وبلىستا بيزنەس قۇرىلىمدارمەن بىرلەسە جۇمىس ىستەۋگە ەرەكشە كوڭىل ءبولىنىپ كەلەدى. سونىڭ ءبىر دالەلى رەتىندە جارما اۋدانىنىڭ ورتالىعى – قالباتاۋ اۋىلىندا وتكەن كاسىپكەرلىك جانە ونەركاسىپ فورۋمىن اتاپ وتۋگە بولادى.
فورۋم بارىسىندا اۋدان كاسىپكەرلەرى بيزنەستىڭ الەۋمەتتىك جاۋاپكەرشىلىگى اياسىندا جالپى قۇنى 124 ميلليون تەڭگەنى قۇرايتىن ىنتىماقتاستىق مەموراندۋمىنا قول قويدى. ءبىر عانا «باقىرشىق» كەن ورنى بۇل كۇنى مەموراندۋم اياسىندا اۋداننىڭ الەۋمەتتىك سالاسىنا 89 ميلليون تەڭگە قارجى بولۋگە دايىن ەكەندىكتەرىن جەتكىزدى. جارما اۋدانىنىڭ اكىمى نۇرلان سىدىقوۆتىڭ ايتۋىنشا, وڭىردەگى كاسىپورىندار مەن كاسىپكەرلەر تاراپىنان بولىنەتىن قارجى ءبىلىم جانە دەنساۋلىق ساقتاۋ سالاسىنا, ەلدى مەكەندەردىڭ ينفراقۇرىلىمىن جاقسارتۋعا جۇمسالماق. «ەكونوميكانىڭ قوزعاۋشى كۇشى – ينۆەستيتسيا. بىلتىر اۋدانىمىزعا 65 ميلليارد تەڭگە ينۆەستيتسيا قۇيىلدى. بۇل – وبلىس كولەمىندە وسكەمەن قالاسىنان كەيىنگى كورسەتكىش. ينۆەستيتسيا قۇيۋشىلاردىڭ دەنى – كەن ورىندارى. يگەرىلمەي جاتقان «باقىرشىق» كەن ورنىنا رەسەيدىڭ «پوليمەتالل» كومبيناتى اۋقىمدى ينۆەستيتسيا سالىپ, قۇرىلىس جۇمىستارىن جۇرگىزدى. «بوكە», «اقجال» كەنىشتەرىنە دە ينۆەستيتسيا سالىنىپ, كەن بايىتۋ كومبيناتى بوي كوتەردى. قازىر جارما اۋدانىنىڭ ءتورت جاعىنان جول قۇرىلىسى باستالىپ جاتىر. وبلىستا بالاما قۋات كوزدەرىنە ارنالعان 6 جوبا بولسا, سونىڭ ۇشەۋى – جارما اۋدانىندا. يسپانيا كومپانياسى اۋدانىمىزدا 17 ميلليارد تەڭگە قارجىعا كۇن ەلەكتر ستانساسىن سالۋدى جوسپارلاپ وتىر. بۇگىنگى فورۋمعا كەلسەك, مۇنداي فورۋم جىل سايىن وتكىزىلەدى. بيىل مەموراندۋم اياسىندا اۋدانعا بولىنەتىن قارجى بىلتىرعىمەن سالىستىرعاندا ەكى ەسەگە ۇلعايدى. تاعى ءبىر جاعىمدى جاڭالىق, بيىل «باقىرشىق» كەن ورنى ىسكە قوسىلۋعا ءتيىس. بۇل اۋدان, وبلىس ەمەس, رەسپۋبليكا كولەمىندە ماڭىزدى وقيعا رەتىندە قالارى ءسوزسىز», دەيدى اۋدان اكىمى. مەموراندۋمعا قول قويىلعان سالتاناتتى شارا بارىسىندا ن.سىدىقوۆ اۋداننىڭ ۇزدىك كاسىپكەرلەرىن 9 اتالىم بويىنشا ماراپاتتاپ, 100 مىڭ تەڭگەنىڭ سەرتيفيكاتتارىن تابىس ەتتى.
ازامات قاسىم, «ەگەمەن قازاقستان»
شىعىس قازاقستان وبلىسى,
جارما اۋدانى