قازاقستان رەسپۋبليكاسىنىڭ نيدەرلاند كورولدىگىندەگى ەلشىلىگىندە ەلىمىزدىڭ بۇۇ قاۋىپسىزدىك كەڭەسىندەگى توراعالىعىنىڭ اياقتالۋىنا وراي دوڭگەلەك ۇستەل ءوتتى.
ءىس-شاراعا نيدەرلاند سىرتقى ىستەر مينيسترلىگىنىڭ بۇۇ قاۋىپسىزدىك كەڭەسىنىڭ ماسەلەلەرى بويىنشا ارنايى توبىنىڭ ۇيلەستىرۋشىسى روبەرت درەسەن, بۇۇ قاۋىپسىزدىك كەڭەسىنىڭ تۇراقتى ەمەس مۇشە ەلدەرىنىڭ ەلشىلەرى, «كلينگەندايل» جەتەكشى تالداۋ ورتالىعىنىڭ ساراپشىلارى جانە باسقا دا نيدەرلاندتىق اكادەميالىق توپتاردىڭ بەلگىلى وكىلدەرى قاتىستى.
ءوز سوزىندە قازاقستان ەلشىسى ماعجان ءىلياسوۆ قازاقستان توراعالىعىنىڭ شەڭبەرىندە كەڭەستەر, بريفينگتەر جانە پىكىرتالاستار ۇلگىسىندە وتىزعا جۋىق وتىرىستار وتكىزىلىپ, ولاردىڭ قورىتىندىلارى بويىنشا كەڭەس توراعاسىنىڭ قارارلارى جانە مالىمدەمەلەرى قابىلدانعانىن اتاپ ءوتتى. قازاقستان ديپلوماتى پرەزيدەنت نۇرسۇلتان نازارباەۆتىڭ 18 قاڭتارداعى ساياسي ۇندەۋىنىڭ نەگىزگى باعىتتارىنا ەرەكشە نازار اۋدارىپ, ولاردىڭ ىشىندە قازاقستاننىڭ بۇۇ قاۋىپسىزدىك كەڭەسىندەگى جۇمىسىنىڭ باسىمدىقتارى مەن تاجىريبەلىك كومپونەنتتەرى كوزدەلگەنى تۋرالى ايتتى.
سونىمەن قاتار قازاقستاننىڭ الەمدىك تەرروريزمگە جول بەرمەۋ تۋرالى مىنەز-ق ۇلىق كودەكسى جوباسىن ىسكە قوسۋ بويىنشا جوعارى دەڭگەيدەگى ارنايى ءىس-شارا وتكىزگەنى تۋرالى اتاپ ايتىلدى. بۇۇ-نىڭ ونىڭ ىشىندە تەرروريزمگە قارسى قۇرىلىمداردىڭ باسشىلىعى, مۇشە مەملەكەتتەردىڭ جۇزدەن استام دەلەگاتسيالارىنىڭ وكىلدەرى اتالعان كودەكستىڭ وزەكتىلىگى مەن ماڭىزدىلىعىن قولدادى.
ءوز كەزەگىندە دوڭگەلەك ۇستەلگە قاتىسۋشىلار قازاقستاننىڭ بۇۇ قاۋىپسىزدىك كەڭەسىنىڭ توراعاسى رەتىندەگى جەتىستىكتەرىن جوعارى باعالاپ, اۋعانستانداعى جاعدايدى تۇراقتاندىرۋعا باعىتتالعان ءبىزدىڭ ەلىمىزدىڭ پراكتيكالىق كۇش-جىگەرىن اتاپ ءوتتى.
19 قاڭتاردا وتكەن مينيسترلىك پىكىرتالاستاردىڭ قارساڭىندا بۇۇ قاۋىپسىزدىك كەڭەسى مۇشەلەرىنىڭ اۋعانستانعا جەتى جىلدىڭ ىشىندە ۇيىمداستىرىلعان العاشقى ساپارى بۇل ەلدىڭ ىشكى جانە اينالاسىنداعى تۇراقتىلىق پەن وركەندەۋدى قولداۋ ءۇشىن شەشۋشى ماڭىزعا يە بولعانى اتاپ ايتىلدى. سونىمەن بىرگە قازاقستان جانە پرەزيدەنت ن.نازارباەۆتىڭ جاپپاي قىرىپ-جوياتىن قارۋدى تاراتپاۋ ىسىنە قوسقان ەلەۋلى ۇلەسى ەرەكشە اتاپ ءوتىلدى. كەزدەسۋ بارىسىندا بۇۇ قاۋىپسىزدىك كەڭەسى تۇراقتى ەمەس مۇشەلەرىنىڭ 2018-2019 جىلدارعا ارنالعان كۇن ءتارتىبى بويىنشا جان-جاقتى پىكىر الماسۋ بولدى.
كەزدەسۋدى قورىتىندىلاي كەلە, روبەرت درەسەن: «قازاقستاننىڭ قاۋىپسىزدىك كەڭەسىنىڭ توراعالىعى الەمدىك قاۋىمداستىققا ەڭ وزەكتى ماسەلەلەردى شەشۋگە سىندارلى كوزقاراسپەن قارايتىنىن كورسەتتى. اتاپ ايتقاندا, بۇل ءوز كەزەگىندە اۋعانستانداعى قاۋىپسىزدىكتى نىعايتۋ ءۇشىن ماڭىزدى وڭىرلىك ەكونوميكالىق جوبالاردى, ونىڭ ىشىندە ينفراقۇرىلىمدى دامىتۋ, ەلەكتر ەنەرگيامەن جابدىقتاۋ, ساۋدا-ساتتىق پەن ترانزيت قىزمەتتەرىن قەڭەيتۋ جوبالارىن ىسكە اسىرۋعا جول اشادى», دەپ مالىمدەدى.
«ەگەمەن-اقپارات»