اسەت يسەكەشەۆ تەگىن دارىلەردى جەتكىزۋگە قاتىستى جاعدايدى باقىلاۋدا ۇستاۋدى تاپسىردى

مۇنداي تاپسىرمانى اپپاراتتىق كەڭەستە ەلوردا اكىمى اسەت يسەكەشەۆ بەردى. قالالىق دەنساۋلىق ساقتاۋ باسقارماسىنىڭ باسشىسى قامالجان نادىروۆتىڭ ايتۋىنشا, ءدارى-دارمەككە قاتىستى جاعدايدى باسقارما ۇنەمى ءوز باقىلاۋىندا ۇستايدى. الايدا بىرىڭعاي ديستريبيۋتەر – «سك-فارماتسيا» جشس تاراپىنان ءدارى-دارمەكتەردى جەتكىزۋ بويىنشا كىدىرىستەر ورىن الىپ, بۇگىن ەمحانالاردىڭ ءدارىحانالارىندا بىرقاتار پرەپارات جوق.

تەگىن ءدارى-دارمەكتەردى بەرۋدىڭ اشىقتىعىن قامتاماسىز ەتۋ, سونداي-اق, دارىلىك پرەپاراتتارمەن, مەديتسينالىق ونىمدەرمەن قامتۋ جاعدايىن ۇنەمى مونيتورينگتەن وتكىزۋ ماقساتىندا قالانىڭ بارلىق ەمحانالارىندا اقپاراتتىق جۇيە ورناتىلىپ جاتىر. 

تەگىن مەديتسينالىق كومەكتىڭ كەپىلدەندىرىلگەن كولەمى اياسىندا وتكەن جىلى قالا بويىنشا امبۋلاتورلىق دەڭگەيدە تەگىن دارىلىك پرەپاراتتارمەن 100 مىڭنان استام ادام قامتىلدى. بيىل تەگىن ءدارى-دارمەكپەن 120 مىڭعا تارتا ادام قامتىلادى دەپ جوسپارلانۋدا. 

سونىمەن قاتار, ءدارى-دارمەكتەردىڭ قولجەتىمدىلىگىن ارتتىرۋ ماقساتىندا دەنساۋلىق ساقتاۋ باسقارماسىندا دارىلىك زاتتار مەن مەديتسينالىق ونىمدەردى قالا ەمحانالارىنداعى ءدارىحانالاردا تاپسىرۋ جونىندەگى شەشىم شىعارىلعان بولاتىن. 

كەڭەس قورىتىندىسى بويىنشا قالا اكىمى تەگىن مەديتسينالىق دارىلەردى جەتكىزۋگە قاتىستى كىدىرىستەر «سك – فارماتسيا» جشس كەسىرىنەن ورىن الىپ جاتقاندىعىن ايتتى. الايدا اكىمشىلىك تاراپىنان ءتيىستى باقىلاۋ جۇمىستارى مەن مونيتورينگتەر جۇرگىزىلۋى كەرەك بولاتىن. وسىعان وراي, اسەت يسەكەشەۆ اكىمنىڭ ورىنباسارى ەرمەك امانشاەۆ پەن دەنساۋلىق ساقتاۋ باسقارماسىنىڭ باسشىسى قامالجان نادىروۆقا ەسكەرتۋ جاسادى. سونداي-اق, ول اتالمىش ماسەلەگە قاتىستى جاعدايدى ۇنەمى باقىلاۋدا ۇستاۋدى تاپسىردى.