ماڭعىستاۋدا شەنەۋنىكتەردىڭ ءتارتىپ ماسەلەسى تالقىلاندى

كۇن  تارتىبىندە بارلىعى 4 ماسەلە قارالىپ, كەڭەس وتىرىسىنىڭ ناتيجەسىندە ءتيىستى شەشىمدەر قابىلداندى جانە 2017 جىلدىڭ قورىتىندىسى بويىنشا ماڭعىستاۋ وبلىسىنداعى جەرگىلىكتى جانە ورتالىق اتقارۋشى ورگاندارىنىڭ اۋماقتىق بولىمشەلەرىندەگى تارتىپتىك كوميسسيالارىنىڭ جۇمىسىنا جۇرگىزىلگەن تالداۋ قورىتىندىسىنداعى ماسەلەلەر تالقىلاندى.

ج.سۋلتانكۋلوۆتىڭ تۇرعىن ءۇيىن جەكەشەلەندىرۋ ماسەلەسى بويىنشا جۇمىسشى ورگانى مەن تۇرعىن ءۇي كوميسسياسى تاراپىنان 2 اي بويى اتالعان تۇلعانى اۋرە سارساڭ سالىپ, ونىڭ زاڭدى مۇددەسىن بۇزىپ, تەك ونىڭ بىرنەشە رەت شاعىمدانۋىنان كەيىن عانا ءتيىستى شەشىم قابىلداۋ ارقىلى زاڭبۇزۋشىلىققا جول بەرگەن ءۇشىن جاڭاوزەن قالالىق تۇرعىن-ءۇي كوميسسياسىنىڭ مۇشەلەرى س.ساعىنباەۆقا, ب.وۆەزوۆكە جانە ك.كاريباەۆقا ادەپ كودەكسىنىڭ تالابىنا سايكەس «ەسكەرتۋ» تۇرىندە تارتىپتىك جازا قولدانۋدى ۇسىنىلدى. باسقا كوميسسيا مۇشەلەرىنىڭ تارتىپتىك جاۋاپكەرشىلىكتەرى ولاردىڭ قىزمەتىنە كىرىسكەننەن كەيىن قارالاتىن بولادى.

كەلەسى ءىس جاڭاوزەن قالالىق ءبىلىم ءبولىمىنىڭ باسشىسى ت.جۋماليەۆ پەن ونىڭ ورىنباسارى و.تابىنچاەۆقا قاتىستى قارالدى.

اتالعان لاۋازىمدى تۇلعالارعا قاتىستى ورىن العان زاڭبۇزۋشىلىقتار ولاردىڭ جاڭا جىل مەرەكەسىنە وراي وتكىزىلەتىن مەرەكەلىك شارالاردى تەك مەكتەپ قابىرعاسىندا وتكىزىۋ قاجەتتىگى تۋرالى 11.12.2017 جىلعى №01-24/1840 ەسكەرتپە حاتى نەگىز بولعان.

ادەپ  جونىندەگى  كەڭەس  مۇشەلەرى تارتىپتىك ءىس قۇجاتتارىن زەردەلەپ, ءبىلىم سالاسىنداعى ۋاكىلەتتى ورگان باسشىسىنىڭ پىكىرىن تىڭداي كەلە, اتالعان ەسكەرتپە حات وقۋشىلاردىڭ قۇقىقتارىن قورعاۋ ماقساتىندا تەك ءبىلىم بەرۋ ۇيىمدارىنىڭ قاراۋىنا جولدانعانى جانە وندا كاسىپكەرلەردىڭ قۇقىقتارىنا كەدەرگى كەلتىرەتىن نەگىز جوق دەپ تاپتى.  ت.جۋماليەۆ پەن و.تابىنچاەۆتىڭ تاراپىنان مەملەكەتتىك قىزمەتكە كىر كەلتىرەتىن تارتىپتىك تەرىس قىلىققا جول بەرىلمەگەن دەپ تاۋىپ, ولارعا قاتىستى تارتىپتىك ىستەردىڭ ءوندىرىسىن قىسقارتۋ تۋرالى شەشىم قابىلدادى.

بۇدان كەيىن, جەرگىلىكتى ينتەرنەت سايتتارىنا مونيتورينگ جۇرگىزۋ بارىسىندا تولەپ اۋىلىنىڭ اكىمى ك.يزجانوۆتىڭ تاراپىنان باسقا تۇلعانى ۇرىپ-سوققاندىعى جانە جابىرلەنۋشىگە دەنە جاراقاتىن كەلتىرگەندىگى جونىندە سىني ماقالا نەگىزىندە قوزعالعان تارتىپتىك ءىس قارالدى.

ءماجىلىس بارىسىندا اكىم ك.يزجانوۆتى تارتىپتىك جازاعا تارتۋعا دالەلدەر جەتكىلىكسىز بولۋىنا بايلانىستى وعان قاتىستى تارتىپتىك ءىستى توقتاتۋعا جانە ونىڭ ءوتىنىشى نەگىزىندە جۇرگىزىلىپ جاتقان قىلمىستىق ءىس بويىنشا اكىمگە قاتىستى جاڭا ءمان-جايلار انىقتالعان جاعدايدا تارتىپتىك ءىستى قايتا قاراۋ جونىندە ۇسىنىم ەتتى.

كەڭەس سوڭىندا تارتىپتىك كوميسسيالارىنىڭ جۇمىسىنا جۇرگىزىلگەن تالداۋ ناتيجەسىندە الداعى ۋاقىتتا ورىندالۋى ءتيىس بىرقاتار جۇمىستار مەن اتقارىلاتىن شارالار جونىندە ۇسىنىستار قابىلداندى.

  گۇلايىم شىنتەمىرقىزى

 «ەگەمەن قازاقستان».

 ماڭعىستاۋ وبلىسى