جاپونيانىڭ قازاقستانداعى توتەنشە جانە وكىلەتتى ەلشىسى يتيرو كاۆاباتا ء«شوپ تامىرى» ادام قاۋىپسىزدىگىن قامتاماسىز ەتۋ بويىنشا الەۋمەتتىك جوبالارىنا ارنالعان قايتارىمسىز كومەك كورسەتۋ گرانتتارىن تاپسىرۋ جونىندەگى كەلىسىمشارتتارعا قول قويدى. وسى ورايدا ەلشىلىك ەلىمىزدەگى 2017 جىلى قابىلدانعان جەتى الەۋمەتتىك جوبانى جۇزەگە اسىرۋعا 395 مىڭ اقش دوللارىن ءبولدى.
ي. كاۆاباتانىڭ ايتۋىنشا, گرانتتار جاپونيا ۇكىمەتىنىڭ «KUSANONE» جوباسى شەڭبەرىندە ءبولىنىپ وتىر جانە ول ادامداردىڭ ءومىر ساپاسىن ارتتىرۋعا باعىتتالعان.
«KUSANONE» جوباسى جاپونيا ۇكىمەتىنىڭ رەسمي كومەك كورسەتۋ باعدارلاماسى بولىپ تابىلادى. ول مەديتسينالىق ۇيىمدار, ءبىلىم بەرۋ مەكەمەلەرى سياقتى كوممەرتسيالىق ەمەس ۇيىمدارعا قولداۋ كورسەتۋ ارقىلى ادامداردىڭ ءومىرىن جاقسارتۋ ماقساتىندا جۇزەگە اسىرىلادى. باعدارلاما قاراپايىم حالىقتىڭ الەۋمەتتىك-ەكونوميكالىق دامۋىنا تىكەلەي ىقپال ەتەتىن جانە تابىسى تومەن ۇيىمداردىڭ جوبالارىن قولداۋعا باعىتتالعان.
«بيىل ءبىز جەتى جوبانى قارجىلاندىرۋعا گرانت ءبولىپ وتىرمىز. ول جوبالار نەگىزىنەن ءبىلىم الۋ مەكەمەلەرىنىڭ تەرەزەلەرى مەن جىلىتۋ قۇرىلعىلارىن جاڭارتۋعا باعىتتالعان. سونىڭ ناتيجەسىندە ءبىز جاس جەتكىنشەكتەردىڭ ىڭعايلى جانە جارىق جەردە ساپالى ءبىلىم الۋىنا مۇمكىندىك جاسايمىز. باعدارلامانىڭ باستى ماقساتى – ادامزات قاۋىپسىزدىگىن قامتاماسىز ەتۋ. 1997 جىلدان بەرى اتالعان باعدارلاما اياسىندا قازاقستاندا جالپى سوماسى 6 034 632 اقش دوللارى بولاتىن بارلىعى 85 جوبا قارجىلاندىرىلدى», دەدى ەلشى ي. كاۆاباتا.
بيىل جاپونيا ەلشىلىگىنىڭ گرانتتارى – تەرەزەلەردى جوندەۋ جۇمىستارى بويىنشا سەمەي قالاسىنىڭ ءۇش بىردەي ورتا مەكتەبىنە بەرىلدى. سونىمەن قاتار جىلىتۋ جۇيەسىن جوندەۋ ءۇشىن ماڭعىستاۋ وبلىسىنىڭ شاحتينسك ورتا مەكتەبىنە, جاڭاوزەن قالاسىنىڭ «قىزمەت كورسەتۋ جانە جاڭا تەحنولوگيالار» كوللەدجى جانە ماڭعىستاۋ اۋىلىنىڭ №1 جالپى ورتا ءبىلىم بەرۋ مەكتەبىنە قاراجات ءبولىندى. سونداي-اق جەتىقارا اۋدانىنىڭ پسيحونەۆرولوگيالىق اۋرۋلارى بار جانە تىرەك-قيمىل اپپاراتتارى زاقىمدالعان مۇمكىندىگى شەكتەۋلى بالالارعا ارنالعان كۇندىزگى كۇتىمدى كەڭەيتۋ جوباسىنا 32 326 اقش دوللارى كولەمىندە قارجى قاراستىرىلعان.
اتالعان ءىس-شاراعا جەتى مەكەمەنىڭ باسشىلىعى قاتىستى. قازاقستاننىڭ شالعاي ايماقتارىنان كەلگەن ولار جاپونيا ەلشىلىگىنە ءوز العىستارىن ءبىلدىردى. سونداي-اق ولار بۇل جوبا ەكى ەل اراسىنداعى بىرلىكتى نىعايتۋعا, وقۋشىلاردىڭ قولايلى جەردە ساپالى ءبىلىم الۋىنا ۇلكەن قولداۋ بولعانىن اتاپ ءوتتى.
جاپونيا ەلشىلىگى ءوز كەزەگىندە ء«شوپ تامىرى» باعدارلاماسى الەۋمەتتىك ماسەلەردى شەشۋدە, حالىقتىڭ الەۋمەتتىك جاعدايىن جاقسارتۋعا ءوز ۇلەسىن قوسادى دەپ ۇمىتتەنەدى. بۇدان بولەك, جوبا ەكى ەلدىڭ ىنتىماقتاستىق قارىم-قاتىناستارىن ودان ءارى بەكىتۋگە سەبەپشى بولارى ءسوزسىز, دەيدى.
«ەكى ەل اراسىنداعى ىنتىماقتاستىق قازاقستان ەلى تاۋەلسىزدىك العان ساتتەن باستالدى. جاپونيا ۇكىمەتى ادام ءومىرىنىڭ قاۋىپسىزدىگىن قامتاماسىز ەتۋگە كوپ كوڭىل بولەدى. ءدال وسى باعىتتا ءبىز 1997 جىلدان باستاپ ء«شوپ تامىرى» جوباسىن ىسكە اسىرا باستادىق. بۇل جوبا ەكى ەل اراسىنداعى دوستىق قارىم-قاتىناستىڭ ودان ءارى نىعايۋىنا ءوز ۇلەسىن قوسادى دەپ ۇمىتتەنەمىن», دەدى يتيرو كاۆاباتا.
ءمادينا جالەلقىزى,
«ەگەمەن قازاقستان»