا نەگىزگى 35 شارا بەلگىلەندى. ەندى بەس الەۋمەتتىك باعىت بويىنشا ازاماتتىق, بيۋدجەت جانە سالىق كودەكستەرى مەن 12 زاڭعا وزگەرىستەر ەنگىزىلمەك. ۇكىمەت ارنايى 6 قاۋلى قابىلدايدى. بارلىق جۇمىستار بويىنشا مۇددەلى ورگاندار اي سايىن ەسەپ بەرۋگە مىندەتتەلگەن, – دەدى مينيسترلىك وكىلى.
ۇندەۋدىڭ 5 باعىتى بويىنشا ءدىني كونفەسسيا وكىلدەرىنە ۇلتتىق ەكونوميكا, ءبىلىم جانە عىلىم مينيسترلىكتەرىنىڭ قىزمەتكەرلەرى ءتيىستى مالىمەتتەر بەردى.
سەرىك ابدىبەك,
«ەگەمەن قازاقستان»