كەشە پارلامەنت سەناتىنىڭ توراعاسى قايرات ءمامي بۇۇ جوعارعى كوميسسارىنىڭ بوسقىندار ىستەرى جونىندەگى باسقارماسىنىڭ ورتالىق ازياداعى ايماقتىق ۇيلەستىرۋشىسى/ايماقتىق وكىلى سابەر ازامدى قابىلدادى, دەپ حابارلادى پارلامەنت سەناتىنىڭ ءباسپاسوز قىزمەتى.
كەزدەسۋ بارىسىندا قازاقستان مەن بۇۇ جكبب-نىڭ ءوزارا ءىس-قيمىلىن ودان ءارى دامىتۋ ماسەلەلەرى تالقىلاندى. «بوسقىندارعا قاتىستى وقيعالاردى تۇراقتاندىرۋعا جانە جاقسارتۋعا باعىتتالعان بۇۇ بجكب قىزمەتىن قازاقستان جوعارى باعالايدى», – دەدى ق.ءمامي.
كەزدەسۋ بارىسىندا ءتوراعا ادام قۇقىقتارى, ونىڭ ىشىندە بوسقىندار مەن كوشىپ كەلۋشىلەردىڭ قۇقىقتارىن ساقتاۋ سالاسىنداعى مەملەكەتتىك ساياسات مىندەتتەرىنىڭ باسىمدىعىن اتاپ ءوتتى.
اڭگىمە بارىسىندا س.ازام دا قازاقستان مەن بۇۇ جكبب-نىڭ بوسقىندار جانە كوشىپ كەلۋشىلەر ماسەلەلەرى جونىندەگى جان-جاقتى ىنتىماقتاستىعىن جاقتايتىنى تۋرالى ايتتى.