«سپورتينگ» – «استانا» كەزدەسۋىنىڭ قارساڭىندا پورتۋگاليالىقتاردىڭ باس باپكەرى جورجي جەزۋش جۋرناليستەرگە سۇحبات بەرىپ, جاۋاپتى ماتچ تۋرالى ءوز پىكىرىمەن ءبولىستى:
- ءبىز ءار ويىنشىعا ءمان بەرىپ, ويىنعا بايلانىستى ءوز تاكتيكامىزدى وزگەرتىپ وتىرامىز. قازاقستانداعى كەزدەسۋدە جەتكەن ناتيجەمىز, بىزگە ەرتەڭگى ويىندا سەنىمدىلىك بەرەدى. ءبىزدىڭ جوعارى ناتيجەگە جەتۋگە مۇمكىندىگىمىز بار. ەرتەڭگى كەزدەسۋدە بىزگە مىندەتتى تۇردە جەڭىس قاجەت دەي المايمىن. نەلىكتەن؟ سەبەبى, ءبىز پورتۋگاليا چەمپيوناتىندا كوشباسشىلار قاتارىندامىز. ەگەر ءبىزدى «پورتۋ» كومانداسىمەن سالىستىراتىن بولساڭىز, ءبىز الدەقايدا سەنىمدى جاعدايدامىز. مەنىڭ ويىمشا ەرتەڭ ەشقانداي ەرەكشە جاعداي ورىن المايدى.
فۋتبولدا ەرەكشە وقيعالاردىڭ بولىپ تۇراتىن انىق. سوڭعى ويىن «سپورتينگتىڭ» مىنەزىن كورسەتتى. ول كەزدەسۋدە ويىنشىلار وزدەرىنىڭ ءبىر ۇجىم ەكەندىگىن دالەلدەي الدى. قازاقستانداعى ناتيجە ءبىزدى قاناعاتتاندىرادى. سوندىقتان, ەرتەڭگى ويىننىڭ ناتيجەسى مەنىڭ فۋتبولشىلارىما بايلانىستى.
- ءسىز ەۋروپا ليگاسىن جەڭىپ الاتىن مۇمكىندىكتەرىڭىز بار ەكەندىگىن ايتتىڭىز. كومانداڭىزدى قانداي ۇجىمدارمەن سالىستىرا الاسىز؟
- شيرەك فينالعا نەمەسە جارتىلاي فينالعا جولداما الۋ كومانداعا سەنىمدىلىك بەرەدى. بۇل ناتيجە «سپورتينگكە» كومەكتەسەدى دەپ ويلايمىن. ءبىزدىڭ قارسىلاستارىمىز مىقتى بولدى. دەگەنمەن, ءبىزدىڭ ماقساتىمىز – جەڭىس. ءدال قازىر ول – ەۋروپا ليگاسى. ۋەفا ەۋروپا ليگاسىندا جەڭىسكە جەتكەن كوماندا چەمپيوندار ليگاسىنىڭ توپتىق كەزەڭىنە تىكەلەي جولداما الاتىنىن ەسكەرسەك, قازىر بىزدە جاۋاپكەرشىلىك وتە جوعارى.
- «استانا» - «سپورتينگ» ارسىنداعى ويىندا سىزدەردىڭ فاۆوريت ەكەندىكتەرىڭىزدى بارلىعى بىلەدى. الايدا, ءسىز استاناداعى ويىن سوڭىندا ستانيمير ستويلوۆتىڭ قولىن المادىڭىز. سوندا ءسىز قارسىلاستى سىيلامايسىز با؟
- بۇل شىندىققا مۇلدەم جاناسپايدى. مەن امانداستىم. ويىن سوڭىندا... ماتچ اياقتالعان سوڭ ءبىز ستانيميرمەن مانۋەل فەرناندەش تۋرالى سويلەستىك.
- استاناداعى كەزدەسۋدە فابيو كوەنتراۋ الاڭداعى ورىن بوساتقاننان كەيىن, كوزىنە جاس الدى. ال ول جاعدايدى بۇكىل الەم كوردى. فابيونى ءار ويىنعا دايىنداۋ سىزگە قانشالىقتى قيىن؟
- مۇمكىن, بۇل جاعداي سىزدەرگە جاڭالىق شىعار. ول الاڭداعى ورنىن ەرتە بوساتقاننان كەيىن, اشۋلى بولدى. بىزگە ويىنشى الماستىرۋ – قالىپتى جاعداي. ول ەرتەڭگى ويىندا الاڭعا شىعىپ قالاتىن شىعار. ونى ەرتەڭ شەشەمىز.
- ءسىزدىڭ باپكەر رەتىندەگى جارقىن ساتتەرىڭىز «بەنفيكا» كومانداسىمەن بايلانىستى. ءسىزدىڭ ول كومانداعا ورالعىڭىز كەلەتىندىگى قانشالىقتا شىندىققا جاناسادى؟
- ارينە, مەن «بەنفيكا» كومانداسىمەن ۇلكەن جەتىستىكتەرگە قول جەتكىزدىم. مەن ول ناتيجەممەن ماقتانا الامىن. مەن «بەنفيكادا» باقىتتى بولدىم جانە 10 بىردەي جۇلدە ۇتتىم. «سپورتينگ» باس باپكەرى رەتىندە, «بەنفيكامەن» جەتكەن جەتىستىگىمدى قايتالاعىم كەلەدى.
ەرمۇحامەد ماۋلەن
«ەگەمەن قازاقستان»