بريتانيادان كوشكەندەر كوپ

ەلدەگى ۇلتتىق ستاتيستيكا دەپار­تامەنتى ۇلىبريتانياعا جۇمىس ىستەۋ ماقساتىمەن كەلگەن ادامداردىڭ ءالى دە كوپ ەكەنىن ايتىپ وتىر. ماسەلەن 2017 جىلى 220 مىڭ ەۋروپالىق ازامات «تۇماندى البيوندا» تۇرۋعا شەشىم قابىلداعان ەكەن. ايتسە دە برەكسيت باستالعالى بەرى وتانىنا ورالعان ەۋرو­پالىق ازاماتتار جەتەرلىك. بىلتىر ولار­دىڭ سانى 130 مىڭعا جەتكەن. ياعني كوشى-قوننىڭ ايىرماشىلىعى 90 مىڭ ادام­دى قۇراپ وتىر. ۇلىبريتانيادا ميگ­راتسيانىڭ دەڭگەيى بۇرىن-سوڭدى ءجۇز مىڭ­نان تومەن ءتۇسىپ كورمەگەن-تۇعىن.

سونىمەن قاتار انگليانى تاس­تاپ كەتكەن اعىلشىنداردىڭ سانى دا ارت­قان. بىلتىر 125 مىڭعا جۋىق ۇلىبري­تانيالىق ازامات باسقا ەلگە قونىس اۋدارعان ەكەن. وتانىنا قايتا ورالعان اعىلشىندار نەبارى 73 مىڭدى قۇراعان.

«ەو ازاماتتارىنا ۇلىبريتانيادان كەتۋگە برەكسيت اسەر ەتۋى مۇمكىن. الايدا ادامداردىڭ شەشىمى وتە كۇردەلى بولعاندىقتان, وعان سەبەپ كوپ بولۋى ىقتيمال», دەيدى ۇلتتىق ستاتيستيكا دەپارتامەنتىنىڭ وكىلى نيكولا ۋايت Euronews-كە بەرگەن سۇحباتىندا.

يران اقش-قا ەسكەرتۋ جاسادى

يران تاراپى يادرولىق قارۋعا قا­تىستى 2015 جىلعى كەلىسىم ورىندالماسا, ونى يگەرۋىن قايتا قولعا الاتىنىن مالىمدەدى. لوندوندا وتكەن Chatham house كەزدەسۋىندە سىرتقى ىستەر ءمينيسترىنىڭ ورىنباسارى ابباس اراگچي اقش پرەزيدەنتى دونالد ترامپ ۇستانعان ساياسات ءدۇدامال جاعداي تۋىنداتىپ وتىرعانىن ايتتى.

«ەگەر كەلىسىمدى بۇزساق, تاعى ءبىر يادرولىق داعدارىس تۋىنداۋى ىقتيمال. ونى شەشۋ كوپ ۋاقىت الاتىنى انىق. بۇل – الەمدىك دەڭگەيدەگى قاۋىپسىزدىك پەن قاتەر توڭىرەگىندەگى تاڭداۋ. سانكتسيانىڭ الىنىپ تاستالۋىنان يران تاراپى پايدا كورۋى ءتيىس بولاتىن. الايدا بانك­تەر مەن كومپانيالار بىزبەن جۇمىس ىستەمەسە, ونىڭ ەشقانداي تيىمدىلىگى جوق», دەدى ا.اراگچي.

«ەۋروپالىق وداق, الەمدىك نەگىزگى كۇشكە يە التى مەملەكەت جانە يران ارا­سىنداعى ۆەنا كەلىسىمىنە ساي, تەگەران بيلىگى ۋراندى بايىتۋ باعدارلاماسىن توقتاتۋى ءتيىس بولاتىن. بۇۇ باقى­لاۋشىلارى ەلدىڭ وزىنە قويىلعان تالاپتى ورىنداپ وتىرعانىن انىقتادى. ءوز كەزەگىندە يرانعا سالىنعان سانكتسيا الىنىپ, مۇناي مەن گاز ساتۋعا مۇمكىندىك الدى», دەيدى Al Jazeera.

رەسەي بۇۇ قارارىنا ۆەتو قويدى

بۇۇ باس حات­شىسىنىڭ تو­تەنشە جاعدايلار جونىندەگى كومەكشىسى مارك لوكوك سي­ريا­داعى شىعىس گۋتاداعى جاعدايعا الاڭداۋشىلىق ءبىلدىرىپ, ايماقتا وق اتۋدى توقتاتۋ تۋرالى قاۋىپسىزدىك كەڭەسىنە قارار قابىلداۋعا شاقىرعان بولاتىن. الايدا داۋىس بەرۋ كەزىندە رەسەي تاراپى وعان ۆەتو قويدى.

قاۋىپسىزدىك كەڭەسىنىڭ سيريا­ عا قاتىستى كەزەكتەن تىس وتىرىسىندا بايان­­داما جاساعان م.لوكوك سوڭعى تاۋ­لىك­تە 50 تۇرعىن قازا تاۋىپ, 200-گە جۋىعى جارالانعانىن جەتكىزدى. ونىڭ ايتۋىنشا, قورشاۋدا قالعان سيريا حالقىنا گۋمانيتارلىق كومەك كورسەتۋ قيىنداپ كەتكەن. وسىنىڭ سالدارىنان كەيىنگى ءۇش ايدا 22 مىڭ ادامعا عانا قول ۇشىن سوزۋ مۇمكىن بولعان. بىلتىر اي سايىن 175 مىڭعا جۋىق ادام تۇراقتى تۇردە گۋمانيتارلىق كومەك الىپ تۇرعان ەدى.

«رەسەي شىعىس گۋتادا 30 كۇندىك وق اتپاۋ جانە گۋمانيتارلىق كومەك جەت­كىزۋ جونىندەگى قارارىن قابىلداماي تاس­تادى. تاراپتىڭ پايىمداۋىنشا, سيريا استاناسى داماسكىنىڭ ماڭىنداعى بەي­بىت تۇرعىنداردىڭ جاپپاي قىرىلۋى جونىن­دەگى اقپارات شىندىققا جاناسپايدى ەكەن. رەسەي وكىلى ۆاسيلي نەبەنزيا شۆەتسيا مەن كۋۆەيت تاراپىنىڭ اتىس­تى دوعارۋ جونىندەگى ۇسىنىسى مۇمكىن ەمەس­تىگىن مالىمدەدى», دەيدى BBC.

ۆ.نەبەنزيانىڭ سوزىنە قاراعاندا, شىعىس گۋتاداعى باسبۇزارلار قارا­پايىم تۇرعىنداردى كەپىلگە الىپ, قا­رۋلى بەكىنىستەرىن اۋرۋحانالار مەن مەك­­تەپتەرگە ورنالاستىرعان كورىنەدى. سو­نى­مەن قاتار ايماقتاعى قىرعىن تۋرالى مالىمەتتەر اقپاراتتىق سوعىستىڭ كانىگى ءتاسىلى ەكەنىن اتاپ ءوتىپ, وعان سەنە بەرۋگە بولمايتىنىن جەتكىزدى.

شولۋدى ازىرلەگەن

اباي اسانكەلدى ۇلى,

«ەگەمەن قازاقستان»