قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى حالىققا جولداۋىن جاريالاعان ساتتە بىزدەر – پارلامەنت دەپۋتاتتارى ەل وڭىرلەرىن ارالاپ, جۇرتشىلىقپەن كەزدەسۋلەر وتكىزىپ جۇرگەن ەدىك.
سولتۇستىك قازاقستان وبلىسىنىڭ تۇرعىندارى مەملەكەت باسشىسىنىڭ جاڭا جولداۋىن ىقىلاسپەن قابىلدادى. جۇرتشىلىقپەن كەزدەسۋ بارىسىندا ون نەگىزگى مىندەت اياسىندا ءوندىرىس ۇدەرىستەرىن ساندىق نەگىزگە كوشىرۋ ارقىلى يندۋستريالاندىرۋدى ورىستەتۋ, ءبىلىم بەرۋدى جاڭا سيپاتتا دامىتۋ, قارجى سەكتورىن قايتا قالىپتاستىرۋ, كولىك-لوگيستيكا ينفراقۇرىلىمىنىڭ تيىمدىلىگىن ارتتىرۋ, سىبايلاس جەمقورلىقپەن كۇرەس جانە ءتيىمدى مەملەكەتتىك باسقارۋ ماسەلەلەرى ءسوز بولدى.
مەملەكەتتىڭ الەۋمەتتىك مىندەتتەمەلەردى تولىق كولەمدە ورىندايتىنىن, ازاماتتارىمىزدىڭ ءال-اۋقاتىن ودان ءارى ارتتىرۋ باعىتىنداعى باستامالاردى اۋىل تۇرعىندارى ريزاشىلىقپەن قابىلدادى. 1 قاڭتاردان باستاپ ىنتىماقتى زەينەتاقى 8 پايىزعا ءوستى, ال شىلدەدەن باستاپ بازالىق زەينەتاقى ەڭبەك وتىلىنە بايلانىستى ورتاشا العاندا 1,8 ەسە ۇلعايادى. پرەزيدەنت ودان باسقا, ءى توپتاعى مۇگەدەك بالالاردىڭ كۇتىمى ءۇشىن ولاردىڭ اتا-انالارىنا 1 شىلدەدەن باستاپ مەملەكەتتىك قوسىمشا جاردەماقى ەنگىزۋدى تاپسىردى. بۇل وتە قاجەتتى قولداۋ بولىپ تابىلادى.
مەكتەپ مۇعالىمدەرى دە ەڭبەكاقىنى كوتەرۋ تۋرالى شەشىمدى قۋانا قابىلدادى. 1 قاڭتاردان باستاپ مازمۇنى جاڭارعان وقۋ ماتەريالدارىنا كوشەتىن مۇعالىمدەردىڭ لاۋازىمدىق ەڭبەكاقىسى 30 پايىزعا ۇلعايادى جانە قارقىندى دامىپ كەلە جاتقان ەكونوميكانىڭ ارقاسىندا مەملەكەتتە وعان جەتەتىن قارجى بار.
اۋىل ەڭبەككەرلەرى جولداۋدا اگروونەركاسىپ كەشەنى ەل ەكونوميكاسىنىڭ درايۆەرى رەتىندە اتاپ وتىلگەنىن, بۇل سالا الدىنا ۇلكەن مىندەتتەر قويىلعانىن اتاپ ءوتتى. بۇل اۋىل شارۋاشىلىعى ونىمدەرىنىڭ ەكسپورتىن ۇلعايتۋ ءۇشىن قاجىرلى ەڭبەك ەتىپ جاتقان جەرگىلىكتى ءونىم وندىرۋشىلەرگە قانات بىتىرەدى.
ولگا پەرەپەچينا, پارلامەنت سەناتىنىڭ دەپۋتاتى