9 اقپاندا وڭتۇستىك كورەيانىڭ پحەنچحان قالاسىندا قىسقى وليمپيا ويىندارى الاۋىن جاعادى. ەلىمىز ۇكىلەپ ءۇمىت ارتاتىن سپورتشىلاردىڭ قاتارىندا جۇلدە الىپ قالادى-اۋ دەگەن ۇل-قىزدارىمىز دا بارشىلىق. سولاردىڭ ءبىرى كونكيمەن جۇگىرۋشى – رومان كرەچ.
رومان كرەچ جاستايىنان جارق ەتىپ كورىنگەن سپورتشىلاردىڭ قاتارىنان. 2008 جىلى جاسوسپىرىمدەر اراسىنداعى الەم چەمپيوناتىنا بارعان جاس جىگىتتىڭ قيمىلى, كورسەتكەن ناتيجەسى كوپتەگەن باپكەرلەردىڭ قويىن داپتەرىنە تۇرتىلگەن-ءدى. ءيا, بىلىكتى باپكەرلەر قاتەلەسپەپتى. 2009 جىلى جاسوسپىرىمدەر اراسىنداعى الەم بىرىنشىلىگىندە سەمەي قالاسىنىڭ تۋماسى رومان 1000 مەتر قاشىقتىقتا ءۇشىنشى ورىن الدى. اراعا ەكى كۇن سالىپ ول 1500 مەتر قاشىقتىقتا كۇمىس جۇلدەگەر اتاندى. وسىدان كەيىن باپكەرلەر ونى جاستار قۇراماسىنا اۋىستىرىپ, جاسى ۇلكەندەرمەن باسەكەلەسۋگە سالدى. دەگەنمەن جاس جىگىت ەرەسەكتەر اراسىندا دا اداسىپ قالماي, ناتيجەسىن كۇن ساناپ ارتتىرا بەردى. ونىڭ دالەلى 2009 جىلعى الەم كۋبوگى بولاتىن. العاش الەم كۋبوگىنا قاتىسقان كرەچ ءتاپ-ءتاۋىر ناتيجە كورسەتىپ, الەمدىك شوق جۇلدىزدارمەن سىنعا ءتۇستى.
حالىقارالىق جارىستاردىڭ ءدامىن سەزىپ قالعان رومان 2010 جىلى وليمپيا ويىندارىنا ليتسەنزيا جەڭىپ الدى. ۆانكۋۆەردەگى اق ويىنداردا كرەچ سەنساتسيا جاساپ كەتۋى مۇمكىن دەلىندى. قۇراما كوماندامىزدىڭ باپكەرلەرى سەنىم ارتتى. الايدا جاس جىگىتكە الدىڭعى لەكتەگى جەلاياقتارمەن ايقاسۋعا ءالى ەرتە ەكەن. ول 500 مەتر قاشىقتىقتا 34-ءشى, ال 1000 مەتر قاشىقتىقتاعى سىندا 28-ءشى كەلدى. ارينە ۆانكۋۆەر وليمپياداسى رومان ءۇشىن العاشقى ءىرى سىناق بولاتىن. ءتۇبى بولاشاعى بار سپورتشى كەلەسى وليمپيادادا اتوي سالار دەپ كۇتتىك.
2014 جىلعى قىسقى ويىندار كورشىلەس رەسەي جەرىندە ءوتتى. ءسوچيدىڭ مۇز ايدىنىندا مەدالدىڭ سىڭعىرىن ەستىپ قالارمىز دەپ ۇمىتتەندىك. كونكيمەن جۇگىرۋشىلەردىڭ كورىنەتىن كەزى كەلگەندەي ەدى. باستى ءۇمىتىمىز – سول باياعى رومان كرەچ. سەبەبى الەم كۋبوگىنىڭ كەزەڭدەرى مەن الەم بىرىنشىلىكتەرىندە جەرلەسىمىز جەلپىنىپ ءجۇردى. جۇلدە الماسا دا, مىقتىلارمەن تەرەزەسى تەڭ تايتالاستى. ودان بولەك ازيا ويىندارىندا ول الدىنا جان سالماي, ناعىز بابىنا كەلگەنىن كورسەتتى. 2014 جىلدىڭ باستى جارىسىنا كرەچ ەشقانداي جاراقاتسىز, جاقسى كوڭىل كۇيمەن اتتاندى. الايدا ول ءوزى ۇناتاتىن 500 مەتر قاشىقتىقتا 7-ورىن الىپ قالدى. جۇلدەگەرلەر قاتارىنا كىرۋ ءۇشىن وعان 1 سەكۋند جەتىسپەدى. كونكيمەن جۇگىرۋ سپورتىندا ءاربىر سەكۋند ۇلكەن ماڭىزعا يە. ال 1000 مەتر قاشىقتىقتا ول 13-ساتىعا تابان تىرەدى.
ەندى اراعا تاعى ءتورت جىل سالىپ رومان كرەچ ءوزىنىڭ ءۇشىنشى وليمپيالىق ويىنىنا قاتىسپاقشى. بۇل جولى قالاي بولار ەكەن؟ 28 جاستاعى سپورتشىنى جاسى كەلدى دەپ تىزىمنەن سىزىپ تاستاعىسى كەلگەندەر دە جوق ەمەس. سەبەبى سپورتشى وسىدان ەكى جىل بۇرىن جاراقات الىپ, جاتتىعۋ جاساي الماي قالعان كەزدەر دە بولدى. ەندى ول بارلىعىن ۇمىتىپ, وسى وليمپيادادا سوڭعى مۇمكىندىگىن پايدالانىپ كورەدى. بار كۇشىن سالىپ, ءومىرىنىڭ باستى جارىسىنا تىڭعىلىقتى دايىندالۋدا. ونىڭ دايىندىعى ءتىپتى وتكەن جىلدىڭ باسىنان بەرى باستالىپ كەتكەن. كرەچ كانادانىڭ كالگاري قالاسىندا ءوزىنىڭ جەكە رەكوردىن تىركەدى. 500 مەتر قاشىقتىقتى رومان 34,21 سەكۋندتا جۇگىرىپ ءوتتى.
قازىر, قازاقستاننىڭ كونكيمەن جۇگىرۋشىلەر قۇراماسى گەرمانيانىڭ ەرفۋرت قالاسىندا وقۋ-جاتتىعۋ جۇمىستارىن جۇرگىزىپ جاتىر. وسىعان دەيىن ولار كيپر ارالىندا بولىپ, دايىندىقتارىن پىسىقتادى. پحەنچحانداعى ويىنداردا رومان 500 جانە 1000 مەتر قاشىقتىقتاردا باق سىنايدى. بالكىم, وسى جولى روماننىڭ جولى بولار؟
ەرمۇحامەد ماۋلەن,
«ەگەمەن قازاقستان»