پارلامەنت سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى داريعا نازارباەۆا سينگاپۋر ۇكىمەتىنىڭ باستاماسى بويىنشا لي كۋان يۋ اتىنداعى الماسۋ باعدارلاماسىنا قاتىسۋ ماقساتىندا سينگاپۋردا بولدى, دەپ حابارلادى قازاقستان رەسپۋبليكاسى پارلامەنتى سەناتىنىڭ ءباسپاسوز قىزمەتى.
سينگاپۋر پرەمەرى لي سيان لۋنمەن كەزدەسۋ بارىسىندا ەكىجاقتى ىنتىماقتاستىقتى دامىتۋدىڭ, ونىڭ ىشىندە «نۇرلى جول» باعدارلاماسى مەن ء«بىر بەلدىك, ءبىر جول» باستاماسىنىڭ ۇيلەسىم تابۋى بويىنشا اۋقىمدى ماسەلەلەرى تالقىلادى.
سەناتور قازاقستاننىڭ بۇۇ قاۋىپسىزدىك كەڭەسىندەگى توراعالىعى تۋرالى پرەمەر ءليدى حاباردار ەتتى. بۇۇ قاۋىپسىزدىك كەڭەسىندەگى العاشقى ءارى باستى شارا قازاقستان پرەزيدەنتى ن.نازارباەۆتىڭ توراعالىق ەتۋىمەن وتكەن «جاپپاي قىرىپ-جويۋ قارۋلارىن تاراتپاۋ: سەنىم شارالارى» اتتى تاقىرىپتىق بريفينگ بولدى. سينگاپۋرعا وڭتۇستىك-شىعىس ازياداعى يادرولىق قارۋسىز ايماق تۋرالى شارتقا قاتىسۋشى مەملەكەتتەر مەن ورتالىق ازياداعى يادرولىق قارۋدان ازات ايماق ەلدەرى اراسىنداعى ىنتىماقتاستىقتى ۇدەتۋگە باعىتتالاتىن كۇن ءتارتىبىن بىرلەسە ىلگەرىلەتۋ ۇسىنىلدى.
قازاقستان سەناتى كوميتەتىنىڭ توراعاسى اسەان ۇيىمىنا سينگاپۋردىڭ توراعالىق ەتۋىمەن لي سيان لۋندى قۇتتىقتادى جانە اسسوتسياتسيا مەن ەۋرازيالىق ەكونوميكالىق وداق اراسىنداعى ىنتىماقتاستىقتى دامىتۋدىڭ الەۋەتىنە نازار اۋداردى.
كورنەكتى ساياساتكەر, قۇرمەتتى اعا مينيستر گو چوك تونگپەن كەزدەسۋ بارىسىندا ساۋدا جانە ءبىلىم بەرۋ سالاسىنداعى ىنتىماقتاستىقتى ورىستەتۋگە باسىمدىق بەرە وتىرىپ, ەكىجاقتى قاتىناستاردىڭ نەگىزگى ماسەلەلەرى تالقىلاندى. سينگاپۋر ساياساتكەرى «قازاقستان سينگاپۋردىڭ ورتالىق ازياداعى ءىرى ساۋدا ارىپتەسى بولىپ تابىلادى», دەدى جانە ء«بىر بەلدەۋ, ءبىر جول» باستاماسىنىڭ زور الەۋەتىنە توقتالا كەلىپ, ونى ىسكە اسىرۋدا ەكى ەلدىڭ دە نەگىزگى ءرول اتقارا الاتىنىن اتاپ ءوتتى.
د.نازارباەۆا پارلامەنت توراعاسى تان چۋان-دجينمەن پارلامەنتتىك بايلانىستاردى نىعايتۋدى تالقىلادى جانە پارلامەنتارالىق ۇنقاتىسۋدىڭ دامىتۋ قارقىنى تۋرالى ايتا كەلىپ, ەكى ەلدىڭ زاڭ شىعارۋ بيلىگى تارماقتارى باسشىلارىنىڭ 2016-2017 جىلدارداعى ءوزارا ساپارلارى پارلامەنتارالىق بايلانىستارعا ەلەۋلى سەرپىن بەرگەنىن اتاپ ءوتتى.
ەكى ەل اراسىنداعى سىرتقى ەكونوميكالىق جانە ەكونوميكالىق بايلانىستاردى دامىتۋ, قاۋىپسىزدىكتى نىعايتۋ جانە قارۋلاردى تاراتپاۋ ماسەلەلەرى سينگاپۋر سىرتقى ىستەر مەكەمەسىنىڭ باسشىسى ۆيۆيان بالاكريشنانمەن اڭگىمەگە ارقاۋ بولدى.
ۆ.بالاكريشنان سينگاپۋردىڭ اسەان ۇيىمىنا توراعالىق ەتۋدەگى باسىمدىقتارى تۋرالى اڭگىمەلەپ بەردى جانە سينگاپۋر مەن ەۋرازيالىق ەكونوميكالىق وداق اراسىنداعى ەركىن ساۋدا ايماعىن قۇرۋ جونىندەگى ماسەلەنى ىلگەرىلەتۋگە قولداۋ بىلدىرگەنى ءۇشىن قازاقستانعا العىسىن جەتكىزە وتىرىپ, «مۇنداي ايماقتى قۇرۋ ەكى ەل اراسىنداعى ساۋدا-ەكونوميكالىق جانە ينۆەستيتسيالىق ىنتىماقتاستىقتى ەلەۋلى تۇردە كۇشەيتە تۇسەدى», دەپ اتاپ ءوتتى.
شاراعا سونىمەن قاتار سەناتتىڭ ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ توراعاسى اسقار بەيسەنباەۆ تا قاتىستى.