استانادا قازاقستان رەسپۋبليكاسى ۇلتتىق ۇلتتىق ۇلانىنىڭ باسشىلىق قۇرامىنىڭ قاتىسۋىمەن اسكەري كەڭەس وتىرىسى ءوتتى. القالى كەڭەستە قۇقىقتىق ءتارتىپ اسكەرىنىڭ 2017 جىلعى قىزمەتتىك-جاۋىنگەرلىك دايارلىعى قورىتىندىلاندى, دەپ حابارلادى ۇلتتىق ۇلاننىڭ ءباسپاسوز قىزمەتى.
ىشكى ىستەر ءمينيسترى قالمۇحانبەت قاسىموۆ جەتەكشىلىك ەتكەن اسكەري كەڭەسكە پرەزيدەنت كومەكشىسى – قاۋىپسىزدىك كەڭەسىنىڭ توراعاسى ۆلاديمير جۇماقانوۆ, باس اسكەري پروكۋرور ەرعالي مەرزادينوۆ, وڭىرلىك قولباسشىلىقتاردىڭ قولباسشىلارى, اسكەري ءبولىم كومانديرلەرى, اسكەري ينستيتۋت باستىعى مەن ولاردىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارلارى قاتىستى.
باسقوسۋدا نەگىزگى باياندامانى ۇلتتىق ۇلان باس قولباسشىسى رۋسلان جاقسىلىقوۆ جاسادى. ول ءوز سوزىندە وتكەن جىلدىڭ قىزمەتتىك-جاۋىنگەرلىك ارەكەتتەردى قورىتىندىلاپ, الدا ايقىندالعان جوسپار-جوبالاردى جۇزەگە اسىرۋدا ۇلاندىقتار وزدەرىنە جۇكتەلگەن مىندەتتەردى تولىقتاي ورىندايتىنىن تىلگە تيەك ەتتى.
سونىمەن قاتار, ر.جاقسىلىقوۆ ەلىمىزدىڭ قوعامدىق قاۋىپسىزدىگى مەن قورعانىسىن ءتيىمدى قامتاماسىز ەتۋ بويىنشا اسكەردى قازىرگى جانە الداعى مىندەتتەرگە سايكەستەندىرۋ بولىپ تابىلاتىن ۇلتتىق ۇلاننىڭ 2017-2019 جىلدارعا ارنالعان دامۋ باعدارلاماسىنىڭ ورىندالۋ بارىسىمەن تانىستىردى. وندا نەگىزگى باسىمدىق تاكتيكالىق قيمىلدار, كاسىبي-لاۋازىمدىق دايارلىق پەن باسقارۋ ورگاندارىن جەتىلدىرۋگە باسا ءمان بەرىلگەن. وسى ورايدا بيىلعى 2018 جىل ۇلتتىق ۇلاندا كاسىبي دايارلىق جىلى بولىپ بەكىتىلگەنىن مالىمدەدى.
ال ءوز كەزەگىندە ءسوز العان ىشكى ىستەر ءمينيسترى قۇقىق قورعاۋ ورگاندارى مەن ۇلتتىق ۇلان جاۋىنگەرلەرىنىڭ ەلىمىزدەگى قوعامدىق ءتارتىپتى قامتاماسىز ەتۋدەگى ورنى مەن جەكە قۇرامنىڭ ەلجاندىلىق رۋحىنداعى تاربيەسىنە جەتە كوڭىل ءبولۋ كەرەكتىگىن ايتتى.
وتىرىستا سونىمەن بىرگە پرەزيدەنت كومەكشىسى – قاۋىپسىزدىك كەڭەسىنىڭ توراعاسى ۆ.جۇماقانوۆ, باس اسكەري پروكۋرور ە.مەرزادينوۆ ءسوز سويلەپ, ۇلاندىق اسكەردىڭ تىنىشتىقتى ساقتاۋداعى قىزمەتىنىڭ ماڭىزدىلىعىن اتاپ ءوتتى. سونداي-اق, جيىندا وڭىرلىك قولباسشىلىقتار قولباسشىلارىنىڭ ەسەبى تىندالدى.
اسكەري كەڭەستىڭ وتىرىسىن قورىتىندىلاعان ىشكى ىستەر ءمينيسترى ق.قاسىموۆ بارلىق دەڭگەيدەگى كومانديرلەر مەن باستىقتاردى اسكەردىڭ جاۋىنگەرلىك دايارلىعىنا, اسكەري ءتارتىپ پەن قۇقىقتىڭ ساقتالۋىنا نازار اۋدارىپ, الداعى مىندەتتەردى ايقىندادى.