ەۋرازيالىق توپتان 2018-2019 جىلدارى پاۆلوداردىڭ دامۋىنا 3,7 ملرد تەڭگە بولىنەدى

بۇل قارجى وبلىس ورتالىعىندا, ەكىباستۇز جانە اقسۋ قالالارىندا ينجەنەرلىك-كوممۋنيكاتسيالىق جۇيەلەر تارتۋعا, وبلىس ورتالىعىنداعى «ترامۆاي باسقارماسى» اق جۇمىسىن جاقسارتۋعا, حوككەي كورتىن سالۋعا, اقسۋدا سپورت كە­شەنى قۇرىلىسىنا, ورتالىق جاعالاۋىن كورىكتەندىرۋگە جۇمسالماق. ءتىپتى وبلىس ورتالىعىندا جاڭادان تاعى دا ءبىر مۇز سارايى سالىنباقشى.

– كومپانيا قارجىسىنىڭ باسىم بولىگى سپورتتى دامىتۋعا باعىتتالادى. وبلىس ورتالىعىنداعى «استانا» مۇز سارايىندا كاسىبي سپورتشىلاردىڭ جاتتىعۋلارى ءجيى وتەدى. وتباسىلىق دەنە- شىنىقتىرۋ شارالارىنا مۇمكىندىك ازداۋ. اتا-انالار جاڭا مۇز سارايىن سالۋ قاجەتتىگىن سۇراۋدا. سوندىقتان ءوڭىر جۇرتشىلىعىنىڭ الەۋمەتتىك الەۋەتىن جاقسارتۋعا ۇلەس قوسىپ كەلە جاتقان كومپانيا باسشىلىعىنا العىس بىلدىرەمىن, – دەدى وبلىس اكىمى ب.باقاۋوۆ.

جۋىردا عانا «پرەزيدەنتتىڭ بەس الەۋمەتتىك باستاماسى» اتتى ەلباسىنىڭ حالىققا ۇندەۋى جاريالاندى. الەۋمەتتىك باعىتتاعى بۇل ۇسىنىستار ەلىمىزدە تۇراتىن ءاربىر ادام ءۇشىن ماڭىزدى. بيىل وبلىستا 300 مىڭ شارشى مەتر تۇرعىن ءۇي پايدالانۋعا بەرىلمەك. وبلىس بيۋدجەتىنەن ينجەنەرلەر, دارىگەرلەر مەن پەداگوگتار دايارلاۋعا 200 گرانت قاراستىرىلۋدا. بىلتىر وبلىستا ەكى جاتاقحانا سالىندى. بۇل جاقسى ءۇردىس بيىل دا جالعاسادى. وقۋ ورىندارى باسشىلارىنىڭ ايتۋلارىنشا, جىل سايىن ستۋدەنتتەر قاتارى كوبەيۋدە, ولاي بولسا, وبلىس ورتالىعىنداعى جوعارى وقۋ ورىندارىنا 3 مىڭ ورىندىق جاتاقحانا دا قاجەت. بۇعان وبلىس اكىمدىگى الداعى ۋاقىتتا جوبالاۋ-سمەتالىق قۇجاتى ازىرلەنسە, مەملەكەت-جەكەمەنشىك ارىپتەستىگى اياسىندا ماسەلەنى شەشۋ جولى قاراستىرىلادى دەپ وتىر.

جالپى, بيزنەستىڭ الەۋمەتتىك جاۋاپكەرشىلىگى بۇكىل الەمدە بار. الىپ كومپانيالار ءوز قارجىسى ارقىلى ءبىلىم بەرۋ, مەديتسينا, عىلىم, ءوندىرىس دامۋىنا ينۆەستيتسيا بولەدى. بۇل جاۋاپكەرشىلىك-تۇراقتى الەۋمەتتىك ينستيتۋت رەتىندە ءبىزدىڭ ەلىمىزدە دە قىزمەت ەتەدى. بيزنەستىڭ الەۋمەتتىك جاۋاپكەرشىلىگى تۇجىرىمداماسى ازىرلەندى. بۇل 2008 جىلدان بەرى جۇزەگە اسىرىلىپ كەلە جاتقان ەلباسى تاپسىرماسى. سوڭعى جىلدارى «ERG» كومپانيالار توبى وڭىردەگى بيزنەستىڭ الەۋمەتتىك جاۋاپكەرشىلىگى ماقساتىنا 11 ملرد تەڭگە ءبولىپتى. بۇل قاراجاتقا وبلىس ورتالىعىندا ءتۇستى مەتاللۋرگيا كوللەدجى جاتاقحاناسى, سپورت زالدارى سالىندى. بۇل كۇندەرى باياناۋىلدا مىرزاشوقى شاڭعى كەشەنى, ارقاندى جول مەن وبلىس ورتالىعىندا باسسەيننىڭ قۇرىلىسى جۇرگىزىلۋدە. جانە استانانىڭ 20 جىلدىعىنا وبلىستىڭ تارتۋى رەتىندە قالادا سالىنىپ جاتقان ۆەلوسيپەد جولىنىڭ قۇرىلىسىن دا كومپانيا قارجىلاندىرعان. وڭىردە 22 مىڭنان استام ادام «ERG»-گە قاراستى جەرگىلىكتى ءوندىرىس ورىندارىندا ەڭبەك ەتۋدە.

فاريدا بىقاي, «ەگەمەن قازاقستان»

پاۆلودار وبلىسى