الاش قوزعالىسى جانە عۇمار قاراش

«جارىق جولعا باستاۋشىعا ەرەمىز بە,

اق جۇرەكتى شىن ەرلەرگە سەنەمىز بە؟

تازا قاندى, كىرسىز جاندى قازاق جۇرتى

ءوز الدىنا ەل بولعانىن كورە­مىز بە؟» –

دەپ وتكەن الاش­تىڭ اسىل تۇلعاسى عۇمار قاراشتىڭ قىسقا عۇمىرىندا جاساپ كەتكەن ىستەرى كوپ-اق. جالپى, جانى­بەك ءوڭىرى عۇمار­تانۋ ىسىندە ءبىراز شارا اتقارىپ ۇلگەرگەن. اقىن ءارى اعارتۋشى شى­عار­ماشى­لىعى مەن ءومىرىن زەرت­تەۋ, ناسيحات­تاۋ باعىتىندا جۇيەلى جۇمىس جۇرگىزىلۋدە. 1992 جىلى اقىن­نىڭ كىندىك قانى تامعان بورسى اۋىلىنداعى ورتا مەكتەپكە عۇمار قاراش ەسىمى بەرىلسە, 2006 جىلى جانىبەك اۋىلىنداعى ورتالىق كو­شەنىڭ ءبىرى عۇمار قاراش اتىنداعى كوشە دەپ اتالدى. سول جىلى جانى­بەك اۋىلىنداعى ورتالىق الاڭعا ءبىرتۋار ازاماتتىڭ كەۋدە ءمۇسىنى ورناتىلدى. بورسى اۋىلىندا 2000 جىلى تۋعانىنا 125 جىل تولۋىنا وراي «عۇمار قاراش – عۇلاما دارىن» اتتى عىلىمي-تاجىريبەلىك كونفەرەنتسيا وتكىزىلسە, 2016 جىلدان ايماقتىق «عۇمار قاراش وقۋلارى» شىعارماشىلىق باي­قاۋى ۇيىمداستىرىلا باستادى. 2017 جىلى ماۋسىم ايىندا بورسى اۋىلىندا عۇمار بابامىزدىڭ ءومىرى مەن شىعارماشىلىعىنا ارنال­عان «قاراڭعىلىقتىڭ تۇنە­گىن تۇر­گەن شامشىراق» اتتى اۋدان­دىق عىلىمي-تاجىريبەلىك كونفەرەنتسيا ءوتتى.

ەسىمى 1990 جىلداردان بەرى عانا اشىق ايتىلىپ, ءالى كۇن­گە دەيىن باسىنا قاراپايىم قورشاۋ­دان باسقا ەشتەڭە ورناتىلماعان ارىستىڭ باسىنا ساۋلەتتى كەسەنە تۇرعىزىلاتىن بولدى. جانى­بەك اۋدانىنىڭ اكىمى ازامات سافيماليەۆتىڭ ايتۋىنا قاراعان­دا, كەسەنە قارجىسىن اۋدان تۇر­عىن­دارى, شارۋا قوجالىعىنىڭ جەتەك­­­شىلەرى, كاسىپكەرلەر كوتەرىپ الماق.

كونفەرەنتسيا جۇمىسىنا با­تىس قازاقستان يننوۆاتسيالىق-تەحنو­لوگيالىق ۋنيۆەرسيتەتىنىڭ پروفەسسورى, تاريح عىلىمدارىنىڭ كان­­­ديداتى, ج.دوسمۇحامەدوۆ اتىن­­داعى «قايراتكەر» قوعامدىق قورى­­نىڭ پرەزيدەنتى, الاشتانۋشى دا­مەتكەن سۇلەيمەنوۆا, «عۇمار قاراش. قوعامدىق-ساياسي قىزمەتى» اتتى مونوگرافيانىڭ اۆتورى, باتىس قازاقستان يننوۆاتسيالىق-تەحنولوگيالىق ۋنيۆەرسيتەتىنىڭ دوتسەنتى, تاريح عىلىمدارىنىڭ كانديداتى, عۇمارتانۋشى باقتىلى بورانباەۆا, باتىس قازاقستان يننوۆاتسيالىق-تەحنولوگيالىق ۋنيۆەرسيتەتىنىڭ پروفەسسورى, تاريح عىلىمدارىنىڭ كانديداتى سامات قۇرمانالين, ما­حام­بەت وتەمىسوۆ اتىنداعى با­تىس قازاقستان مەملەكەتتىك ۋني­ۆەرسيتەتى «قازاقستان تاريحى جانە ولكەتانۋ» عىلىمي ورتا­لى­عىنىڭ جەتەكشىسى, دوتسەنت, تاريح عىلىمدارىنىڭ كانديداتى, وبلىستىق رۋحاني جاڭعىرۋ سا­راپ­شىلار كوميسسياسىنىڭ مۇ­شەسى جاڭابەك جاقسىعاليەۆ, تاعى باسقا عالىمدار مەن زەرتتەۋ­شىلەر قاتىسىپ, اقىن ءومىرى مەن شىعارماشىلىعى, تاريحي قىزمەتى تۋرالى ويلارىن ورتاعا سالدى.

كونفەرەنتسيا كەزىندە « ۇلى­سىن ۇلىقتاعان عۇمار ەلى» اتتى جيناقتىڭ تۇساۋى كەسىلدى. مۇندا جەرگىلىكتى اقىنداردىڭ عۇمارعا ارناعان جىرلارى مەن ع.قاراش شىعارماشىلىعىنا ارنالعان عىلىمي كونفەرەنتسيا ماتەريالدارى توپتاستىرىلعان.

قازبەك قۇتتىمۇرات ۇلى,

«ەگەمەن قازاقستان»

باتىس قازاقستان وبلىسى