قازالى اۋدانىنىڭ ورتالىعى ايتەكە بي كەنتىندە 150 ورىندىق جاڭا اۋرۋحانا پايدالانۋعا بەرىلدى. قىزىلوردا وبلىسىنىڭ اكىمى قىرىمبەك كوشەرباەۆ ەمدەۋ مەكەمەسىنىڭ اشىلۋ سالتاناتىنا قاتىسىپ, دارىگەرلەر مەن كەنت تۇرعىندارىن جاڭا اۋرۋحانانىڭ اشىلۋىمەن قۇتتىقتادى.
– ەلباسىنىڭ ساليقالى ساياساتىنىڭ ارقاسىندا ەلىمىزدىڭ دەنساۋلىق ساقتاۋ سالاسى جۇيەلى تۇردە دامۋدا, قازاقستاننىڭ تۇكپىر-تۇكپىرىندە وزىق تەحنولوگيالارمەن جابدىقتالعان مەديتسينالىق مەكەمەلەر اشىلۋدا. بۇگىن, مىنە 150 ورىندىق اۋرۋحانا اشىلدى. بۇدان بولەك, بيىل وسى اۋرۋحانا جانىنان 250 ورىندىق ەمحانا سالۋدى كوزدەپ وتىرمىز. قازىر ەمحانا قۇرىلىسىن سالۋ بويىنشا قۇجاتتار ازىرلەنۋدە,– دەدى ول.
ايماق باسشىسى اۋرۋحانا ۇجىمىنىڭ جۇمىسىنا ساتتىلىك تىلەپ, جاڭا «جەدەل جاردەم» كولىگىنىڭ كىلتىن تابىستادى. سونداي-اق اۋرۋحانا ءۇشىن قۇنى 400 ميلليون تەڭگە تۇراتىن انگيوگراف مەديتسينالىق قوندىرعىسى مەملەكەت-جەكەمەنشىك ارىپتەستىگى اياسىندا الىنۋدا. بۇل قوندىرعى جەدەل جانە ساپالى وتا جاساۋعا سەپتىگىن تيگىزىپ, قازالى, قارماقشى, ارال اۋداندارى مەن بايقوڭىر قالاسىنىڭ تۇرعىندارىنا قىزمەت كورسەتەتىن بولادى.
اۋداندىق اۋرۋحانانىڭ اشىلۋىنا قاتىسقان پارلامەنت ءماجىلىسىنىڭ دەپۋتاتتارى باقتىقوجا ىزمۇحامبەتوۆ, اباي تاسبولاتوۆ, مۇحتار ەرمان جانە گەننادي شيپوۆسكيح پەن اۋداندىق دەنساۋلىق ساقتاۋ سالاسىنىڭ ارداگەرى وراق كەۋباسوۆ قازالىلىقتاردى قۋانىشتارىمەن قۇتتىقتادى.
سونداي-اق وبلىس اكىمى اۋداندىق سوتتىڭ جاڭا عيماراتىنىڭ اشىلۋىنا قاتىستى. عيمارات ىشىندە سۋديا مەن حاتشىلاردىڭ كەڭسەلەرى, سوت ءماجىلىسى زالدارى مەن مۇراعات, كەڭسە جانە قىزمەتتىك بولمەلەر ورنالاسقان.
سونىمەن قاتار قىرىمبەك ەلەۋ ۇلى ايتەكە بي كەنتى مەن قازالى قالاسىنىڭ 2018 جىلعى دامۋ جوسپارى ماسەلەلەرى بويىنشا جيىن وتكىزىپ, جەرگىلىكتى قوعامداستىق وكىلدەرىمەن كەزدەسىپ, اۋدان جانە وبلىستىڭ وزەكتى ماسەلەلەرىن تالقىلادى.
ايتا كەتەيىك, سوڭعى 5 جىلدا قىزىلوردا وبلىسىندا 57 مەديتسينالىق نىسان, ونىڭ ىشىندە ارال, قازالى جانە شيەلى اۋداندارىنداعى ورتالىق اۋرۋحانالار اشىلدى. 2018 جىلدىڭ قاڭتار ايىنان باستاپ بايقوڭىر قالاسىندا 15 مىڭ قازاقستاندىق ازاماتقا قىزمەت كورسەتەتىن ەمحانا جۇمىسىن باستادى. بۇدان بولەك, الداعى 3 جىلدا تاعى دا 100 دەنساۋلىق ساقتاۋ نىسانى سالىنباق. سونداي-اق 2015 جىلى مەديتسينالىق نىسانداردىڭ جابدىقتالۋ كورسەتكىشى 43 پايىز بولسا, 2017 جىلى 76,5 پايىزدى قۇرادى, ال اعىمداعى جىلى 90 پايىزعا جەتەدى دەگەن جوسپار بار.
ەرجان بايتىلەس, «ەگەمەن قازاقستان»
قىزىلوردا وبلىسى