الماتىدا زاعيپ جانە كوزى ناشار كورەتىن بالالاردان قۇرالعان وركەستر مۋزىكالىق اسپاپتار ساتىپ الۋ ءۇشىن «اتامەكەنىم» اكتسياسىنىڭ اياسىندا ارنايى كونتسەرت ۇيىمداستىردى.
اتالمىش ۇلت اسپاپتارى وركەسترىندە ونەر كورسەتەتىن كوزى ناشار كورەتىن جانە زاعيپ 30 بالانىڭ بارلىعى دا الماتى قالاسىندا ورنالاسقان №4 ن.وستروۆسكي اتىنداعى ينتەرناتتىڭ تاربيەلەنۋشىلەرى. ءان سالىپ, ءتۇرلى اسپاپتاردا ويناپ, كونتسەرتتەر وتكىزىپ جۇرگەن بۇل بالالار ءۇشىن مۋزىكا جاي عانا ۋاقىت وتكىزۋگە ارنالعان قىزىعۋشىلىق ەمەس, بولاشاقتا اينالىساتىن كاسىپتەرى ەكەنىن جەتكىزگەن مۋزىكانت دانا مەيىربەكوۆا مۋزىكامەن اينالىسقىسى كەلەتىن زاعيپ بالالار قاتارى ارتىپ كەلە جاتقانىن, بىراق بارىنە بىردەي مۋزىكالىق اسپاپ جەتە بەرمەيتىنىن, سوندىقتان وقۋشىلارعا كومەكتەسۋ ماقساتىندا ارنايى كونتسەرت ۇيىمداستىرىلىپ وتىرعانىن ايتتى.
«ينكليۋزيۆتى ءبىلىم الاتىن بالالارعا ارنالعان بايقاۋدا قازىلار القاسىنىڭ مۇشەسى بولدىم, سول كەزدە وسى وركەستر تۋرالى ءبىلدىم. بالالار تاعدىرىنا شاعىم ايتپاي, ءوز بەتتەرىمەن ءومىر ءسۇرۋدى ۇيرەنۋگە تالپىنعاندارى شابىتتاندىردى. كورەرمەن جاس مۋزىكانتتاردىڭ تالپىنىسىن باعالاپ, قاجەتتى اسپاپتى ساتىپ الۋعا قول ۇشىن سوزادى دەپ ويلايمىن. بالالاردى قولداي وتىرىپ, كونتسەرتكە ءوزىم, ۇلىم جانە مۋزىكانت دوستارىم دا قاتىسادى. بۇل ءىس-شارانى «اتامەكەنىم» اكتسياسىنىڭ اياسىندا وتكىزىپ وتىرمىز. بىلتىر الماتى قالاسى كاسىپكەرلەر پالاتاسىندا كۋرستان ءوتتىم. بىزگە قولداۋ كورسەتتى, «Art Mobile» ءموبيلدى ونەر مەكتەبىنىڭ اشىلۋىنا ارنايى گرانت ۇتىپ الدىق. ءبىز ەندى بيزنەستىڭ وكىلىمىز, وسىلايشا ءوزىمىزدىڭ الەۋمەتتىك جاۋاپكەرشىلىگىمىزدى كورسەتەمىز», دەدى د.مەيىربەكوۆا.
ن.وستروۆسكي اتىنداعى زاعيپ جانە كوزدەرى ناشار كورەتىن بالالارعا ارنالعان مەكتەپ-ينتەرناتتىڭ تاربيەلەنۋشىسى, تۋعاننان زاعيپ ەرمەك بايسالبەكوۆتىڭ ايتۋىنشا, 2-سىنىپتا وقىپ جۇرگەندە وزىنە قانداي اسپاپتا ويناعىسى كەلەتىنى تۋرالى سۇراق قويىلعاندا باياندى تاڭداعانىن ايتادى. نوتانى برايل جۇيەسى ارقىلى تانىعان ەرمەك ارنايى ادەبيەت جەتىسپەگەنمەن, ەرەكشە ەستۋ قابىلەتىنىڭ ارقاسىندا باياندا ويناۋدى وڭاي مەڭگەرىپ العان ەكەن.
«مۋزىكامەن اينالىسقانىما 6 جىل بولدى. بولاشاقتا مۋزىكانت اتانىپ, ءتۇرلى كونتسەرتتەرگە قاتىسقىم كەلەدى. ۇستازىمىزدىڭ ءوزى دە وسى ينتەرناتتا وقىپ, مۋزىكالىق كوللەدجى اياقتاعان, قازىر بار بىلگەنىن بىزگە ۇيرەتىپ ءجۇر», دەيدى ە.بايسالبەكوۆ.
كەش سوڭىندا قايىرىمدى جاندار تاراپىنان زاعيپ بالالاردان تۇراتىن وركەسترگە كونتراباس-دومبىرا مەن ەكى باس دومبىرا سىيعا تارتىلدى. ال كونتسەرتتەن تۇسكەن قاراجاتقا بالالار بايان مەن ۇرمالى اسپاپتار ساتىپ الماقشى.
ميرا بايبەك, «ەگەمەن قازاقستان»
الماتى