اۋلەتىمىزدەگى قۇندى جادىگەردىڭ ءبىرى – اتاقتى ەستاي بەركىمباي ۇلىنىڭ چەمودانى. بۇل ايگىلى بابامىزدان قالعان كوز.
اتامىزدىڭ نەمەرە ءىنىسى, اقىننىڭ قولىندا ءوسىپ, تۋعان بالاسىنداي بولىپ كەتكەن قىزداربەك اتامنىڭ جاتىن بولمەسىندە, كونە كوك شكافتىڭ ۇستىندە تۇراتىن چەموداندى كۇندە كورىپ جۇرسەك تە, ءىشىن اشۋعا ءداتىمىز بارمايتىن. ۇلكەندەردىڭ «چەمودانعا ءتيۋشى بولماڭدار!» دەگەن قاتاڭ ەسكەرتۋىنەن سوڭ, بۇل زاتتى تەك سول كىسىلەردىڭ رۇقساتىمەن عانا جەرگە تۇسىرەتىنبىز. چەموداننىڭ ەسكى ەكەندىگى بايقالىپ تۇرسا دا, وتە ۇقىپتى ۇستالعان. قىزداربەك اتام ونىڭ ىشىنە ەسكى ءدىني كىتاپتار مەن گازەتتەردى ساقتايدى. نامازىن قازا قىلمايتىن اۋىل مولداسىنىڭ اللانىڭ, پايعامبارىمىزدىڭ ەسىمدەرى جازىلعان دۇنيەلەردى اياقاستى ەتپەي, قول جەتپەس بيىكتە تۇرسىن دەگەنى عوي.
2000-جىلداردىڭ باسىندا ءبىزدىڭ ۇيگە اق «گازەل» مىنگەن قالالىق قوناقتار كەلدى. ەل ارالاپ, كونە جادىگەرلەردى جيناستىرىپ جۇرگەن پاۆلودار قالاسىنداعى ءانشى مايرا ۋاليقىزىنىڭ مۋزەيىنىڭ وكىلدەرى ەكەن. وبلىس ورتالىعىنان شالعايدا ورنالاسقان شۇعا اۋىلىنا اتامدى ادەيى ىزدەپ كەلىپتى. ماقساتتارى – ەستاي بابامىز تۇتىنعان دۇنيەلەردى, باسقا دا كونە زاتتاردى مۋزەيگە الىپ كەتۋ. اتامنىڭ بۇيرىعىمەن ءۇيدىڭ شاتىرىنا شىعىپ, شيدەن توقىلعان ەت ساقتاعىشتى, ءبىر جاق مۇرتى مۇجىلگەن اعاش تاباقتى جانە وزگە دە ەسكى زاتتاردى تومەنگە ءتۇسىرىپ, كولىككە تيەدىك.
قوناقتار كەتكەن سوڭ كەشكى شاي ۇستىندە داۋىسى جارىقشاقتانا شىققان اتامنىڭ: «كەزىندە تۇرمىستا قولدانىلعان دۇنيەلەر قازىر قاجەتكە جارامايدى عوي. سوندىقتان بولاشاق ۇرپاق كورىپ, ءبىلسىن دەگەن نيەتپەن شاتىرداعى ەسكى زاتتاردى مۋزەيگە وتكىزدىم جانە دۇرىس قادام جاسادىم دەپ ويلايمىن. ال ەستاي بابامنان قالعان قارا چەموداندى ءتىرى تۇرعاندا ەشكىمگە بەرمەسپىن. بابامنىڭ كوزى عوي», – دەگەن ءسوزى ەسىمدە.
وكىنىشكە قاراي, اتامنان قارا چەموداننىڭ ءبىزدىڭ ۇيگە قالاي كەلگەنىن سۇراماپپىن. ال ونىڭ تاريحىن قازىرگى ەكىباستۇز قالاسىنا قاراستى جايىلما اۋىلىندا تۇراتىن ەستاي اقىننىڭ ۇلكەن نەمەرەسى زەكەن اپا ايتىپ بەردى.
ء«سىزدىڭ ۇيدەگى قارا چەمودان ەستاي اتامنىڭ قىزداربەك اعاما جاساعان سىيلىعى ەدى. ءدال وسىنداي چەمودان مەندە دە بولعان. وكىنىشكە قاراي, ءۇيىمىز ورتەنگەندە, جانىپ كەتتى. ەستاي اتام 1939 جىلى الماتىعا باردى. سول ساپاردان ەكى قارا چەمودان اكەلدى. ونىڭ ءبىرىن سەنىڭ اتاڭ قىزداربەككە, ال ەكىنشىسىن ماعان تارتۋ ەتتى», – دەگەن ەدى زەكەن اپا.
ءبىزدىڭ ۇيدە قارا چەموداننان بولەك, ەستاي بابامىزدان قالعان تاعى ءبىر مۇرا بار. ول – اقىننىڭ تۇرمىستا پايدالانعان بيىك ۇستەلى. اۋىلدان قالاعا كوشەردە كورشىمىز نۇربولات مالاتاي ۇلىنا اماناتتاپ تاپسىرىپ كەتكەنبىز. قازىر سول ۇيدە تۇر.
فارحات امىرەنوۆ, ەستاي اقىننىڭ ۇرپاعى