«قازترانسگاز ايماق» اق اتىراۋ وندىرىستىك فيليالىنىڭ قىزمەتىن وبلىس حالقىنىڭ 96 پايىزى پايدالانادى. وڭىرلىك باعدارلاما اياسىندا ازعىر ايماعى مەن كەيبىر گازبەن قامتۋ كوزدەرىنەن شالعاي جاتقان اۋىلداردان باسقا جەرلەر تولىعىمەن گازداندىرىلدى. قۇرمانعازى اۋدانىنداعى ازعىر سەلوسىنا گاز تارتۋ بويىنشا جوبالاۋ-سمەتالىق قۇجاتتار اياقتالىپ, مونتاجداۋ جۇمىستارى باستالدى.
بۇل باعىتتا بىرقاتار جۇمىستار اتقارىلىپ جاتىر. ايتالىق ديسپەتچەرلىك جۇيە قوندىرۋ جوباسى ىسكە قوسىلىپ, 9 اۆتوماتتىق گاز تاراتۋشى ستانساسىندا جانە 17 گاز تاراتۋ پۋنكتىندە اۆتوماتتى جۇيەنى ديسپەتچەرلىك باسقارۋ ورناتىلدى. سول ارقىلى وبلىستاعى اۋداندار مەن وندىرىستىك كاسىپورىنداردى قوسقاندا 114 ەلدى مەكەندى گازبەن ءۇزىلىسسىز قامتاماسىز ەتۋگە مۇمكىندىك تۋدى. وسىنداي شارالاردىڭ ناتيجەسىندە اپاتتار سانى ازايىپ كەلەدى. 2016 جىلى 74 اپات تىركەلسە, وتكەن جىلى بۇل كورسەتكىش 18-گە كەمىگەن.
– اتىراۋ وندىرىستىك فيليالى جانە «رتسكۋ-اتىراۋ» جشس اراسىنداعى كەلىسىم نەگىزىندە تۇرمىستىق گاز قۇرىلعىلارى مەن جابدىقتاردى الدىن الا تەكسەرۋ جۇمىستارى جۇزەگە اسىرىلادى, الايدا تۇرمىستا گاز پايدالانۋ كەزىندە ۋلانۋ جاعدايلارى تىركەلۋدە, – دەيدى فيليال ديرەكتورى ماقسوت ءابۋوۆ.
جىل باسىندا يساتاي جانە قىزىلقوعا اۋداندارىنىڭ تۇرعىن ءۇي سەكتورلارىندا گازبەن ۋلانۋ بويىنشا 3 وقيعا تىركەلىپ, ونىڭ ەكەۋى ادام ولىمىنە اكەلدى.
اتىراۋ وبلىسى بويىنشا «سەرۆيس ايماق گاز» جشس, «باتىس گاز ايماق» جشس, «ايماق گاز قۇرىلىس» جشس, «ايماق گاز ينۆەست» جشس سەكىلدى باسقا دا ءتۇتىن شىعۋ مۇرجاسى مەن جەلدەتكىش كانالداردى تەكسەرۋ قىزمەتىن كورسەتەتىن بىرنەشە كاسىپورىن جۇمىس ىستەيدى.
– بىراق ولاردىڭ گاز جابدىقتارىنا تەحنيكالىق قىزمەت كورسەتۋ كۋالىكتەرى جوق جانە قىزمەتتەرى «قازترانسگاز ايماق» اق اتىراۋ وندىرىستىك فيليالىنا بايلانىستى ەمەس, – دەيدى م.ءابۋوۆ.
گازدى پايدالانىپ الىپ, ءتيىستى اقىلارىن تولەمەي وتىرعاندار دا بار. بۇگىنگە دەيىن وڭىرلىك فيليالعا تۇتىنۋشىلاردىڭ قارىزى 137 ملن تەڭگەدەن اسقان. ونىڭ 46 ملن تەڭگەسى بيۋدجەتتىك مەكەمەلەرگە تيەسىلى.
باقىتگۇل باباش,
«ەگەمەن قازاقستان»
اتىراۋ