وڭتۇستىك قازاقستان وبلىسى مەملەكەتتىك ەڭبەك ينسپەكتسياسى جونىندەگى باسقارماسىنىڭ باسشىسى الماسبەك مامىتبەكوۆتىڭ مالىمدەۋىنشە, ەڭبەك زاڭناماسى كوبىنە جۇمىسقا قابىلدانعان قىزمەتكەرلەرمەن ەڭبەك شارتتارىنىڭ جاسالماۋى, ەڭبەك شارتىن زاڭسىز بۇزۋشىلىق, جالاقىنىڭ ۋاقىتىلى تولەنبەۋى سياقتى فاكتىلەر بويىنشا بۇزىلۋدا.
سونداي-اق ەڭبەك قاتىناستارى سالاسىنداعى زاڭ بۇزۋشىلىقتار جۇمىس بەرۋشىلەردىڭ قر ەڭبەك زاڭناماسىن بىلمەۋى, ونى وقىپ-ۇيرەنۋگە تالپىنباۋى, جۇمىس بەرۋشىلەردىڭ وسى ماسەلەگە جەتكىلىكتى كوڭىل بولمەۋى سالدارىنان دا ورىن الۋدا. وبلىستىق وڭىرلىك كوممۋنيكاتسيالار قىزمەتىندە وتكەن بريفينگتە باسقارما باسشىسى بىلتىر ءوڭىر كاسىپورىندارى مەن مەكەمەلەرىندە قازاقستان رەسپۋبليكاسىنىڭ ەڭبەك زاڭناماسىنىڭ ساقتالۋىن باقىلاۋ ماقساتىندا 1027 تەكسەرۋ جۇرگىزىلگەنىن ءمالىم ەتتى. ناتيجەسىندە 1308 زاڭ بۇزۋشىلىق انىقتالىپ, ونىڭ 1276-ى جويىلعان. باسقارما باسشىسىنىڭ ايتۋىنشا, انىقتالعان زاڭ بۇزۋشىلىقتاردىڭ نەگىزىندە ورىندالۋى مىندەتتى 674 نۇسقاما بەرىلىپ, ەڭبەك زاڭناماسىنىڭ بۇزىلۋى بويىنشا 19 717 610 تەڭگە كولەمىندە ايىپپۇل سالىنعان. وتكەن جىلدىڭ قورىتىندىسى بويىنشا وبلىستا شەتەل جۇمىس كۇشىن تارتۋعا رۇقساتى بار 76 مەكەمە تىركەلگەن. بۇل مەكەمەلەردە 27 مىڭنان استام قازاقستان رەسپۋبليكاسىنىڭ ازاماتتارى جانە 3087 شەتەل مامانى جۇمىس ىستەۋدە. سونداي-اق, بىلتىر باسقارما 2500-گە جۋىق ازاماتتىڭ ارىز-شاعىمدارى مەن مەكەمەلەردىڭ حاتتارىن قاراپ, ولار بويىنشا زاڭ اياسىندا شارالار اتقارعان.
عالىمجان ەلشىباي,
«ەگەمەن قازاقستان»
وڭتۇستىك قازاقستان وبلىسى