سوڭعى كەزدەرى قوعامدا بەلەڭ الىپ, ارقامىزعا ايازداي باتقان ۇستازدارعا دەگەن تەرىس كوزقاراس, ۇستازداردىڭ بۇقارالىق اقپارات قۇرالدارىندا جانە الەۋمەتتىك جەلىلەردە پارلامەنت دەپۋتاتتارىنان وزدەرىن وقۋشىلار مەن اتا-انالاردان قورعاۋدى سۇراعان جانايقايى ءبىزدىڭ پرەمەر-مينيستر ب.ساعىنتاەۆقا دەپۋتاتتىق ساۋالمەن قايرىلۋىمىزعا سەبەپ بولدى.
قازىر مەملەكەت مۇعالىمدەردى جان-جاقتى قولداۋ شارالارىن جۇرگىزۋ ۇستىندە. ەلباسىمىزدىڭ تاپسىرماسىنا سايكەس ۇكىمەت مۇعالىم مارتەبەسىن ارتتىرۋ ماقساتىمەن ءبىلىم بەرۋدىڭ جاڭارتىلعان مازمۇنىنا كوشكەن ۇستازداردىڭ لاۋازىمدىق جالاقىسىن 30 پايىزعا كوبەيتۋ تۋرالى جاقىن ارادا ارنايى قاۋلى شىعاردى. سولاي بولعانىمەن قازاقستاندىق ۇستازدار ءبىلىم سالاسىنداعى شەنەۋنىكتەردەن, اتا-انالار مەن وزدەرى ءبىلىم نارىمەن سۋسىنداتىپ, تاربيە بەرىپ جۇرگەن وقۋشىلار تاراپىنان كەيبىر قىسىمشىلىقتار كورىپ جۇرگەنىن ايتپاۋعا بولماي وتىر. كەيبىر اتا-انالار تاراپىنان ۇستازدارعا ءتىل تيگىزۋ, ءتىپتى بالالارىنىڭ تاربيەسىزدىگىنە كىنالاۋ سياقتى ارەكەتتەر ءجيى بولاتىنىن بۇقارالىق اقپارات قۇرالدارىنان, الەۋمەتتىك جەلىلەردەن كورىپ ءجۇرمىز.
ۇستاز دەگەن مارتەبەلى ماماندىقتىڭ بۇگىنگى كۇنى قۇنسىزدانۋى وكىنىشتى-اق. اتا-انالاردىڭ بالالارىنىڭ كوزىنشە مۇعالىمدەرگە دورەكى سوزدەر ايتۋى – جاس جەتكىنشەكتىڭ الدىندا ۇستاز بەدەلىن ايرانداي توگەدى. مۇعالىم – قاۋقارسىز, قۇقىعى تاپتالعان ادامعا اينالادى. قازىرگى كەزدە ديكتافون, فوتواپپارات, ءموبيلدى تەلەفون قولدانۋ ارقىلى وقۋشىلاردىڭ مۇعالىمدەر بەدەلىن ءتۇسىرۋى جيىلەپ كەتتى.
ءبىز وسىنداي جاعدايلاردى ەسكەرە وتىرىپ, مۇعالىم مارتەبەسىن قورعاۋ ءۇشىن ۇكىمەت تاراپىنان تومەندەگىدەي كەشەندى ءىس-شارالار قولعا الىنۋىن سۇرادىق:
1. قازىرگى تاڭدا رەسەيلىكتەر ۇستازداردىڭ قورعالۋىنا كەپىلدىك بەرەتىن زاڭ ەنگىزۋدى تالقىلاپ, ۇسىنىستار دايىنداۋدا. جوبادا پەداگوگيكالىق قىزمەتكەرلەرگە قارسى جاسالعان زورلىق-زومبىلىق, سونىمەن قاتار ونىڭ ار-وجدانىنا تيۋ, بيلىك وكىلدەرىنە جاسالعان زورلىق-زومبىلىقپەن پارا-پار بولىپ ەسەپتەلىنسىن دەلىنگەن. وسى تاجىريبە بىزدە دە قولدانىلسا.
2. مەملەكەتتىك ورگانداردا ۆيدەوكامەراسى بار جانە ينتەرنەتكە قوسىلعان تەلەفونداردى پايدالانۋعا تىيىم سالىنعانى بەلگىلى. مەكتەپتەردىڭ دە مەملەكەتتىك مەكەمە ەكەندىگىن ەسكەرە وتىرىپ, وقۋشىلارعا, اتا-انالارعا, مۇعالىمدەرگە وقۋ پروتسەسى كەزىندە مەكتەپتە ينتەرنەت-مودۋلدەرى مەن فوتو-ۆيدەوكامەرالارى بار قۇرىلعىلاردى پايدالانۋعا شەكتەۋ قويسا.
3. قازىرگى كەزدە ورتا ءبىلىم بەرۋ مەكەمەلەرىندە قىزمەت ەتەتىن ەر-ازاماتتاردىڭ ۇلەس سالماعى نەبارى 18% بولعاندىقتان, وقۋشى ەر بالالارىمىز قىز مىنەزدى بولىپ بارادى دەگەن پىكىرلەر ايتىلىپ ءجۇر. وسىعان وراي, جوو-داعى ارنايى پەداگوگيكالىق ماماندىقتارعا ەر-ازاماتتاردىڭ قابىلدانۋىنا ارنايى جەڭىلدىكتەر تەتىگى قاراستىرىلسا.
ۇستازداردىڭ ار-وجدانىن قورعاۋعا, بەدەلىن ارتتىرۋعا باعىتتالعان وسى ۋاجدەردى ەسكەرىپ, ۇكىمەت كەشەندى شارالار قابىلداۋ ءۇشىن ۋاكىلەتتى مەملەكەتتىك ورگاندارعا تاپسىرما بەرەدى دەگەن ۇمىتتەمىز.
دينار نوكەتاەۆا, سەنات دەپۋتاتى