ءسال كەشىككەندە ۇشاققا ۇلگەرمەي قالادى ەكەنمىن. ايتەۋىر, اۋپىرىمدەپ ءجۇرىپ بورتتىڭ ەسىگى جابىلاردا جەتتىك. باعىت – ۋفا قالاسى. جانىما جاسى مەنىمەن شامالاس جىگىت كەلىپ جايعاستى. مىنەزى اشىق. اقجارقىن كوڭىلىمەن اعىتىلىپ بىردەن قازاقتىڭ باس قالاسىنىڭ كەرەمەتتىگىن ايتا جونەلدى. ورنىنا وتىرىپ ۇلگەرمەي, سويلەپ جاتىر. سۇلۋ ستيۋاردەسسانىڭ ەسكەرتۋىنە ءمان بەرەر دە ەمەس. سول جاعالاۋ «مىنانداي ەكەن» دەپ باس بارماعىن كورسەتىپ قويادى. كوڭىل كۇيى كەرەمەت. «بايتەرەككە» دە بارىپتى. «حان شاتىر» قانداي ادەمى ورنەكتەلگەن دەپ باس شايقايدى. «ماڭگىلىك ەل» مونۋمەنتىنە دە ءدان ريزا. مەن اڭ-تاڭمىن. قوناق كەلىپ ءوز ءۇيىڭدى شىن كوڭىلىمەن ماقتاپ جاتسا قالاي قۋانبايسىڭ؟ «بۇل – مەنىڭ استانام» دەپ كەۋدەمدى قۋانىش, ماقتانىش سەزىمى كەرنەدى. العان اسەرىن ايتىپ بولعان سوڭ, ءجون سۇرادى. تانىستىق. قاسىمداعى جولسەرىگىمنىڭ ەسىمى يلنۋر ەكەن. ۋفاداعى مۇناي كومپانيالارىنىڭ بىرىندە قاتارداعى قىزمەتكەر. استاناعا ىسساپارمەن كەلىپتى.
– قايدا, نە ءۇشىن بارا جاتقانىڭدى ايتپاساڭ دا بولادى. ءبىلىپ وتىرمىن. ۋايىمداما, «قازاق مەسسيى» بىزدە جاقسى ويناپ كەتەدى, – دەپ جىلى جىميدى.
ك ۇلىپ جىبەردىم. قازاق ەلىنىڭ باس گازەتى «ەگەمەن قازاقستاندا» ىستەيتىنىمدى ايتتىم.
– فۋتبولعا اسا قۇمار ەمەسپىن. قازاق فۋتبولشىسىنىڭ «ۋفاعا» اۋىسقانىن ينتەرنەتتەن وقىعانىم بار. استاناعا كەلەردە ءبىر توپ ۋفادان قايتقان قازاق جانكۇيەرلەرمەن كەلدىم. دەگەنمەن وتە باۋىرمال ەكەنسىڭدەر, – دەيدى يلنۋر.
– ەركەبۇلان ءالى وتە جاس فۋتبولشى. جاقىندا عانا 18-گە تولدى. باشقۇرت ەلى بىزگە بوتەن ەمەس. بىراق ۋفا ۇلكەن قالا. الىستىعى تاعى بار. بۋىنى بەكىمەگەن, اۋىلدان ۇزاق ۋاقىتقا شىقپاعان جاس تالانتتى فۋتبولشىمىزعا جان-جاقتى قولداۋ كەرەك. ىزدەۋشىسى بار ەكەنىن سەزىنسىن. ءبىلسىن. رەداكتسيا باسشىلىعىنىڭ تاپسىرماسىمەن بارا جاتىرمىن.
ۋفاعا دەيىن جاقسى جولسەرىككە جولىققانىما قۋانعانىم سول ەدى, «نەگىزگى قۇرامدا ءالى ويناماعان بالا تۋرالى اجيوتاج, جالاڭ ءسوز نەگە كوپ؟» دەپ توتەسىنەن قويىپ قالدى سۇراعىن كورشىم. «بۇنداي قىسىمدى, ماقتاۋدى كوتەرە الماي قالۋى بەك مۇمكىن عوي» دەپ ويىن جالعادى يلنۋر باۋىر.
شىنىمدى ايتايىن, بۇل سۇراق سوڭعى كەزدەرى مەنى دە كوپ مازالاپ جۇرگەن. قۋانىپ قالدىم. باۋىرلاستىڭ جاقىنىنا دەگەن جاناشىرلىعى دەپ ءتۇسىندىم. تاپتىشتەپ تارازدان شىققان جاس تالانتتىڭ تاعدىرى, قازىرگى قازاق فۋتبولىنىڭ جاعدايىن تۇسىندىرۋگە تۋرا كەلدى.
نە ءۇشىن ەركەبۇلان ارقالاعان جاۋاپكەرشىلىكتىڭ جۇگى اۋىر؟ سوڭعى ون جىلدا بىزدەن سىرت ەلدە دوپ تەپكەن ءتاۋىر فۋتبولشى شىققان جوق. جاقسىلاپ ويلانىپ قاراساڭىز, نامىسىمىزعا تيەتىن جاعداي. سامات سماقوۆ پەن اسحات قادىرقۇلوۆ قانا رەسەي كوماندالارىندا ويناعان-دى. نەگە قازاقتىڭ فۋتبولشىلارى اعىلشىن پرەمەر-ليگاسىن, يسپان لا-ليگاسىن ايتپاعاندا, ەڭ بولماعاندا رەسەي, پولشا, چەحيا كوماندالارىندا ويناۋعا تىرىسپايدى؟ بىزدە شىن تالانتتار جوق پا؟ الدە بارعان ەلىندە باسەكەلەستىكتەن قورقا ما؟ كىم, نە كەدەرگى؟
«ارقادا قىس جايلى بولسا, ارقار اۋىپ نەسى بار» دەگەن ءسوز ءدال ءبىزدىڭ فۋتبولشىلارعا ارناپ ايتىلعانداي. شىندىعىندا ءبىزدىڭ فۋتبولدا باسەكەلەستىك جوقتىڭ قاسى. تالاپ از. قازاق فۋتبولىندا قوسالقى قۇرامدا ءجۇرىپ تە قوماقتى قاراجات تابۋعا بولادى. وسى كويلەگى كوكتىك, كوڭىلى توقتىق تالاي تالانتتارىمىزعا تۇساۋ بولىپ تۇرعانداي. ايتپەسە مۇجىقوۆ, شومكو, بەيسەبەكوۆتەردىڭ باسقا دەڭگەيى مىقتى ەلدىڭ بىرىنشىلىكتەرىندە وينايتىن ۋاقىتى كەلدى ەمەس پە؟ ەۋروپا كوماندالارىمەن ويناپ مول تاجىربيە جيناقتادى. كوردى. قاشانعى قازاق فۋتبولىنىڭ قازانىندا قايناي بەرمەك؟ ابزال, سەرىكجاندار العا ۇمتىلىپ, مىقتى بىرىنشىلىكتەردە قازاق ەلىنىڭ اتىن شىعارىپ, نامىسىن قورعاماعاندا باسقا كىمدەر قورعايدى؟
قايبىر جىلى باۋىرجان بارىپ كەلدى. يسلامحان رەسەيدە ويناپ كەتەدى دەگەنگە يلانعانداردىڭ قاتارىندا ەدىم. وكىنىشتى. قوسالقى قۇرامنان كەرى قايتتى.
ەندىگى ءۇمىت ەركەبۇلاندا. «ەگەمەننىڭ» دە ونى ىزدەپ, قولداۋ كورسەتۋگە تالپىنۋىنىڭ سەبەبى سول. تەك يلنۋر باۋىرىمىز ايتقانداي, اينالاسىنداعى داۋرىقپا ءسوزدىڭ كوپتىگى الاڭداتادى. باسقا تەڭەۋ تاپپاعانداي الەمدەگى ەڭ مىقتى فۋتبولشى – مەسسيگە تەڭەپ قويدىق. قۇداي-اۋ, مەسسي قايدا, ەركەبۇلان قايدا؟ مەسسي 18 جاسىندا لا-ليگادا ويقاستاپ, قارسىلاستارىنىڭ قاقپاسىنا گولدى قوس-قوستان توعىتقان. سەيداحمەتتىڭ نەمەرەسى ۇلكەن فۋتبولعا ەندى عانا ءتاي-ءتاي باستى. قيسىنسىز تەڭەۋلەر تالابى بار بالانىڭ باسىن اينالدىرىپ جىبەرمەي مە؟ سوندىقتان «ۋفاداعى» اياق الىسىن سابىرلىقپەن بايقايىق. شىن تالانتقا تۇساۋ جوق. ءۇمىتىمىز زور. يلنۋرعا ۋفاعا جەتكەنشە ەركەبۇلان تۋرالى دەرەكتەر ايتىپ, قازىرگى قازاق فۋتبولىنىڭ كەمشىلىكتەرى مەن جەتىستىكتەرىن دە تۇگەل ءتىزىپ بەرگەندەي بولدىم. «استانا» فۋتبول كلۋبىنىڭ ەۋروپا الاڭدارىنداعى بيىلعى تاريحي جەڭىستەرى دە اڭگىمەمىزگە ارقاۋ بولدى. يلنۋر قوشتاساردا الداعى ۋاقىتتا مىندەتتى تۇردە «ۋفانىڭ» ويىنىنا بارۋعا ۋادە بەردى. «ەركوشتىڭ قولداۋشىلارى كوپ. باۋىرلاس ەلدىڭ بالاسىن جالعىزسىراتپايمىز. تالاي گول سوعىپ, قازاق بالاسى كوماندامىزدى ءالى جەڭىسكە جەتەلەيدى» دەپ قۇشاقتاپ قوشتاستى.
«ۋفاعا» ۇلكەن سەنىم ارتىلىپ وتىرەندى 3 ايدان سوڭ رەسەيدە فۋتبولدان الەم بىرىنشىلىگى وتەدى. تاڭداپ الىنعان 11 قالانىڭ ىشىندە ۋفا جوق. بۇل باشقۇرت ەلىندە فۋتبولعا دەگەن قىزىعۋشىلىقتىڭ تومەندىگىنەن ەمەس. قالالاردىڭ جاقىن ورنالاسۋىنا قاتتى ءمان بەرىلدى مە, كورشى قازان قالاسى تىزىمدە بار دا, ۋفا ەنبەي قالىپتى. ەسەسىنە ۋفادا ۇلكەن ساياسي كەزدەسۋلەر ءجيى ءوتىپ تۇرادى. 2015 جىلى BRICS ۇيىمىنىڭ وتىرىسى ءدال وسى ۋفا قالاسىندا وتكەن.
حالقىنىڭ سانى ميلليوننان استام. قالا 6 اۋدانعا بولىنەدى. قۇرىلىس قارقىندى ءجۇرىپ جاتىر. ۋفادا حوككەيگە دەگەن تۇرعىنداردىڭ ەرەكشە ىقىلاسىن قالاداعى جارنامالاردىڭ كوپتىگىنەن-اق بايقاۋعا بولادى. اتاقتى «سالاۆات يۋلاەۆ» كومانداسىنىڭ ويىندارىنا 10 مىڭداي ادام جينالاتىنى سوزىمىزگە دالەل. 2011 جىلعى گاگارين كۋبوگىنىڭ يەگەرى رەسەيدىڭ بىرنەشە دۇركىن چەمپيونى.
«ۋفا» فۋتبول كومانداسى 2009 جىلى قۇرىلعان. رەسەي فۋتبولىنداعى تومەنگى ليگالاردا ويناعان. 2014 جىلدان باستاپ پرەمەر-ليگادا ونەر كورسەتەدى. باشقۇرت فۋتبولىنىڭ دامۋىنا كوپ ەڭبەگى سىڭگەن ادامنىڭ ءبىرى – شاميل گازيزوۆ. بۇگىندە شاميل كاميلەۆيچ «ۋفا» فۋتبول كلۋبىنىڭ باس ديرەكتورى. «بىزدە فۋتبولعا قاراعاندا حوككەي ءبىرىنشى ورىندا بولدى. قازىر فۋتبول جاقسى دامىپ كەلەدى. بۇل ءبىزدىڭ جۇمىسىمىزدىڭ ناتيجەسى. الدا اتقارار شارۋا وتە كوپ. كوماندامىزدىڭ جەتىستىكتەرى الدا دەپ ويلايمىن», دەيدى گازيزوۆ.
2016 جىلى كوماندانى ۆيكتور گونچارەنكو جاتتىقتىرعان. بىلتىرعى جىلدىڭ قورىتىندىسى بويىنشا «ۋفا» 8-ورىنمەن اياقتادى. 2017 جىلدىڭ ورتاسىندا ۆيكتور گونچارەنكو «تسسكا» كومانداسىنىڭ تىزگىنىن ۇستاپ, ونىڭ ورنىنا سەرگەي سەماك باس باپكەر بولىپ تاعايىندالدى.
سەماك. سەنىم. سەرپىلىسسەرگەي سەماك رەسەي فۋتبولى ءۇشىن ماڭىزدى تۇلعانىڭ ءبىرى. رەسەي قۇراماسى 2008 جىلى ەۋروپا بىرىنشىلىگىندە 3-ورىن العاندا سەرگەي سەماك كوماندانىڭ سەركەلەرىنىڭ ءبىرى بولعان.تالاي جىلدار «تسسكا» كلۋبىنىڭ نامىسىن قورعادى. 2000 جىلداردىڭ باسىندا ءبىزدىڭ اسحات قادىرقۇلوۆپەن بىرگە ويناعان. ارتىنشا, ءپاريجدىڭ «پسج» كومانداسىندا ءبىر جىل ويناپ كەلدى. «زەنيتتىڭ» جەيدەسىن بىرنەشە جىل كيدى. رەسەي پرەمەەر-ليگاسىندا ەڭ كوپ ويىن وتكىزگەن فۋتبولشىلاردىڭ ءبىرى. جالپى 530 ويىن وتكىزىپ, 115 گول سوققان. 5 دۇركىن ەل چەمپيونى. فۋتبول جانكۇيەرلەرى اراسىندا ەرەكشە ىقىلاس پەن قۇرمەتكە يە. باپكەر رەتىندە دە ءوزىن جاقسى قىرىنان كورسەتىپ كەلەدى. سول سەرگەي سەماك قازاقتىڭ جاس ويىنشىسىنىڭ كومانداعا الىنۋىنا مۇددەلى بولىپتى. «ۋفا» كومانداسى دا, باس باپكەرى دە جاس. كلۋب العا ۇلكەن ماقساتتار قويىپ وتىر. ەركەبۇلان سەيداحمەتتىڭ فۋتبولشى رەتىندە وسۋىنە باۋىرلاس ەلدىڭ باستى كومانداسى ىقپال ەتەدى دەپ ۇمىتتەنەمىز.
№ 10 ويىنشى – ەركوش«ۋفا» مەن «انجي» اراسىنداعى كەزدەسۋ قوس كوماندا ءۇشىن دە وتە ماڭىزدى. ويتكەنى ەكى كوماندا دا الدىڭعى ويىندا قارسىلاستارىمەن ۇپاي بولىسكەن. «انجي» تۋرنير كەستەسىندە سوڭعى ورىنداردىڭ بىرىندە. قوناقتار ۋفادا ۇپاي جوعالتسا, جاعدايلارىنىڭ وتە قيىن بولاتىنىن جاقسى تۇسىنەدى. الاڭ يەلەرىنە دە جەڭىس اۋاداي قاجەت. بۇگىن ۋفا قالاسىندا فۋتبولمەن ءبىر ۋاقىتتا حوككەي وتەدى. اتاقتى «سالاۆات يۋلاەۆ» پەن ومبىلىق «اۆانگارد» كوماندالارىنىڭ پلەي-وفف كەزدەسۋىن تاعاتسىزدانا كۇتىپ جۇرگەن سپورتسۇيەر قاۋىم جەتەرلىك. سونىڭ سالدارىنان فۋتبولعا ادەتتەگىدەن از جانكۇيەر جينالادى دەپ كۇتىلۋدە. شامامەن 5-6 مىڭداي ناعىز جانكەشتى جانكۇيەر 15 مىڭ ادام سىيىپ كەتەتىن «نەفتيانيك» الاڭىنا قاراي اعىلادى. كوماندالاردىڭ نەگىزگى قۇرامى بەلگىلى بولعانشا اسىقتىق. نەسىن جاسىرايىق, ءبىزدىڭ ەركەبۇلان سەيداحمەت نەگىزگى قۇرامدا شىعىپ قالادى دەگەن ءۇمىتتىڭ بولعانىن. الاڭ يەلەرىنىڭ قۇرامىندا كەحيندە فاتايدان باسقا شابۋىلشىلاردىڭ جاراقاتتارىنا بايلانىستى كەزدەسۋگە قاتىسپايتىنى بەلگىلى. يگبۋن مەن كروتوۆ قايتا ساپقا قوسىلعانشا قازاق بالاسىنا دا مۇمكىندىك بەرىلەر. بۇل – ءبىزدىڭ جاس تالانتتىڭ ويىنعا قاتىسۋ مۇمكىندىگىن ارتتىراتىن فاكتورلاردىڭ ءبىرى. سەرگەي سەماكپەن ءبىر كۇن بۇرىن سويلەسكەنىمىزدە ء«وزىن كورسەتۋ ءۇشىن مىندەتتى تۇردە مۇمكىندىك بەرەمىن», – دەپ سەنىمدى ايتقان.
باس باپكەر بۇگىنگى ويىننىڭ ءبىرىنشى تايمىنا باسقاشا شەشىم قابىلداپتى. «ەركوش» قوسالقى قۇرامدا قالدى. كەزدەسۋ الاڭ يەلەرىنىڭ باسىمدىعىمەن باستالدى. قوس قاپتالداعى دميتري سىسۋەۆ پەن دميتري جيۆوگليادوۆ بەلسەندى وينادى. قوناقتار ساپىندا «قايراتتا» ءۇش ماۋسىم ويناعان ميحايل باكاەۆ ءجۇر. كومانداداعى كوشباسشى ويىنشىلاردىڭ ءبىرى. الما-كەزەك شابۋىلدارمەن باستالعان كەزدەسۋدە نەگىزىنەن دوپقا تالاس الاڭ ورتاسىندا بولدى. دوپ ءۇشىن تالاستاردىڭ بىرىندە قورعاۋشى دەنيس تۋماسيان جاراقات الىپ قالدى. ويىندى جالعاستىرا الماعان قورعاۋشىنىڭ ورنىنا الەكسەي نيكيتين كىردى. «ۋفانىڭ» جالعىز شابۋىلشىسى كەحيندە فاتاي قورعاۋشىلاردى قۇلاتقاننان باسقا تۇك بىتىرمەي ءجۇر. ويىننىڭ ءبىرىنشى ءبولىمى ءبىز ءۇشىن دە, مىڭداعان جانكۇيەر ءۇشىن دە ەستە قالارلىقتاي بولمادى. ءبىرىنشى تايم تەڭ اياقتالدى.
سەماك ويىنشى اۋىستىرىپ ويىنعا وزگەرىس ەنگىزبەسە الاڭ يەلەرىنىڭ شابۋىلدارى سۇيىلىپ بارادى. مۇمكىن ويىننىڭ قالعان بولىگىندە ەركەبۇلانعا سەنىم ارتاتىن بولار؟! ايتەۋىر كومانداعا ءبىر وزگەرىس كەرەك. الاڭدا ويىندى قىزدىراتىن فۋتبولشى تابىلماي تۇر. ەركەبۇلان شىقسا دەگەن ۇمىتپەن ءبىز وتىرمىز. «ۋفانىڭ» باس باپكەرى ءبىزدىڭ ويىمىزدى وقىپ قويدى ما, ۇزىلىستە نەگىزگى قۇرامانىڭ ويىنشىلارىنىڭ اراسىندا سەيداحمەت جالت ەتتى. قانشا الىس بولسا دا رەداكتسيانىڭ ارنايى تاپسىرماسىمەن ويىنعا بوسقا كەلمەگەنىمىزدى تۇسىندىك. ۇزاق جىلدىق ۇزىلىستەن سوڭ, رەسەي پرەمەر-ليگاسىندا قازاق فۋتبولشىسى الاڭعا شىقتى. تارازدىڭ تارلانبوزى العاشقى ويىنىن وتكىزەدى. قازاق فۋتبولشىسىنىڭ ويىنعا كىرۋىمەن تاكتيكالىق وزگەرىستەر بولدى. ەركەبۇلانعا شابۋىلشىلار مەن جارتىلاي قورعاۋشىلاردىڭ ءىس-قيمىلىن ۇيلەستىرۋ مىندەتى جۇكتەلگەن. كەزدەسۋدىڭ ەكىنشى تايمى گولدارعا باي بولدى. الدىمەن, الاڭ يەلەرى ەسەپ اشقان. ايىپ دوبىن ادەمى پايدالانعان ۋفالىقتار العا شىقتى. «انجي» تەز ەس جيناپ, قارىمتا شابۋىلداردىڭ بىرىندە ەسەپتى تەڭەستىرىپ كەتتى.
«ۋفاعا» جەڭىستىڭ اۋاداي قاجەت ەكەندىگىن جوعارىدا ايتقانبىز. سەرگەي سەماك شاكىرتتەرى سالعان جەردەن قوس گول سوقتى. قازاقتىڭ جاس تالانتى قوس شابۋىلدىڭ ناتيجەلى وربۋىنە ءوز ۇلەسىن قوستى. جىلدامدىعىمەن, دوپتى وزىندە ۇستاۋىمەن ەرەكشەلەنگەن №10 ويىنشىنىڭ الاڭداعى ءاربىر قيمىلى جانكۇيەرلەردىڭ كوڭىلىنەن شىقتى. الاڭنان «ەركوش», «لەو» دەگەن سوزدەر قاتتىراق ەستىلە باستادى. ءدال وسى ساتتە باۋىرلاس يلنۋردىڭ «كوماندامىزدى جەڭىسكە جەتەلەيدى» دەگەن ءسوزى ەسكە ءتۇستى. قازاقتىڭ بالاسىنا دەگەن جانكۇيەرلەردىڭ ءىلتيپاتىن كورگەنىمىزدە, توبەمىز كوككە جەتكەندەي بولدى. ءوزىنىڭ العاشقى ويىنىندا كەحيندەدەن ارتىق بولماسا, كەم ەمەستىگىن دالەلدەدى. تارتىستى وتكەن ويىن «ۋفا» كومانداسىنىڭ جەڭىسىمەن اياقتالدى. قورىتىندى ەسەپ 3-2.
ءباسپاسوز ءماسليحاتىنا باردىق. ەڭسەمىز تىك. مەرەيىمىز ۇستەم. باسقا جۋرناليستەر ەركوشتىڭ العاشقى ويىنعا شىعۋىمەن قۇتتىقتاپ جاتىر. قازاق بالاسىنىڭ بۇگىنگى ويىنىنا ءبارى ريزا. سەرگەي سەماك شاكىرتىنىڭ العاشقى ويىنى تۋرالى قىسقا قايىردى.
«ەركەبۇلان ەكى شابۋىلدىڭ ناتيجەلى اياقتالۋىنا اتسالىستى. ريزامىن. بىراق كىشكەنە جانكەشتىلىك, قورعانىستا سەنىمدىلىك جەتىسپەدى. تالانتتى ويىنشى ەكەنىندە داۋ جوق. تىنباي جاتتىعاتىن بولسا, بولاشاقتا جاقسى ويىنشى بولادى», دەيدى سەرگەي بوگدانوۆيچ.
ەكى ساعاتتاي كۇتتى. توپىرلاعان جاس جانكۇيەر 50-60-تاي بولىپ قالادى. ەركەبۇلان سەيداحمەتتەن قولتاڭبا الىپ, ەستەلىككە سۋرەتكە ءتۇسۋ ءۇشىن ءبىر توبى كەتىپ قالعان. كەش باتىسىمەن كۇن دە سۋىتا باستادى. سوڭعىلاردىڭ ءبىرى بولىپ شىقتى. ازداپ جاراقات الىپ قالىپتى. جاس جانكۇيەرلەرىنىڭ ءبارىنىڭ ءوتىنىشىن ورىنداپ جاتىر. سۇراقتارىمىزعا جاۋاپ بەردى. قاراپايىمدىلىعى كورىنىپ تۇر. مەنمەندىكتى بايقامادىق. جاڭا عانا اياقتالعان ويىننىڭ بۋىمەن شىرەنىپ ءوتىپ كەتۋىنە دە بولار ەدى. سەماك, ستويلوۆ, ۇلتتىق قۇراما تۋرالى سويلەستىك. گازەتىمىزدىڭ الداعى ساندارىندا سۇحباتتى وقي الاسىزدار. ەلگە سالەم ايتتى. «ەگەمەننىڭ» وقىرماندارىنا اق تىلەگىن جەتكىزدى. ءبىز دە رەسەي پرەمەر-ليگاسى تاريحىندا الاڭعا شىققان ەڭ جاس فۋتبولشىعا ساتتىلىك تىلەدىك.
ەركەبۇلان جومارت,
«ەگەمەن قازاقستان» – ۋفادان (رەسەي)