جاتاقحانالاردى مەملەكەتتىك بيۋدجەت ەسەبىنەن سالۋ ءۇشىن 5 جىلعا 225 ملرد تەڭگە قاجەت. بۇل تۋرالى بۇگىن ۇكىمەت وتىرىسىندا پرەزيدەنتتىڭ 5 الەۋمەتتىك باستاماسىن جۇزەگە اسىرۋ جول كارتاسىنا وراي بايانداما جاساعان قر ءبىلىم جانە عىلىم ءمينيسترى ەرلان ساعاديەۆ ايتتى, دەپ حابارلايدى قازاقپارات.
ء«بىز بانكتەرمەن, جوعارى وقۋ ورىندارىمەن, قۇرىلىس كومپانيالارىمەن, ۇلتتىق بانكپەن, قارجى جانە ۇلتتىق ەكونوميكا مينيسترلىگىمەن بىرنەشە جينالىس وتكىزدىك. بارىنە ىڭعايلى, تۇسىنىكتى جانە اشىق مەحانيزمگە كەلىپ وتىرمىز. جوو نەمەسە قۇرىلىس كومپانياسى, الەۋمەتتىك كاسىپتىك كومپانيا جەر بولسا سول جەرگە, جەر بولماسا اكىمىشىلىكتەن جەر الىپ نە بولماسا جەر ساتىپ الىپ, ەڭ الدىمەن جاتاقحانانىڭ جوبالىق-سمەتالىق قۇجاتتاما جوباسىن دايىنداۋى قاجەت. سول جوبادا قانشا جاتىن ورىن سالىناتىندىعى كورسەتىلەدى. ودان كەيىن مينيسترلىكتىڭ قارجى ورتالىعىمەن سول سالىناتىن ورىندارعا كەلىسىم جاسالادى», - دەدى مينيستر.
ونىڭ ايتۋىنشا, ۋنيۆەرسيتەت نە بولماسا قۇرىلىس كومپانياسى جاتاقحانا سالاتىن بولسا, وندا ول پايدالانۋعا بەرىلگەن كۇننەن باستاپ, بەلگىلى كەزەڭ ىشىندە ءبىر ورىن ءۇشىن مەملەكەتتىك اي سايىن سۋبسيديا تولەنىپ وتىرادى.
«قازىرگى ۋاقىتتا الدىن الا جوبا رەتىندە ءبىر جاتىن ورىنعا جىل سايىن ورتاشا 200 مىڭ تەڭگە كولەمىندە 8 جىل بويى مەملەكەتتىك سۋبسيديا تولەۋدى ۇسىنىسىپ وتىرمىز. ەگەر وسى قۇرىلىستى مەملەكەتتىك بيۋدجەتتەن سالساق, 5 جىلدىڭ ىشىندە 225 ملرد تەڭگە جاراتاتىن بولامىز. ال ۇسىنىلىپ وتىرعان مەحانيزمگە سايكەس مەملەكەتتەن تەك قانا 29 ملرد تەڭگە عانا جۇمسالادى», - دەدى ەرلان ساعاديەۆ.
ءمينيستردىڭ ايتۋىنشا, ەندىگى ۋاقىتتا ۋنيۆەرسيتەت نەمەسە قۇرىلىس كومپانياسى جوعارىدا اتالعان كەلىسىم نەگىزىندە بانكتەن كرەديت الىپ, قۇرىلىس كومپانياسىن جالداپ جاتاقحانا سالۋعا كىرىسۋى قاجەت.
«بىرىنشىدەن, جاتاقحانالار قۇرىلىسىن «دامۋ» اق-نىڭ «نۇرلى جەر» باعدارلاماسىنا ەنگىزۋ قاجەت. سوندا قارجىلاندىرۋ نەسيەلەرى مەملەكەتتىك پروتسەنتتىك سۋبسيديالار الىپ وتىرادى. ەكىنشىدەن, ۋنيۆەرسيتەتتەردىڭ, اسىرەسە مەملەكەتتىك ۋنيۆەرسيتەتتەردىڭ قاجەتتى جەر ۋچاسكەسى بار. جەر ۋچاسكەسى جوق ۋنيۆەرسيتەتتەردى اكىمدىكتەر ءوز دەڭگەيىندە قامتاماسىز ەتۋ جانە بارىنە ءتيىستى كوممۋنيكاتسيالار جۇرگىزۋ بويىنشا تاپسىرما بەرۋدى سۇرايمىز», - دەدى مينيستر ۇكىمەت باسشىسى باقىتجان ساعىنتاەۆقا قاراتا.