بۇگىندە شىعىس قازاقستاندا 730 مىڭنان استام ايەلدەر قاۋىمى بار ەكەن. بۇل - وبلىس تۇرعىندارىنىڭ 50 پايىزى. ولاردىڭ 60 پايىزى ەكونوميكالىق جاعىنان بەلسەندى تۇرعىنداردىڭ ساناتىنا جاتادى. ايەلدەردىڭ 40 پايىزى باسشىلىق قىزمەت اتقارۋدا. ءوڭىردىڭ ءبىلىم بەرۋ, دەنساۋلىق ساقتاۋ, مادەنيەت سالالارىندا بارلىعى 80 مىڭداي ايەل ەڭبەك ەتۋدە. 24 710 نازىك جاندى پەداگوگ جاس ۇرپاقتى ءبىلىم نارىمەن سۋسىنداتۋدا.
ايماقتىڭ دەنساۋلىق ساقتاۋ سالاسىندا ەڭبەك ەتىپ جۇرگەن ايەلدەردىڭ كورسەتكىشى 90 پايىز بولسا, ەكى مىڭداي ايەل ءوڭىردىڭ مادەنيەت سالاسىنىڭ دامۋىنا ۇلەس قوسۋدا. وبلىستاعى «التىن القا» مەن «كۇمىس القاعا» يە بولعان باتىر انالار سانى جەتى مىڭ شاماسىندا ەكەن. «نەمەنەگە جەتىستىڭ بالا باتىر, قاريالار ازايىپ بارا جاتىر» دەمەكشى, وكىنىشكە قاراي ۇلى وتان سوعىسىنا قاتىسقان ارداگەر انالارىمىزدىڭ سانى جىلدان جىلعا ازايىپ بارادى. قازىر وڭىردە 1941 جىلعى قاندى قاساپقا كۋا بولعان 29 ارداگەر بار. تىل ارداگەرى اتانعان انالاردىڭ سانى 19 مىڭعا جەتىپ جىعىلادى ەكەن.
وسىنداي دەرەكتەردى 8 ناۋرىز مەرەكەسى قارساڭىندا وسكەمەندە وتكەن سالتاناتتى شارا بارىسىندا شىعىسقازاقستاندىق ايەلدەر قاۋىمىن مەيراممەن قۇتتىقتاعان وبلىس اكىمىنىڭ ورىنباسارى, ايەلدەر ىستەرى جانە وتباسىلىق-دەموگرافيالىق ساياسات جونىندەگى وبلىستىق كوميسسيانىڭ ءتورايىمى اسەم ءنۇسىپوۆانىڭ اۋزىنان ەستىدىك.
«ايەلسىز ءومىر جىلۋسىز, ايەلسىز ءومىر كوڭىلسىز. سۇرىقسىز تىرشىلىككە ءار بەرەتىن دە, ءنار بەرەتىن دە — ايەل. وسىناۋ زالدا بۇگىن ەرەكشە كوڭىل-كۇي سالتانات قۇرىپ تۇر. ءبىز قازىر شىعىستىڭ ايەلدەرىنىڭ قانشالىقتى سۇلۋ, اقىلدى دا دانا, مەيىرىمدى ەكەندىگىنە تاعى دا ءبىر كوز جەتكىزىپ وتىرمىز. جۇزدەرىڭىزگە كۇلكى ءۇيىرىلىپ, ءبىزدىڭ نازىك يىعىمىزدا ۇلكەن جاۋاپكەرشىلىكتىڭ بارىن سەزىنگەندەرىڭىزدى قالايمىن. شىنىندا دا ءبىز ءۇشىن شاڭىراق شاتتىعى, وتباسى مەن بالا باقىتى ەرەكشە ماڭىزدى. بىراق ءبىز ءوز كاسىبىمىزدى دە ادالدىقپەن اتقارىپ كەلەمىز. بارشاڭىزدى شۋاقتى مەرەكەمەن شىن جۇرەكتەن قۇتتىقتايمىن», - دەدى وبلىس اكىمىنىڭ ورىنباسارى.
ءا.ءنۇسىپوۆا سالتاناتتى شارا بارىسىندا وبلىستىق تاريحي-ولكەتانۋ مۋزەيىنىڭ ديرەكتورى سۆەتلانا نۇرعازيەۆاعا, سەمەيدەگى «ايشا ءبيبى» ۇلتتىق-مادەني ورتالىعىنىڭ باسشىسى ايمان بوقباساروۆاعا, وسكەمەندەگى «بالالار اۋىلىنىڭ» انا-تاربيەشىسى گاۋھاريا جۇماعاليەۆاعا, شىعىس قازاقستان وبلىستىق پروكۋرورىنىڭ اعا كومەكشىسى ماعيراش زاينوۆاعا, پوليتسيا مايورى گۇلنارا قاپىشەۆاعا جانە سەمەيدەگى ف.دوستوەۆسكي اتىنداعى مۋزەي-ءۇيىنىڭ ديرەكتورى تاتيانا اۆتۋشكوعا العىس حات تابىس ەتتى. وسى ماراپاتقا يە بولعان جانداردىڭ اراسىندا ارداگەر جۋرناليست عافۋرا سارسەنبايقىزى, وبلىستىق «ديدار» گازەتىنىڭ شولۋشىسى ايناگۇل ەسكەنقىزى مەن «التاي» تەلەارناسىنىڭ قىزمەتكەرى ءمادينا كارىباەۆا دا بار.
ازامات قاسىم,
«ەگەمەن قازاقستان»
وسكەمەن
سۋرەتتەردى تۇسىرگەن ۆلاديمير پەتۋحوۆ