ورتالىق كوممۋنيكاتسيالار قىزمەتىندە قازاقستان رەسپۋبليكاسى باس پروكۋراتۋراسىنىڭ وكىلدەرى مالىمدەمە جاسادى. شارعا قر باس پروكۋراتۋراسىنىڭ رەسمي وكىلى وكسانا لوسكۋتوۆا, قر باس پروكۋراتۋراسىنىڭ قىلمىستىق قۋدالاۋ قىزمەتىنىڭ باستىعى ەرلان اباەۆ جانە قر باس پروكۋراتۋراسىنىڭ قوعامدىق مۇددەنى قورعاۋ قىزمەتى باستىعىنىڭ ورىنباسارى اننا جدانوۆا قاتىستى.
جيىن بارىسىندا باس پروكۋراتۋرانىڭ رەسمي وكىلى وكسانا لوسكۋتوۆا پروكۋراتۋرانىڭ اتىنان مالىمدەمە جاساپ, باس پروكۋراتۋرامەن «قازاقستاننىڭ دەموكراتيالىق تاڭداۋى» اتتى تىركەلمەگەن قوزعالىستىڭ زاڭسىز قىزمەتى انىقتالعانىن اتاپ ءوتتى.
«ونى قازاقستاندا 20 جىلعا باس بوستاندىعىنان ايىرۋعا سوتتالعان مۇحتار ءابىليازوۆ قۇرعان. ءابىليازوۆ سوتپەن قىلمىستىق قوعامداستىقتى قۇرعانى, 7,5 ملرد. اقش دوللارىن ۇرلاپ, شەتەلگە شىعارعانى ءۇشىن كىنالى بولىپ تانىلعان. قىلمىستىق تابىستاردى زاڭداستىرۋ فاكتىلەرى بويىنشا ءبىر قاتار ەۋروپالىق ەلدەردە ابىليازوۆقا قاتىستى تەرگەۋ جۇرگىزىلۋدە. ۇلىبريتانيادا لوندون قالاسىنىڭ جوعارعى سوتىنىڭ شەشىمىمەن ءابىليازوۆ پەن ونىڭ سىبايلاستارىنان 4 ملرد. اقش دوللارى وندىرىلگەن. شەتەلدە سوت جازاسىنان جاسىرىنىپ, ءابىليازوۆ قازاقستان رەسپۋبليكاسى كونستيتۋتسياسىنىڭ تالاپتارىن بۇزىپ, كونستيتۋتسيالىق قۇرىلىستى كۇشتەپ وزگەرتۋدى ناسيحاتتاۋ مەن ۇگىتتەۋ بويىنشا زاڭسىز ارەكەتىن جالعاستىرۋدا. ينتەرەنەت جەلىلەر, مەسەندجەرلەر, سونداي-اق ءار ءتۇرلى الەۋمەتتىك توپتارعا پاراقشالار تاراتۋ ارقىلى, ءابىليازوۆ بەلسەندى تۇردە قازاقستاننىڭ ازاماتتارىن قوزعالىسقا قوسىلۋعا شاقىرادى, قازىرگى بيلىكتىڭ جاعىمسىز بەينەسىن قۇرىپ, قوعامدا نارازىلىق كوڭىل-كۇيلەر قالىپتاستىرۋدا. وسىلايشا, جوسپارلى تۇردە الەۋمەتتىك ارازدىق پەن الاۋىزدىقتى قوزدىرۋدا. نارازىلىق اكتسيالاردىڭ بەيبىتشىلىگى تۋرالى ايتسا دا قوزعالىس باسشىسى م.ءابىليازوۆ پەن ونىڭ بەلسەندىلەرىنىڭ قىلمىستىق ماقساتى - بيلىكتى قۇلاتىپ, باسىپ الۋ بولىپ تابىلادى. بۇل ارەكەتتەر «ەكسترەميزمگە قارسى ءىس-قيمىل تۋرالى» زاڭ بويىنشا ساياسي ەكسترەميزم بولىپ سانالادى جانە مەملەكەتتىڭ قاۋىپسىزدىگىنە قارسى قىلمىس رەتىندە قۋدالانادى. وسىعان بايلانىستى, باس پروكۋراتۋرا, «پروكۋراتۋرا تۋرالى» زاڭمەن كوزدەلگەن وكىلەتتىكتەرىن ىسكە اسىرىپ, سوتقا قوزعالىستى ەكسترەميستىك ۇيىم دەپ تانۋ تۋرالى ارىزبەن جۇگىندى. 2018 جىلعى 13 ناۋرىزدا استانا قالاسىنىڭ ەسىل اۋداندىق سوتىنىڭ شەشىمىمەن اتالعان ارىز تولىق كولەمدە قاناعاتتاندىرىلدى. سوتپەن قوزعالىستىڭ ارەكەتى ەكسترەميستىك دەپ تانىلىپ, وعان قازاقستان رەسپۋبليكاسىنىڭ بارلىق اۋماعىندا تىيىم سالىندى», دەپ اتاپ ءوتتى و.لوسكۋتوۆا.
سونىمەن قاتار ول بۇل ۇيىمنىڭ ارەكەتىن بەينە-حوستينگتەر ارقىلى تاراتۋعا تىيىم سالىنعانىن جەتكىزدى.
«بۇدان باسقا, الەۋمەتتىك الاۋىزدىقتى قوزدىرۋ, بيلىكتى باسىپ الۋدى ناسيحاتتاۋ جانە وعان جاريا تۇردە شاقىرۋ فاكتىلەرى بويىنشا ۇلتتىق قاۋىپسىزدىك جانە ىشكى ىستەر ورگاندارىمەن سوتقا دەيىنگى تەرگەپ-تەكسەرۋلەر جۇرگىزىلۋدە. قۇرمەتتى ازاماتتار, باس پروكۋراتۋرا سوت شەشىمىنەن كەيىن «قازاقستاننىڭ دەموكراتيالىق تاڭداۋى» ەكسترەميستىك ۇيىمىنىڭ ارەكەتىنە كەز كەلگەن قاتىسقانى جانە قارجىلاندىرعانى ءۇشىن قىللمىستىق كودەكستىڭ 182, 258 جانە 405 باپتارىنا سايكەس قىلمىستىق جاۋاپكەرشىلىك كوزدەلگەنىن تۇسىندىرەدى. «قاتىسۋ» ارەكەتىنە قوزعالىستىڭ يدەياسىن ۇگىتتەۋ جانە ناسيحاتتاۋ, ونىڭ جاريالانىمدارىن, پاراقشالارىن, پوستتارىن, پىكىرلەرىن جانە باسقا دا اقپاراتتىق ماتەريالدارىن دايىنداۋ, شىعارۋ, كوبەيتۋ جانە تاراتۋ جاتادى. سونىمەن قاتار, «قاتىسۋ» بولىپ قوزعالىستى جانە ونىڭ باسشىسى ءابىليازوۆتى قولداۋدا ميتينگىلەردى, شەرۋلەردى, جاريا اكتسيالارىن جانە باسقا جاپپاي ءىس-شارالاردى ۇيىمداستىرۋ جانە وتكىزۋ سانالادى. «قارجىلاندىرۋ» ۇعىمىنا ءابىليازوۆ پەن قوزعالىسقا اقشانى, وزگە دە م ۇلىكتى بەرۋ نەمەسە جيناۋ, سىيعا تارتۋ, ايىرباستاۋ, قايىرمالدىق جاساۋ, سپونسورلىق جانە قايىرىمدىلىق كومەك, اقپاراتتىق جانە وزگە دە قىزمەت تۇرلەرىن كورسەتۋ جاتادى. سونىمەن قاتار, ىستەگى زاڭناماعا سايكەس, ەكسترەميستىك توپتىڭ ارەكەتىنە قاتىسۋدى ءوز ەركىمەن توقتاتقان ادام, قىلمىستىق جاۋاپتىلىقتان بوساتىلادى», دەدى رەسمي وكىل.
راۋان قايدار, «ەگەمەن قازاقستان»