قر-نىڭ بۇۇ قاۋىپسىزدىك كەڭەسىندەگى توراعالىعىنىڭ اياقتالۋى بارىسىندا كەڭەس دەلەگاتسياسى ۆاشينگتونعا ساپارلادى, دەپ حابارلايدى حاا قر ءسىم ءباسپاسوز قىزمەتى.
باعدارلامادا اقش پرەزيدەنتى دونالد ترامپپەن تۇسكى اس, سونداي-اق حولوكوست مۋزەيىن جانە اناكوستا-بولينگ اسكەري بازاسىن ارالاۋ شارالارى قاراستىرىلعان. ساپار اناكوستا-بولينگ اسكەري بازاسىنان باستالىپ, بۇۇ قك مۇشەلەرىنە بالليستيكالىق زىمىران فراگمەنتتەرى مەن باسقا دا قارۋ-جاراقتار تانىستىرىلدى.
اقش پرەزيدەنتى دونالد ترامپتىڭ اتىنان ۇيىمداستىرىلعان اق ۇيدەگى تۇسكى اسقا مەملەكەتتىك حاتشى رەكس تيللەرسون, اق ءۇيدىڭ اپپارات باسشىسى دجون كەللي جانە ۇلتتىق قاۋىپسىزدىك جونىندەگى كەڭەسشى گەربەرت ماكماستەر, قاتىستى. شارادا حالىقارالىق بەيبىتشىلىك پەن قاۋىپسىزدىككە تونگەن قاۋىپ-قاتەر, سونىڭ ىشىندە كحدر-ءدى يادرولىق قارۋسىزداندىرۋ, سيرياداعى شيەلەنىس پەن تەرروريزمگە قارسى كۇرەس ماسەلەلەرى تالقىلاندى.
اقش پرەزيدەنتى اۋعانستانداعى جاعدايدى ەرەكشە اتاپ ءوتتى. ول تاليبان قوزعالىسى سودىرلارىنىڭ بەيبىت تۇرعىنداردى ءولتىرىپ, لاڭكەستىك جاساپ جاتقانىن اتاپ ءوتتى.
قازاقستاننىڭ تۇراقتى وكىلى قايرات وماروۆ بۇۇ قك توراعاسى رەتىندە ءسوز سويلەي وتىرىپ, پرەزيدەنت ن.نازارباەۆتىڭ قاڭتارداعى اقش-قا جاساعان ساپارى بارىسىندا پرەزيدەنت د.ترامپپەن تابىستى كەزدەسكەنىنە باستى نازار اۋدارىپ, قول جەتكىزىلگەن كەلىسىمدەردى ورىنداۋ بويىنشا جۇرگىزىلىپ جاتقان جۇمىستار تۋرالى باياندادى.
وسىعان بايلانىستى اق ءۇي باسشىسى ساپاردىڭ ءساتتى وتكەنىن تىلگە تيەك ەتىپ, پرەزيدەنت ن.نازارباەۆقا سالەم جولدادى. ساپار سوڭىندا بۇۇ قك مۇشەلەرى سيريالىق شيەلەنىستىڭ قۇرباندارىنا ارنالعان حولوكوست مۋزەيىندەگى كورمەدە بولدى.