قازىر بۇرىنعىداي ەمەس, الىس-جاقىنداعى اۋىل-اۋدانداردىڭ جاي-كۇيىن الەۋمەتتىك جەلىدەن كورىپ-ءبىلىپ وتىراتىن بولدىق. اسىرەسە تابيعات توسىن مىنەز تانىتقان تۇستا شالعايداعى وزەكتى ماسەلەلەر ەمىس-ەمىس ەستىلىپ قالىپ جاتادى.
قاڭتاردىڭ ايازى مەن بورانى كەزەكتەسىپ قىسقان كەزدە قوستاناي وبلىسىنىڭ ورتالىعى مەن امانگەلدى اۋدانىنىڭ اراسىندا اۆتوبۋس قاتىنامايتىنى قاجىتقان جۇرتتان سونداي ءبىر حابار جەتتى.
كولىگى جوق ادامداردىڭ وبلىس ورتالىعى مەن امانگەلدىنىڭ اراسىندا تاكسيمەن تەپەڭدەپ جۇرگەنىنە بىرنەشە جىلدىڭ ءجۇزى بولىپتى. قاتىناستى قىزدىرىپ وتىرعان تاكسي جۇرگىزۋشىلەرىنە قويار كىنا جوق, قايتا اۋىل تۇرعىندارىنىڭ ساناسىنداعى «جىراقتا جاتىرمىز, اۋىلدان شىعا الماي قالدىق» دەگەن قاساڭ وي, كەرىتارتپا كوزقاراستان قۇتقارعان سولار ەكەن. قاجەت بولسا, تاڭەرتەڭ ۇيدەن شىققان ادامدار كەشكە دەيىن قالاداعى شارۋاسىن تىندىرىپ, وتىنىڭ باسىنا ورالىپ ۇلگەرەتىن كورىنەدى. جازداعى قاپىرىق ىستىقتا دا, قىستىڭ قاقاعان اياز-بورانىندا دا جۇرگىزۋشى جىگىتتەر جەرگە قاراتپاۋعا تىرىسادى. ەلدى دە دىتتەگەن جەرىنە جەتكىزىپ, وزدەرى دە تابىس تاۋىپ وتىرعان تاكسيلەردىڭ تىرلىگى دۇرىس-اق. الايدا جول جۇرەتىن ادامداردىڭ قاتارى كوبەيگەن سايىن, تاكسيلەر جۇرگىنشىلەردىڭ ءنوپىرىن تاسىپ ۇلگەرە المايدى. ءبىر اۋدانعا ءبىر اۆتوبۋس بۇيىرماعانىنا جۇرتتىڭ امالى قۇرىپ وتىر.
ەكىنشىدەن, تاكسيستەر الاتىن جولاقىنى دا جۇرتتىڭ ءبارىنىڭ بىردەي قالتاسى كوتەرە بەرمەيدى. جۇرگىنشىلەر كوبەيگەن كەزدەردە ءبىر باعىتتىڭ باعاسى 4 مىڭ تەڭگەگە دەيىن جەتەدى ەكەن. جەڭىل-جەلپى سالەمدەمە جىبەرەمىن دەسەڭىز 1 مىڭ تەڭگە تولەيسىز.
ۇشىنشىدەن, تاكسيلەردىڭ قاي جەردەن جۇرەتىنىن جۇرتتىڭ ءبارى بىردەي بىلە بەرمەيدى. قوعامدىق كولىك سياقتى ەمەس, جەكە ماشينالار باراتىن جەرىڭە ءدال جەتكىزىپ تاستاي المايتىنى جانە بار.
تورتىنشىدەن, قاشىقتىعى 400 شاقىرىمنان اساتىن, ساپاسى دا وڭىپ تۇرماعان جولمەن كەيبىر تاكسيلەر ۋاقىت پەن جانارماي ۇنەمدەۋ ءۇشىن ءوزىنىڭ دە, جولاۋشىنىڭ دا باسىن قاتەرگە تىگىپ, جۇيتكىپ جۇرەدى ەكەن. «ارقالىققا 45 مينۋتتا باردىم, قوستانايعا 3 ساعاتتا جەتتىم» دەپ كۇپىنەتىن «جۇيرىكتەر» جەتەرلىك. ال جولاۋشىنىڭ جانىن شۇبەرەككە ءتۇيىپ, يمانىن ءۇيىرىپ وتىرۋدان باسقا امالى جوق.
ەندىگىسىن سول جاقتىڭ ازاماتتارىنىڭ اۋزىمەن جەتكىزىپ كورەيىك. امانگەلدى اۋدانىنا بۇرىن بارىپ كورمەگەن ادام تاكسيدى قاي كوشەدەن ىزدەپ جۇرەدى؟! تاكسيلەردەن جاي عانا ءىسساپار بيلەتىن الۋ دا وڭاي ەمەس. قالاي بولعاندا دا, ءبىر اۋدانعا ءبىر اۆتوبۋس كەرەك ەكەن, دەيدى جول ازابىن تارتقان ازاماتتاردىڭ ءبىرى. تاكسيگە قاراعاندا, اۆتوبۋستىڭ ءار جەرگە توقتاپ, شابانداۋ جۇرەتىنى راس. بىراق اۆتوبۋس سەنىمدى كولىك ەكەنىن, اسىرەسە قىستا جاقسى ەكەنىن ەلدىڭ ءبارى مويىندايدى. قوستاناي تۇرماق, استاناعا اۆتوبۋس شىقسا دا مىنەتىن ادام تابىلار ەدى. اسىرەسە جاز مەزگىلىندە ءارلى-بەرلى اعىلعان جۇرت كوپ, دەيدى تاعى ءبىرى الەۋمەتتىك جەلى ارقىلى.
– ءبارى ۇيىمداستىرۋعا بايلانىستى. جولاۋشىلارعا دا, تاسىمالداۋشىلارعا دا ءتيىمدى بولۋى كەرەك. بۇرىن «ارقالىق – امانگەلدى», «امانگەلدى – قوستاناي» اراسىندا اۆتوبۋستار كەستەگە ساي تۇراقتى ءجۇرۋشى ەدى. سولار شىعىنعا باتتى دەگەنگە سەنۋ قيىن. حالىققا تاكسي دە, اۆتوبۋس تا كەرەك,– دەيدى جومارتبەك نۇرمان ەسىمدى ەل ازاماتى.
جالپى, جول مەن جولاۋشىلار تاسىمالى تۋرالى جىر تالاي مارتە جازىلىپ تا, ايتىلىپ تا كەلە جاتقانى بەلگىلى. بىراق «ايتا, ايتا التايدى...» دەپ قويا سالۋعا تاعى بولمايدى. ەلىمىزدىڭ ءار تۇكپىرىندەگى حالىقتىڭ وبلىستارى بولەك بولسا دا, شەشىلمەگەن الەۋمەتتىك پروبلەمالارى ورتاق. سول باياعى ساپاسىز جول, تارتىلماعان اۋىز سۋ, جانباعان جارىق, «ۇستامايتىن» ۇيالى بايلانىس... دەگەن سياقتى جالعاسا بەرەدى. ايتىپ وتىرعان اۆتوبۋس جىرى تا سونىڭ ءبىر كورىنىسى.
شىنىندا دا, 20 مىڭعا تارتا حالقى بار امانگەلدى اۋدانىنان وبلىس ورتالىعىنا بىردە-ءبىر قوعامدىق كولىكتىڭ قاتىنامايتىنى كوڭىلگە قونبايدى. كەڭەس وداعى كەزىندە اۋدان ورتالىعى تۇرماق, اۋداننان قاشىقتا جاتقان اۋىلدارىنىڭ وزىنە ان-2 ۇشاعى ۇشاتىن. ۇشاق تۇرماق, اۆتوبۋس كوزدەن بۇل-بۇل ۇشادى دەپ كىم ويلاعان؟! جول ازابىنان شارشاعان جۇرت اۋدان اكىمدىگى مەن وبلىس اكىمدىگى وسى ماسەلەنى شەشىپ, ارنايى اۆتوبۋس بولسە دەگەن ۇمىتپەن قاراپ وتىر.