قاراعاندىدا سيرەك كەزدەسەتىن كىتاپتار كورمەسى ۇيىمداستىرىلدى. اباي اتىنداعى بالالار كىتاپحاناسىنىڭ قىزمەتكەرلەرى قوردا جاتقان 30-عا تارتا كونە كىتاپتى جۇرت نازارىنا ۇسىندى. بۇل فوليانتتاردىڭ بارلىعى دا بۇدان 100 جىل بۇرىن باسپادان شىققان ەكەن.
كىتاپتاردىڭ ىشىندەگى ەڭ كونەسى – ايگىلى ورىس اقىنى لەرمونتوۆتىڭ جيناعى بولىپ شىقتى. تۋىندى 1882 جىلى رەفورماعا دەيىنگى ورىس تىلىندە جارىق كورىپتى.
مامانداردىڭ ايتۋىنشا, سيرەك كەزدەسەتىن بۇل كىتاپتار وتە از تيراجبەن شىققان جانە ولاردىڭ كوبى سىيعا تارتۋعا ارنالعان ەكزەمپليار ەكەن. قازىرگى ۋاقىتتا ارحيۆاريۋستار بۇل كىتاپتاردىڭ كەنشىلەر استاناسىندا پايدا بولۋ تاريحىن زەرتتەۋ ۇستىندە. ءبىر بەلگىلىسى – كىتاپتار كىتاپحاناعا جەكە قورلار ارقىلى تاپسىرىلعان.
اباي اتىنداعى بالالار كىتاپحاناسىنىڭ ادىسكەرى مارينا پودگاينوۆانىڭ ايتۋىنشا, كەيبىر كىتاپتاردىڭ مۇقاباسىنان وتباسىلىق اتى-جوندەر جازباسى تابىلعان. قازىرگى تاڭدا كىتاپحانا قىزمەتكەرلەرى راريتەت كىتاپتار مەن زۇلمات جىلدارى قاراعاندى وبلىسى اۋماعىنا جەر اۋدارىلعان قۋعىن-سۇرگىن قۇرباندارى اراسىندا قانشالىقتى بايلانىس بولعانىن انىقتاۋعا كىرىسكەن.
قايرات ءابىلدا, «ەگەمەن قازاقستان»
قاراعاندى