كەشە وقۋشىلار سارايىندا استانا قالالىق ءبىلىم باسقارماسى «اشىق ەسىك كۇنى» فورماتىمەن ازاماتتارمەن قوعامدىق قابىلداۋ وتكىزدى. اشىق كۇننىڭ قورىتىندىسى بويىنشا, ەڭ وزەكتى ماسەلە بولىپ مەكتەپكە دەيىنگى مەكەمەگە كەزەك پەن جولداما الۋ ەكەنى انىقتالدى. ويتكەنى, 70%-دان اسا ازامات جولداما بويىنشا جۇگىنگەن, دەپ حابارلايدى استانا اكىمدىگىنىڭ ءبىلىم باسقارماسى.
ءىس-شارا بارىسىندا 80 ارىز-شاعىمعا جاۋاپ بەرىلدى. ودان بولەك, وزدەرى كەلە الماعان تۇرعىنداردىڭ ەلەكتروندى تۇردە جولداعان جولدامالارىنا دا قىزمەت كورسەتىلدى.
ء«ىس-شارانى جوسپارلاۋ كەزىندە ءبىز قوعام مەن باسقارما اراسىنداعى «اشىق ديالوگ الاڭىن» قۇرۋدى باسشىلىققا الدىق. وزەكتى ماسەلەلەردى تالقىلاي وتىرىپ, قالالىقتاردىڭ پىكىرىن ءبىلىپ, جۇمىستىڭ قالاي ۇيىمداستىرىلعانىن, بۇگىنگى ۇسىنىستاردىڭ نەگىزىندە سوعان سايكەس بولاشاقتا اتقارىلاتىن ىستەردىڭ تۇجىرىمىن جاساۋ. مۇنداي شارانى جىلىنا بىرنەشە رەت وتكىزۋدى جوسپارلاپ وتىرمىز», دەدى استانا قالالىق ءبىلىم باسقارماسىنىڭ باسشىسى ءانۋار جانعوزين.
باسقارمانىڭ مالىمەتىنشە, قوعامدىق قابىلداۋ كەزىندە بالاباقشاعا جولداما الۋ مەن كەزەك ماسەلەسى تۇرعىنداردى كوبىرەك تولعاندىرعان. سونداي-اق اتا-انالار مەكتەپ پەن كوللەدجگە ءتۇسۋ, تاماقتانۋ ماسەلەسى, ءبىلىم مەكەمەلەرىندەگى الەۋمەتتىك كومەك پەن بالالاردىڭ فاكۋلتاتيۆتىك جانە ۇيىرمە ساباقتارىمەن اينالىسۋ ماسەلەسى دە قىزىقتىرعان.