قىزىلوردادا ەلباسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى قازاقستان حالقىنا جولداۋىنىڭ نەگىزگى مىندەتتەرىن تالقىلاۋعا باعىتتالعان اكتيۆ جينالىسى ءوتتى. جيىن بارىسىندا وبلىس اكىمى قىرىمبەك كوشەرباەۆ ءتورتىنشى ونەركاسىپتىك رەۆوليۋتسيا – بولاشاق ەمەس, بۇگىنگى كۇننىڭ كورىنىسى ەكەنىن اتاپ ءوتتى.
ء«تورتىنشى ونەركاسىپتىك رەۆوليۋتسيا جاعدايىنداعى ءومىر ءسۇرۋ جەدەل بەيىمدەلۋدى تالاپ ەتەدى. جۋىردا تاتارستان رەسپۋبليكاسىنا ءىسساپار بارىسىندا ولاردىڭ تىڭ جاڭالىقتارى كوپ ەكەنىنە كوزىمىز جەتتى. يننوپوليس «اقىلدى قالاسىندا» ءتىپتى مەكتەپ وقۋشىلارىنىڭ ءوزى 3D-پرينتەرلەر قولدانىپ ءجۇر. وسى ورايدا وبلىس اكىمىنىڭ ارنايى ءبىلىم گرانتتارى ءبولىنىپ, ەلباسى جولداۋىندا كورسەتىلگەن بولاشاقتا سۇرانىسقا يە بولاتىن كادرلاردى دايىندايتىن بولامىز», دەدى وبلىس اكىمى.
ايماق باسشىسى لاۋازىمدى تۇلعالارعا وبلىس مەكتەپتەرىن ينتەرنەت جانە بەينەقۇرىلعىلارمەن قامتاماسىز ەتىپ, بالالار تەحنوپاركتەرى مەن بيزنەس-ينكۋباتورلارىنىڭ جەلىسىن قۇرۋ جانە جاس عالىمدارعا عىلىمي گرانتتار اياسىندا كۆوتا ءبولۋدى جۇيەلى قولدانۋ بويىنشا شارالار قابىلداۋدى تاپسىردى.
جاڭا جولداۋ شەڭبەرىندە جۇمىس ىستەيتىن جانە باسقا دا جوسپارلانعان شارالار تۋرالى وڭىردەگى جاۋاپتى ادامدار باياندادى.
ى.جاقاەۆ اتىنداعى كۇرىش شارۋاشىلىعى قازاق عىلىمي-زەرتتەۋ ينستيتۋتىنىڭ باس عىلىمي قىزمەتكەرى الەكساندر پودولسكيحتىڭ ايتۋىنشا, قىزىلوردادا جاڭا سەلەكتسيالىق تەحنولوگيا جاساقتالىپ, وعان پاتەنت الىنىپتى. – الەمدە كۇرىش تۇقىمىنىڭ ەكى نەگىزگى ءتۇرى وسىرىلەدى – ينديكا جانە ياپونيكا, ال الەمدىك نارىق سۇرانىسىنىڭ 80 پايىزى ينديكا تۇرىنە تيەسىلى. ءبىز حالىقارالىق جانە رەسەيلىك كۇرىش شارۋاشىلىعىن عىلىمي-زەرتتەۋ ينستيتۋتتارىنىڭ تاجىريبەلەرى نەگىزىندە جاڭا سەلەكتسيالىق تەحنولوگيانى ازىرلەپ, وعان پاتەنت الدىق. سونىمەن قاتار بيىلدان باستاپ قىزىلوردادا كاسىپكەرلەردىڭ سۇرانىسىن ەسكەرەتىن سورتتار نارىعى جۇمىسىن باستايدى. ودان بولەك, ءونىمدى تەرەڭ وڭدەۋ جۇمىستارى دا جۇرگىزىلۋدە. ماسەلەن, 500 مىڭ توننا ءونىمدى وڭدەۋ بارىسىندا 100 مىڭ توننا كۇرىش قابىعى مەن 500 مىڭ توننا كۇرىش سابانى قالادى. ال كۇرىش قالدىقتارىن سۋ مەن تىڭايتقىشتاردى ۇنەمدەۋ ماقساتىندا توپىراققا قوسۋعا جانە جوعارى ساپالى قاعازدىڭ ءتۇر-ءتۇرىن جاساۋ ءۇشىن پايدالانۋعا بولادى, – دەدى الەكساندر پودولسكيح.
اكتيۆ وتىرىسىنىڭ قورىتىندىسى بويىنشا وبلىس اكىمى مەملەكەتتىك ورگان باسشىلارىنا جولداۋدى جان-جاقتى جۇزەگە اسىرۋ بويىنشا ناقتى مىندەتتەر جۇكتەدى.
ەرجان بايتىلەس, «ەگەمەن قازاقستان»
قىزىلوردا