قىسقى وليمپيادا: ءۇمىت وتى سونەر ەمەس

پولتورانيننەن جۇلدە كۇتەمىز

الماتىداعى «كومپليت-سەر­ۆيس» حالىقارالىق تۋريستىك كوم­پانياسىنىڭ پرەزيدەنتى ءابىل­حان سارسەنباەۆپەن, ونىڭ مەنەدجەرلەرى اسقار, ەرا­لى, ابزالمەن كۇن سايىن دەر­لىك كەزدەسىپ قالامىز. ولار قازاق­ستان­دىق جانكۇيەرلەردىڭ ءبىرى كەلىپ, كەلەسىلەرى اتتانىپ جات­قانىن, ولاردىڭ ورنىن باسقان تۋريس­تەردىڭ پحەنچحان مەن كاننىنداعى قوناقۇيلەرگە ورنالاسىپ جات­قا­نىن, وليمپياداعا ەكى جۇزگە تار­تا ءتۋريستىڭ كەلگەنىن تىلگە تيەك ەتتى. ءتىپتى كۇنى كەشە اتاقتى شاڭعىشىمىز ۆلاديمير سميرنوۆ قوناق رەتىندە وليمپيادا قالا­شىعىنا كەلىپ, قازاقستاندىق ساڭلاقتارمەن كەزدەسىپ, ولارعا ساتتىلىك تىلەدى. ليللەحاممەر وليمپياداسىنىڭ قاھارمانى ۆ.سميرنوۆ ءىزباسارى الەكسەي پولتورانينگە ىستىق ىقىلاسىن ءبىلدىرىپ, قازاقستاندىقتاردىڭ وزىنەن تەك جەڭىس كۇتەتىنىن ايتتى.

جانكۇيەرلەردىڭ ەسىنە سالا كەتەيىك, 24 اقپاندا اس­تا­نا ۋاقىتىمەن 11.00-دە 50 شاقى­رىم­دىق مارافون باستالىپ, ول تەلەارنالاردان كورسەتىلەدى. كلاسسيكالىق ادىسپەن جۇگىرۋدىڭ مايتالمانى الەكسەيدىڭ باعى قاشانعى بايلانا بەرمەك, ءوزىنىڭ ءتورتىنشى وليمپياداسىندا نامىستى جانىپ, ەلىمىزدىڭ كوك تۋىن جەلبىرەتەدى دەگەن ۇمىتتەمىز. مارافوندا الەكسەيدىڭ باستى قار­سىلاسى فين شاڭعىشىسى يۆو نيسكانەن عانا بولادى دەپ بول­جانىپ وتىر, قوس ساڭلاقتىڭ جەڭىس كوەففيتسيەنتى 4-كە تەڭ.

سونىمەن 16 جانە 17 اق­پاندا جەرلەستەرىمىز قالاي ونەر كورسەتتى؟ تۋراسىن ايتايىق, كوڭىل كونشىتپەيدى. دەنيس تەن تۋرالى ايتتىق, 27-ورىنمەن جارىستان شىعىپ قالدى. تاۋ شاڭعىشىسى ماريا گريگوروۆا سلالومدا ونەر كورسەتىپ, بىرىنشىسىندە 54-ءشى, ال ەكىنشى جۇگىرىسىندە 54-ورىندى يەلەندى. ال جاسى كەلىپ قالعان يگور زاكۋرداەۆتان مەدال كۇتۋدىڭ ءوزى كۇلكىلى, سۋپەرگيگانتتا نەبارى 41-ورىندى قاناعات تۇتتى. 15 شاقىرىمدىق ەركىن ادىسپەن جۇگىرۋدە شاڭعىشىلارىمىز ۆيتالي پۋحكالو, ەۆگەني ۆەليچكو, دەنيس ۆولوتكا 54, 61, 64-ءشى ورىندارعا سىرعىدى. شاڭعىمەن تۇعىردان سەكىرۋشى سەرگەي تكاچەنكو دا ىرىكتەۋدەن وتكەنىمەن, ودان كەيىن جاقسى ناتيجە كورسەتە المادى.

سەنبىدە, ياعني 17 اقپاندا دا قازاقستاندىقتارعا ساتتىلىك سەرىك بولمادى. بۇل كۇنى جەرلەستەرىمىز سپورتتىڭ ءۇش ءتۇرى بويىنشا ونەر كورسەتتى. شورت-ترەكتەن 1500 مەترلىك قاشىقتىقتا سىنعا تۇسكەن اناستاسيا كرەستوۆا پەنالتي الىپ, جارىستان شىعىپ قالسا, وڭتۇستىك كورەيادان اتتاي قالاپ شاقىرىپ العان كيم يونگ ا ءتورتىنشى كەلىپ, جارتىلاي فينالعا وتە المادى. فريس­تايلدىڭ اكروباتيكا تۇرىنەن باق سىناعان يلدار بادرۋتدينوۆ تا جارىستى ەرتە اياقتادى. ال كەشە الەكسەي پولتورانين باستاعان شاڭعىشىلار ۆيتالي پۋحكالو, ەۆگەني ۆەليچكو جانە دەنيس ۆولوتكوي ەستافەتالىق جارىستا سەگىزىنشى ورىن الدى. باسەكەنى پولتورانين جاقسى باستاپ بەردى. ءوزىنىڭ اينالىمىندا مارەگە ءبىرىنشى كەلگەنىمەن, ونىڭ جەڭىستى جولىن قۇراماداعى ارىپتەستەرى جالعاي المادى. ءسويتىپ ءبىزدىڭ سپورتشىلار ەستافەتا جەڭىمپازى اتانعان نورۆەگيا قۇراماسىنان 3 جارىم مينۋت ارتتا قالىپ قويدى.

موڭعوليا ازاماتتارى – بىزگە جانكۇيەر

وليمپيا ويىندارى كە­زىندە جەرلەستەرىمىزگە جان­كۇيەر بولعان موڭعوليا ازا­مات­تارىن دا كەزدەستىردىك. سو­نىڭ ءبىرى – موڭعولياداعى تاۋ-كەن اسسو­تسياتسياسىنىڭ پرەزيدەنتى دامبا مىرزا. كەزىندە رەسەيدە ءبىلىم العان, قازاقستاندىق ارىپتەستەرىمەن قارىم-قاتىناستاعى ازامات جۇبايى باتجارعال, جيەنى مويح ەر­دەنەمەن بىرگە گالىشەۆا قولا مەدال العان كۇنى بىزبەن بىرگە تىلەۋلەس بولدى. شىن ىقى­لا­سىمەن قۇتتىقتاعان دامبا مىرزا:

– بىزدە قىسقى سپورت دامي باس­تادى. ازيا ويىندارى مەن حا­لىقارالىق جارىستاردا توپ جار­ماساق تا, تاجىريبە جيناپ جا­تىرمىز. وسى جولى وليمپيا­داعا ەكى سپورتشى كەلدى. موڭ­عو­ليانىڭ تۋىن الىپ شىققانىن كور­گەن شىعارسىزدار. قازاقستان­نىڭ جەتىستىگىنە ءبىز دە قۋانامىز. ەكى ەل اراسىندا ەكونوميكالىق ساۋدا-ساتتىق وركەندەپ كەلەدى. پرە­زيدەنتىمىز سپورتتى ەرەكشە جاقسى كورەدى, سامبو كۇرەسىنەن الەم چەمپيونى اتانعان. قازاقستانعا دەگەن ىستىق ىقىلاسى دا ايتارلىقتاي. ەل باسقارۋعا كەلگەن وتكەن جىلى قازاق ازاماتتارىنا سەنىم ءبىلدىرىپ, لاۋازىمدى قىزمەتتەرگە تاعايىندادى, – دەدى.

وڭداسىن ەلۋباي,

جۋرناليست, ارنايى «ەگەمەن قازاقستان» ءۇشىن

پحەنچحاننان (وڭتۇستىك كورەيا)