قازاقستاننىڭ تاجىكستانداعى ەلشىسى نۇرلان سەيتىموۆ ەلباسى نۇرسۇلتان نازارباەۆتىڭ تاجىكستان باسشىسى ەمومالي راحمونمەن كەزدەسۋىنىڭ كۇن تارتىبىندەگى ماڭىزدى ماسەلەلەردى اتادى, دەپ حابارلايدى قازاقپارات.
«مەملەكەت باسشىلارىنىڭ ەرتەڭگى كەزدەسۋى شاعىن جانە كەڭەيتىلگەن قۇرامدا ءوتىپ, ونىڭ بارىسىندا وڭىرلىك كۇن تارتىبىندەگى جانە حالىقارالىق فورماتتاعى وزەكتى ماسەلەلەر تالقىعا تۇسەدى. سونىمەن قاتار ساۋدا-ەكونوميكالىق قارىم-قاتىناسىمىزدى ساپالى جاڭا دەڭگەيگە كوتەرۋ ماسەلەلەرىنە دە ايرىقشا نازار اۋدارىلادى. ادەتتە, ءبىزدىڭ تاراپتىڭ تاۋار اينالىمىنىڭ تىزىلىمىندە استىق پەن ۇن عانا قالىپتاسقان. الايدا, ۋاقىت ءوز دەگەنىن جاساتىپ, لوكوموتيۆتەر, اۆتوموبيلدەر سىندى جاڭا دۇنيەلەردى ىلگەرىلەتۋدى تالاپ ەتەدى. سوندىقتان تاۋارلارىمىزدى تاجىكستان نارىعىنا ودان ارى ەكسپورتقا شىعارۋ جولدارى تالقىلانادى», - دەدى ول بۇگىن ەلىمىزدىڭ سىرتقى ىستەر مينيسترلىگىندە باق وكىلدەرىنە وتكىزگەن ءباسپاسوز ءماسليحاتىندا.
ن.سەيتىموۆتىڭ اتاپ وتۋىنشە, كەلىسسوزدەر قورىتىندىسىندا مەملەكەت باسشىلارىنىڭ بىرلەسكەن مالىمدەمەسىن قابىلداۋ جوسپارلانعان. مۇنان بولەك, ۇكىمەتارالىق ءۇش كەلىسىمدى راسىمدەۋ دە كوزدەلىپ وتىر. اتالعان قۇجاتتاردىڭ بارلىعى دا كوشى-قون ماسەلەلەرىنە, ءبىر ەلدىڭ ازاماتىنىڭ ەكىنشى ەلگە كەلۋ تارتىبىنە قاتىستى بولماق.
«سونداي-اق ەكى مەملەكەتتىڭ سىرتقى ىستەر مينيسترلىكتەرى اراسىندا ىنتىماقتاستىق باعدارلاماسىنا قول قويۋ كوزدەلگەن. ول ەلدەر اراسىندا ەكىجاقتى ماسەلەلەرمەن قاتار كوپجاقتى فورماتتاعى ىنتىماقتاستىق بويىنشا ساياسي كونسۋلتاتسيالار وتكىزۋ ءتارتىبى مەن كەستەسىن قاراستىرادى. مۇنداي كەلىسىم ءاربىر ەكى جىلدا ءبىر رەت جاڭارىپ وتىرادى», - دەدى ەلشى