جاھان جۇرتشىلىعى اسىعا كۇتكەن فۋتبولدان الەم چەمپيوناتى بيىل رەسەيدە وتەتىنى كوپشىلىككە بەلگىلى. وسىعان وراي, الەمدىك تەڭبىل دوپ باسەكەسىنىڭ باستى جۇلدەسى, سالماعى 6 كگ تارتاتىن التىن كۋبوك الماتىعا كەلدى. ەستەرىڭىزدە بولسا, العاش رەت الەم كۋبوگى الماتىعا 2010 جىلى كەلگەن بولاتىن. قازاقستان وسى تروفەيدى ەكىنشى رەت قابىلداعان ورتالىق ازياداعى العاشقى مەملەكەت اتانىپ وتىر.
الەم چەمپيوناتتارىنىڭ الدىندا وتكىزىلەتىن ءداستۇرلى تۋر 9 قىركۇيەك كۇنى ماسكەۋدەگى «لۋجنيكي» ستاديونىندا باستالعان. باستى تروفەيدى اۋەجايدان كۇتىپ العان الماتىلىقتار, ارتىنشا وسى تاريحي ءساتتىڭ قۇرمەتىنە وراي قالاداعى «مەگا» ورتالىعىندا باس قوستى. بۇل الماتى تۇرعىندارىنا عانا ەمەس, بۇكىل ەلىمىزگە فيفا-نىڭ رەسمي وكىلدەرى تاراپىنان جاسالعان ۇلكەن سىي, قايتالانباس ەستەلىك دەپ ايتۋعا بولادى.
فيفا وكىلدەرىمەن قاتار الماتىعا كەلگەن الەم جانە ەۋروپا چەمپيونى, XX عاسىردىڭ ۇزدىك فۋتبولشىسى كريستيان كارامبيو بۇل تاريxي وقيعانىڭ ماڭىزىن ەرەكشە اتاپ ءوتتى. سونىمەن قاتار, تانىمال فۋتبولشى جىلى قوناقجايلىق ءۇشىن العىسىن ءبىلدىرىپ, تىلشىلەردىڭ بارلىق سۇراقتارىنا جاۋاپ بەرە وتىرىپ, كۋبوك 9 ەلدى ارالاپ ۇلگەرگەنىن ايتا كەتتى. ونىڭ ايتۋىنشا, بۇل تروفەي ءبىزدىڭ ەلگە پاكىستاننان كەلىپ, ءوز ساپارىن قىرعىزستاندا جالعاستىرماق.
– قازاقستان ءۇشىن بۇل ۇلكەن قۋانىش. ءبىز الەم كۋبوگىن ءوز قالامىزدا تاماشالادىق. اسەرىمدى ايتىپ, جەتكىزە الماسپىن. ارينە, ەلىمىزدىڭ قۇراما كومانداسى بۇل دوداعا قاتىسپايتىنى وكىنىشتى-اق. بىراق, بۇگىن فۋتبولدىڭ جانكۇيەرلەرى ءۇشىن ۇلكەن مەرەكە. ۇيىمداستىرۋشىلارعا وسىنداي مۇمكىندىك سىيلاعانى ءۇشىن شەكسىز العىسىمدى بىلدىرەمىن, – دەيدى قالا تۇرعىنى تەمىرلان قۋانىشەۆ. تەڭبىل دوپ دوداسىنىڭ ەڭ باستى تروفەيىنىڭ كەلۋىنە وراي جينالعان قوناقتاردىڭ ايتۋىنشا, بۇل الەم سپورتىنداعى اۋقىمدى وقيعا تەك قۋانىشتىڭ بەلگىسى. قوناقتارعا العىسىن بىلدىرگەن الماتى قالاسى اكىمىنىڭ ورىنباسارى ارمان قىرىقباەۆ تا بۇل ءسوزدى قۋاتتاپ, بۇل ەلىمىز ءۇشىن ۇلكەن ابىروي ەكەنىن جەتكىزدى.
«وسى الەم چەمپيوناتى قارساڭىندا ءوتىپ جاتقان اۋقىمدى سپورتتىق ءىس-شاراعا قاتىسۋعا مۇمكىندىك العانىمىزعا قۋانىشتىمىز. الەم كۋبوگى ول جاي عانا جۇلدە ەمەس, بۇل الەمدەگى سپورتتىڭ ەڭ اتاقتى دوداسى. ەلباسىمىزدىڭ قولداۋىمەن الماتى قالاسى قازىر تەك قانا قازاقستاننىڭ ەمەس, ورتالىق ازيانىڭ دا سپورتتىق ورتالىعى بولىپ سانالادى» دەدى ارمان قىرىقباەۆ.
اتالعان جوبا 2006 جىلدان بەرى الەمدىك فۋتبول قاۋىمداستىعى مەن Coca-cola كومپانياسىنىڭ مۇرىندىق بولۋىمەن ىسكە اسىپ كەلە جاتىر. ۇيىمداستىرۋشىلار الماتى اكىمدىگىنە كۋبوكتىڭ كىشى نۇسقاسىن سىيلاپ, قولداۋ كورسەتكەنىنە العىس ءبىلدىردى. سونداي-اق شاراعا جينالعان بارلىق قوناقتار الەم كۋبوگىنىڭ جانىندا ەستەلىك سۋرەتكە ءتۇسىپ مارە-سارە بولىپ تارقاستى.
ارمان وكتيابر,
«ەگەمەن قازاقستان»
الماتى