ەگەمەن قازاقستان» گازەتىنىڭ 2018 جىلعى 5 اقپانداعى ءنومىرىنىڭ «پارلامەنت» بەتىندە ءماجىلىس دەپۋتاتى, وليمپيادا چەمپيونى سەرىك ساپيەۆتىڭ مادەنيەت جانە سپورت مينيسترىنە جولداعان ساۋالى جاريالانعان ەدى. وندا دەپۋتات قاراعاندىداعى ءاليا مولداعۇلوۆا اتىنداعى وبلىستىق سپورتقا بەيىم بالالارعا ارنالعان مەكتەپ-ينتەرناتتىڭ ماسەلەلەرىن كوتەرگەن. وسى سپورت مەكتەبىن بىتىرگەن تۇلەكتەردىڭ كوبى از قامتىلعان وتباسىلاردان شىققاندىقتان جوو-عا تۇسە المايدى, ال سپورتتىق شەبەرلىكتەرىن كەيىنگى جاستارعا ۇيرەتەيىن دەسە, ديپلومدارى جوق. سوندىقتان سپورتتان ورنىن تابا الماي, باسقا سالالارعا كەتىپ جاتىر. وسى ماسەلەنى شەشۋ ءۇشىن سپورتتىق مەكتەپتى كوللەدجگە اينالدىرۋ كەرەك, سوندا وقۋ ورنىن بىتىرگەن بالالار ءارى قاراي وقىماسا دا سپورتتان قول ۇزبەي جاتتىقتىرۋشى, نۇسقاۋشى سياقتى قىزمەتتەرگە تۇرا الار ەدى. سەرىك ساپيەۆ ءوزىنىڭ ساۋالىندا وسىنداي ماسەلە كوتەرىپ, بۇل ۇسىنىستى ماجىلىستەگى تاعى ءبىر وليمپيادا چەمپيونى ولگا شيشيگينا دا قولداعان.
مىنە, وسى ساۋالعا مادەنيەت جانە سپورت ءمينيسترى ارىستانبەك مۇحامەدي ۇلىنان جۋىردا تومەندەگىدەي جاۋاپ كەلدى:
«مادەنيەت جانە سپورت مينيسترلىگى سىزدەردىڭ ءار وبلىستا مەكتەپ-ينتەرنات-كوللەدج اشۋ تۋرالى ساۋالدارىڭىزدى قاراپ, كەلەسىنى حابارلايدى. پرەمەر-مينيستر ب.ساعىنتاەۆتىڭ 2018 جىلعى 3 قاڭتارداعى وليمپيادا رەزەرۆىنىڭ رەسپۋبليكالىق مامانداندىرىلعان ينتەرنات-كوللەدجدەرىنىڭ ۇلگىسى بويىنشا وبلىستىق سپورتقا دارىندى بالالارعا ارنالعان مەكتەپ-ينتەرناتتاردى قايتا قۇرۋدى ۇيىمداستىرۋ جانە اتىراۋ, قوستاناي, ماڭعىستاۋ وبلىستارىندا, استانا قالاسىندا اتالعان ءبىلىم بەرۋ ۇيىمدارىن اشۋ تۋرالى تاپسىرماسىن ورىنداۋ جانە ورتاڭعى بۋىنداعى جاتتىقتىرۋشىلار كادرلارىن ءتيىمدى پايدالانۋ ماقساتىندا مينيسترلىك 2018 جىلعى 16 قاڭتارداعى بۇيرىعىمەن ولاردى قايتا ۇيىمداستىرۋ جونىندە كوميسسيا قۇردى.
قازىر اقتوبە وبلىسى اكىمدىگىنىڭ ەسەت باتىر اتىنداعى سپورت مەكتەپ-ينتەرناتىن «ەسەت باتىر اتىنداعى وليمپيادا رەزەرۆىنىڭ وبلىستىق مامانداندىرىلعان مەكتەپ-ينتەرنات-كوللەدجى» دەپ وزگەرتۋ تۋرالى قاۋلىسى بەكىتىلدى. بۇگىنگى كۇنى وندا «جاتتىقتىرۋشى – وقىتۋشى» ماماندىعىن دايارلاۋ بويىنشا ءبىر توپ جاساقتالىپ, ستۋدەنتتەر ءبىلىم الىپ جاتىر.
قىزىلوردا وبلىسىندا اكىمدىكتىڭ قاۋلىسىنا سايكەس, ءجالاڭتوس ءباھادۇر اتىنداعى وبلىستىق سپورت مەكتەپ-ينتەرناتىن وليمپيادالىق رەزەرۆتىڭ وبلىستىق مامانداندىرىلعان مەكتەپ-ينتەرنات-كوللەدجى رەتىندە قايتا قۇرۋ جۇمىستارى جۇرگىزىلۋدە. پاۆلودار, اقمولا وبلىستارى مەن الماتى قالاسىندا دا وسىنداي جۇمىستار جۇرگىزىلىپ جاتىر. باتىس قازاقستان مەن سولتۇستىك قازاقستان وبلىستارىندا بۇل جۇمىستار ەندى قولعا الىنۋدا. ال الماتى, شىعىس قازاقستان, جامبىل, قاراعاندى, وڭتۇستىك قازاقستان وبلىستارى بۇل ءىستى الداعى ۋاقىتتا قاراستىراتىندىعىن حابارلايدى» دەلىنگەن جاۋاپتا.
ءسويتىپ, ءا.مولداعۇلوۆا اتىنداعى سپورت مەكتەپ-ينتەرناتى ەندى سپورتتىق كوللەدج بولىپ قايتا قۇرىلىپ, بىتىرگەن تۇلەكتەرىنە ورتا دەڭگەيدەگى مامان كۋالىگىن قوسا تاپسىراتىن بولادى. بۇل الىس اۋدانداردان كەلىپ, وقىپ جاتقان از قامتىلعان وتباسىلار بالالارىنىڭ اۋىلدارىنا بارىپ سپورتتىق نۇسقاۋشى, جاتتىقتىرۋشى بولۋىنا ىڭعايلى جاعداي تۋعىزارى ءسوزسىز. سول يگىلىكتى ىسكە ءماجىلىس دەپۋتاتتارى دا ەلەۋلى ۇلەس قوسقانى كورىنىپ تۇر.
دايىنداعان
جاقسىباي سامرات,
«ەگەمەن قازاقستان»