كوكتەمنىڭ قاراوزەك شاعى كەلدى. جامبىل وڭىرىندە قىس كەيبىر وبلىستاعىداي التى ايعا سوزىلماسا دا, سول التى ايعا بەرگىسىز قىس بيىل بولدى. قار قالىڭ جاۋىپ, ءتىپتى تاۋلى ايماقتاردا جىلداعىدان ەداۋىر مول ءتۇستى.
بۇل ورايدا كوپتى كورگەن قاريالار بيىل ەگىننىڭ بىتىك شىعاتىنىن, ەلدىڭ ىرزىعى مول بولاتىنىن ايتىپ جاتتى. ال اقپان اياقتالىپ, ناۋرىز كەلىسىمەن جاڭبىر ارمانسىز جاۋدى كەلىپ. كەيبىر ەلدى مەكەندەرگە تاۋداعى قار سۋى ەرىپ, سەل ءجۇرۋ قاۋپى تۋىنداعانىمەن, جاۋىننىڭ دا وزىندىك پايداسى بار. كوكتەم ەرتە شىعاتىن اۋليەاتا وڭىرىندە كوكتەمگى دالا جۇمىستارى كۇن تارتىبىندەگى ماسەلە. شارۋالار دا شيراپ, جىلداعى جوسپارلى جۇمىسىنا كىرىسەدى. بۇل ناۋقاننىڭ جىل سايىن ءوڭىر وركەندەۋىنە قوسىپ وتىرعان ۇلەسى دە از ەمەس.
قالىڭ قاردىڭ كوبەسى سوگىلىپ, جەردىڭ توڭى ءجىبي باستاعاننان-اق كوكتەمگى دالا جۇمىستارىنىڭ دايىندىعى پىسىقتالادى. وبلىستىق اۋىل شارۋاشىلىعى باسقارماسىنىڭ مالىمەتىنشە, اۋىل شارۋاشىلىعى مينيسترلىگى مەن جامبىل وبلىسى اكىمدىگى اراسىنداعى 2017-2021 جىلدارعا ارنالعان مەموراندۋمعا سايكەس, بيىلعى جىلى وبلىس بويىنشا اۋىلشارۋاشىلىق داقىلدارى 602,7 مىڭ گەكتارعا مەجەلەنگەن ەكەن. ونىڭ ىشىندە 255,5 مىڭ گەكتار جەرگە ءداندى جانە بۇرشاقتى داقىلداردى, 6,5 مىڭ گەكتارعا قانت قىزىلشاسىن, 85,7 مىڭ گەكتارعا مايلى داقىلدار, 37 مىڭ گەكتارعا كوكونىس-باقشا داقىلدارىن, 8,8 مىڭ گەكتارعا كارتوپ, 216,8 مىڭ گەكتار جەرگە مال ازىعى داقىلدارىن ەگۋ جوسپارلانىپ وتىر. وبلىستىق اۋىل شارۋاشىلىعى باسقارماسى باسشىسىنىڭ ورىنباسارى ەرلان قۇلكەەۆتىڭ ايتۋىنشا, 2018 جىلدىڭ ءونىمى ءۇشىن جازدىق داقىلدارعا قاجەتتى تۇقىم كولەمى 52534,3 توننانى قۇراسا, بۇگىندە ونىڭ 42009,4 تونناسى دايىندالعان. سونىمەن قاتار جازدىق ارپا داقىلىنا 23959,4 توننا تۇقىم قاجەت بولسا, بۇگىنگى كۇنگە ونىڭ 22599,5 تونناسى دايىندالىپتى. وزگە دە قاجەتتى داقىلداردىڭ تۇقىمدارىن دايىنداۋ جۇمىستارى جۇرگىزىلۋ ۇستىندە.
اعىمداعى جىلى ەگىس القاپتارىن ارزانداتىلعان مينەرالدى تىڭايتقىشتارمەن قامتاماسىز ەتۋ ماقساتىندا 800 ميلليون تەڭگە قاراستىرىلعان. سونداي-اق وبلىس بويىنشا كوكتەمگى دالا جۇمىستارىن جۇرگىزۋگە 8,7 مىڭنان استام اۋىلشارۋاشىلىق تەحنيكاسى جۇمىلدىرىلاتىن بولادى.
بيىلعى جىلى ۇكىمەت تاراپىنان جامبىل وبلىسىنا كوكتەمگى دالا جۇمىستارى ءۇشىن 15500 توننا ارزانداتىلعان ديزەل وتىنى بولىنگەن. ونىڭ 10000 تونناسى ناۋرىز ايىنا ارنالسا, مامىر ايىنا – 2500 توننا, ماۋسىم ايىنا – 3000 توننا وتىن قاراستىرىلعان. جالپى, وبلىستىڭ كوكتەمگى دالا جۇمىستارىنا ۇكىمەت تاراپىنان قولداۋ كوپ. ەندىگى جەردە اۋدان اكىمدەرى باردى ۇقساتا السا, قارا جەردىڭ قويناۋىنان قۇت ءورىپ, نەسىبە مولايعالى تۇر.
سونىمەن قاتار وبلىس اۋماعىنداعى سۋارمالى ەگىستىك القاپتاردى ءتيىمدى پايدالانۋ جانە وڭىردەگى گيدروقۇرىلىمداردى جاڭعىرتۋ ارقىلى سۋارمالى ەگىستىك القاپتارىن ۇلعايتۋ ماسەلەسى وزەكتى. وسى ورايدا جۋىردا عانا وبلىس اكىمى اسقار مىرزاحمەتوۆ اۋىل شارۋاشىلىعى ۆيتسە-ءمينيسترى ەرلان نىسانباەۆپەن جانە اتالعان مينيسترلىككە قاراستى سۋ رەسۋرستارى كوميتەتىنىڭ توراعاسى يسلام ابىشەۆپەن كەزدەسكەن بولاتىن. كەزدەسۋ بارىسىندا وبلىس اۋماعىندا سۋارمالى ەگىستىك القاپتارىن سۋلاندىرۋ جۇمىسى 5 سۋ قويماسى, 13 سۋ تورابى جانە ۇزىندىعى 3077 شاقىرىم بولاتىن كانالدار جۇيەسى ارقىلى جۇزەگە اسىرىلاتىنى, الايدا قازىر وڭىردەگى سۋارمالى جەرلەردىڭ 114 مىڭ گەكتارى عانا قولدانىستا ەكەندىگى ايتىلدى. ەگەر كەزدەسۋ بارىسىنداعى جوسپارلار جۇزەگە اساتىن بولسا, ءوڭىردىڭ ەگىستىك القاپتارى بۇدان دا ۇلعايادى دەگەن سەنىم بار.
دالا ءتوسى دۇبىرگە بولەنەتىن كۇن جاقىن. كوكتەمنىڭ كوكوسكىن شاعىندا ەگىلگەن داقىلداردىڭ قىس بويى ازىق بولاتىنى ءسوزسىز. ەندىگى جەردە ۇكىمەتتەن قولداۋ تاپقان باعدارلامالار وبلىستا لايىقتى جۇزەگە اسسا, سول ولجا.
حاميت ەسامان, «ەگەمەن قازاقستان»
جامبىل وبلىسى