قۇتقارۋشىلار دالادا ءتورت كۇن بويى اداسىپ جۇرگەن ادامداردى تاپتى.
گاز 63 اۆتو كولىگىمەن 4 ەر ادام امانكەلدى اۋدانىنداعى رودنيك اۋىلىنىڭ جۇرتىنا ارقالىق قالاسىنان تۇسكى 12.00-دە شىعىپ كەتكەن. قاڭىراپ بوس قالعان اۋىلدىڭ جۇرتىندا ەت دايىندايتىن فەرمەرلىك شارۋاشىلىق بار ەكەن. ول شامامەن ارقالىقتان 130 شاقىرىم قاشىقتىقتا بولاتىن. اداسقان ادامداردىڭ تۋىستارىنان كومەك سۇراعان دابىل تۇسىسىمەن سولتۇستىك وڭىرلىك اەروموبيلدى جەدەل-قۇتقارۋ جاساعىنىڭ ارقالىق قالالىق قۇتقارۋ ءبولىمى نيۆا مارش برونتو كولىگىمەن ىزدەۋگە اتتانادى.
رودنيك اۋىلىنىڭ جۇرتىنا كەلىسىمەن انىقتالعانداي, الگى جولاۋشىلار فەرمەرلىك شارۋاشىلىققا جەتە الماعان. قۇتقارۋشىلار سول جەردەگى اينالادان جوعالعان ادامداردى ىزدەستىرە باستادى. اۋداننان شالعاي جەردە بايلانىس جەلىسىنىڭ بولماۋى جانە 6 ناۋرىزدان 7 ناۋرىزعا دەيىن سوققان بوران ىزدەۋ جۇمىستارىنا ەداۋىر كەدەرگى كەلتىردى. جوعالعانداردى تابۋعا كومەكتەسەتىن ءىزدى قار باسىپ قالعان.
8 ناۋرىز كۇنى ساعات 11 شاماسىندا قۇتقارۋشىلار ىشىندە ەكى ادامى بار گاز 63 اۆتوكولىگىن ىزدەپ تاپتى, قالعان ەكەۋى رودنيك اۋىلىنا جاياۋ بەت العان. انىقتالعانداي كوز كورمەيتىن دۇلەي بوراننىڭ سالدارىنان ولار اداسىپ باعىتىنان شامامەن 30 شاقىرىم جاڭىلىسقان. «جىعىلعانعا – جۇدىرىق» دەگەندەي, كولىكتەرى دە بۇزىلىپ قالىپتى. ولار كولىكتە تۇنەپ شىعادى, جاياۋ تارتقان ەكى ادامدى قۇتقارۋشىلار اۋىلعا بەس شاقىرىم قالعاندا تاۋىپ الادى. كولىك اۋىلدان 30 شاقىرىم قاشىقتىقتا قالىپ قويعان.
بارلىق زارداپ شەككەندەر ارقالىق قالاسىنا جەتكىزىلدى. قازىر ولاردىڭ جاعدايلارى جاقسى.
ءنازيرا جارىمبەت, «ەگەمەن قازاقستان»
قوستاناي