بىرىككەن ۇلتتار ۇيىمىمەن ءوزارا ءىس-قيمىل تاۋەلسىزدىكتىڭ العاشقى كۇندەرىنەن باستاپ قازاقستاننىڭ سىرتقى ساياساتىنىڭ باسىم باعىتى بولىپ تابىلادى. بۇل تۋرالى سىرتقى ىستەر ءمينيسترى قايرات ءابدىراحمانوۆ الماتىدا وتكەن «قازاقستان-بۇۇ: تاجىريبە, جەتىستىكتەر مەن ىنتىماقتاستىقتىڭ كەلەشەگى» اتتى جوعارى دەڭگەيدەگى جينالىس بارىسىندا سويلەگەن سوزىندە ايتتى. ءىس-شارا بۇۇ-نىڭ قازاقستانداعى العاشقى كەڭسەسى اشىلۋىنىڭ 25 جىلدىعىنا ارنالدى.
ق.ءابدىراحمانوۆ ءوز سوزىندە قازاقستان پرەزيدەنتى نۇرسۇلتان نازارباەۆتىڭ نەگىزگى حالىقارالىق باستامالارى ءدال وسى بۇۇ-نىڭ تريبۋناسىنان ۇسىنىلعانىن اتاپ ءوتتى. جاھاندىق ۇيىم مەملەكەت باسشىسىنىڭ كەڭ اۋقىمدى يادروعا قارسى جانە سوعىسقا قارسى باستامالارىن ناسيحاتتاۋدىڭ باستى الاڭى.
«بۇۇ ۇيىمدارى مەن باعدارلامالارى قازاقستاننىڭ الەۋمەتتىك-ەكونوميكالىق دامۋىنا ەلەۋلى ۇلەس قوسىپ,بۇل ءداستۇردى جالعاستىرۋدا. سونىمەن بىرگە, بۇۇ ءبىزدىڭ ەلىمىزگە بۇرىنعى سەمەي يادرولىق پوليگونىن ساۋىقتىرۋ, ارال تەڭىزىن قالپىنا كەلتىرۋ سەكىلدى ماڭىزدى جوبالار اياسىندا تەحنيكالىق جانە قارجىلىق كومەك كورسەتتى», دەدى ءوز سوزىندە ق.ءابدىراحمانوۆ.
سىرتقى ىستەر ءمينيسترى قازاقستان مەن بۇۇ گەندەرلىك تەڭدىكتى ىلگەرىلەتۋ, بالالاردىڭ قۇقىقتارىن قورعاۋ, دەنساۋلىق ساقتاۋ, ەكولوگيا, كوشى-قون, ەسىرتكى تاسىمالىنا قارسى كۇرەس جانە باسقا دا سالالاردا بىرلەسىپ, بەلسەندى جۇمىس اتقارىپ جاتقاندىعىن اتاپ ءوتتى.
ق.ءابدىراحمانوۆ ەڭ بەدەلدى ورگان – بۇۇ قاۋىپسىزدىك كەڭەسىندەگى قازاقستاننىڭ جۋىرداعى توراعالىعىناەرەكشە نازار اۋداردى. توراعالىق اياسىندا پرەزيدەنت ن. نازارباەۆتىڭ بىتىمگەرلىك باستامالارىنا جانە ورتالىق ازيادا بەيبىتشىلىك, قاۋىپسىزدىك پەن دامۋ ايماعىن قۇرۋ بويىنشا شارالارىنا ەكپىن قويىلدى.
سونىمەن قاتار, كەزدەسۋ بارىسىندا الماتى قالاسىندا2030 جىلعا دەيىن ورتالىق ازيادا تۇراقتى دامۋدىڭ ماقساتتارىن جۇزەگە اسىرۋعا جاردەمدەسۋگە باعىتتالعان بۇۇ حابىن قۇرۋ جونىندەگى قازاقستاننىڭ يدەياسىنا بۇۇ تاراپىنان قولداۋ بىلدىرىلەتىنى اتاپ ءوتىلدى.
ەلدەگى جانە ايماقتاعى بۇۇ قىزمەتى تۋرالى پىكىر الماسۋ قاتىسۋشىلارعا ۇيىمنىڭ كوپ قىرلى جۇمىسىن جۇيەلەۋگە جانە وتىرىستا ماقۇلدانعان2018-2020 جىلدارعا ارنالعان قازاقستان-بۇۇ بىرلەسكەن ءىس-قيمىلدار جوسپارى اياسىندا ءوزارا ارەكەتتەسۋدىڭ كەلەشەگىن ايقىنداۋعا مۇمكىندىك بەردى.
سونىمەن قاتار, مەرەيتويلىق ءىس-شاراعا الماتى قالاسىنىڭ اكىمى باۋىرجان بايبەك, قازاقستانداعى بۇۇ اگەنتتىكتەرىنىڭ باسشىلارى, ديپكورپۋستىڭ وكىلدەرى, ديپلوماتيالىق قىزمەت ارداگەرلەرى, اكادەميالىق جانە ساراپشىلىق قاۋىمداستىقتاردىڭ وكىلدەرى قاتىستى. ءسىم باسشىسى مەن الماتى اكىمى بۇۇ كەڭسەسى وسىدان 25 جىل بۇرىن ەلىمىزدە ءوز جۇمىسىن باستاعان «قازاقستان» قوناق ۇيىندە ەستەلىك تاقتايدى اشتى.