پرەمەر-ءمينيستردىڭ ءبىرىنشى ورىنباسارى اسقار مامين ماڭعىستاۋ وبلىسىنا جۇمىس ساپارى بارىسىندا «اقتاۋ تەڭىز پورتى» اەا دامىتۋ مەن كاسپي لوگيستيكالىق ينفراقۇرىلىمى جوسپارىن جۇزەگە اسىرۋ بويىنشا كەڭەس وتكىزدى.
«اقتاۋ تەڭىز پورتى» اەا اق باسقارما توراعاسى باۋىرجان قايراتوۆتىڭ بايانداۋىنشا, «اقتاۋ تەڭىز پورتى» اەا 2002 جىلى ەكسپورتقا باعىتتالعان جوعارى تەحنولوگيالىق وندىرىسكە ينۆەستيتسيا تارتۋ ماقساتىندا قۇرىلعان بولاتىن. مۇندا 27 قاتىسۋشى تىركەلگەن. يتاليا, تۇركيا, گەرمانيا, قىتاي, انگليا, ازەربايجان ينۆەستورلارى قىزمەت ەتەدى. قازىردىڭ وزىندە 18 ينۆەستيتسيالىق جوبالار جۇزەگە اسىرىلىپ, 1300 جۇمىس ورنى اشىلدى. 260,4 ميلليارد تەڭگەنىڭ ءونىمى ءوندىرىلىپ, بيۋدجەتكە 23,6 ملرد. تەڭگە ءتۇسىم ءتۇستى.
ماڭعىستاۋ وبلىسىنىڭ اكىمى ەرالى توعجانوۆ «اقتاۋ تەڭىز پورتى» اۋماعىندا جۇزەگە اسىرىلاتىن جوبالار ەرەكشە باقىلاۋدا ەكەنىن اتاپ ءوتتى.
پرەمەر-ءمينيستردىڭ ءبىرىنشى ورىنباسارى اسقار مامين اەا قاتىسۋشى كاسىپورىندار وزدەرىنىڭ ونىمدەرىن ىشكى جانە سىرتقى نارىقتارعا شىعارۋعا باسەكەلەستىككە ساي بولۋى كەرەكتىگىن ايتتى. اەا شەتەل ينۆەستيتسياسىن تارتۋدى بەلسەندى جۇرگىزۋ قاجەت ەكەندىگىنە, بۇل ماسەلە ۇكىمەتتىڭ ەرەكشە باقىلاۋىندا تۇرعاندىعى تۋرالى ەرەكشە اتاپ ءوتتى.
كاسپي وڭىرىندەگى 2018-2020 جىلدارعا ارنالعان لوگيستيكالىق ينفراقۇرىلىمدى دامىتۋ جوسپارى تۋرالى «قتج» ۇك» اق ۆيتسە-پرەزيدەنتى سانجار ەلۋباەۆ باياندادى.
ونىڭ ايتۋىنشا, 2017 جىلى قازاقستاننىڭ كاسپي مۋلتيمودالدىق تىزبەگى 5,5 ميلليون توننا جۇك وڭدەدى. ونىڭ ىشىندە قۇرعاق جانە پارومدىق جۇكتەر جالپى جۇكتەردىڭ 80% دەيىن جەتكىزىلدى. بۇل كورسەتكىش 2016 جىلى 60% بولاتىن.
2018 جىلى قازاقستان پورتتارى ارقىلى وتكىزۋ جوسپارى ون ميلليون توننادان استام بولسا, ونداعى قۇرعاق جانە پارومدىق جۇكتەر كولەمى 80% ساقتالادى. بۇل مەجەنى 2020 جىلدارى 16,7 ميلليون تونناعا جەتكىزۋ جوسپاردا بار. 2018 جىلى 35 مىڭ جفە كونتەينەر تاسىمالداۋ جوسپارلانسا, 2020 جىلدارى ونى 300 مىڭ جفە-عا جەتكىزۋ كوزدەلىپ وتىر.
2017 جىلى قۇرىق پورتى ارقىلى 1,5 ميلليون توننا ءتۇرلى جۇكتەر وتكىزىلدى. بيىلعى جىلى ونى 4,5 ميلليون تونناعا جەتكىزۋ جوسپارلانىپ وتىر.
پرەمەر-ءمينيستردىڭ ءبىرىنشى ورىنباسارى كاسپي بويىنداعى لوگيستيكالىق ينفراقۇرىلىم نىساندارى ترانسكاسپي كولىك ءدالىزىن دامىتۋداعى نەگىزگى تىزبەك ەكەندىگىنە ءمان بەردى. سونداي-اق, ا.مامين ماڭعىستاۋ وبلىسىنا جۇمىس ساپارى بارىسىندا قۇرىق پورتىنىڭ قىزمەتىمەن, شەكارالىق جانە كەدەن ايماعى ينفراقۇرىلىمىمەن, الەۋمەتتىك نىساندارمەن, سونىمەن قاتار كاۆكاز ءوڭىرى, رەسەي, تۇركياعا اۆتوكولىكتەردى وتكىزۋ ۇدەرىسىمەن تانىستى. اعىمداعى جىلى 20 مىڭ تەحنيكانى پاروم ارقىلى وتكىزۋ جوسپارلانىپ وتىر. بۇل وتكەن جىلدىڭ سايكەس مەرزىمىمەن سالىستىرعاندا ەكى ەسەگە جوعارى كورسەتكىش.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى