جاسىل داراق – ەلدىڭ, جەردىڭ كوركى, جان سارايىڭدى اشاتىن جۇپار اۋا, ەكولوگيالىق قاۋىپسىزدىك. الايدا, سول اعاشتاردى تىككەن ادامداردىڭ كەمەلىنە جەتكەندە كوكتەي سولدىراتىن جاعدايى كەزدەسىپ جاتادى. شىمكەنت – تەمىرلان تاس جولىنىڭ ەكى جاعىنا ەگىلگەن اعاشتار قۇس بازارىنا اينالىپ, اجەپتەۋىر بوي ءتۇزەپ قالىپ ەدى. ءاسىرەسە, كۇز ايلارىندا الۋان تۇسكە ءبولەنىپ, ەرتەگى الەمىنە كىرگىزىپ جىبەرگەندەي اسەرگە ءبولەيتىن, كوڭىلىڭدى حوش قىلار ەدى.
سول قىرىق شاقىرىمعا دەيىن سوزىلىپ جاتقان داراقتار بۇگىندە جوق. “باتىس ەۋروپا – باتىس قىتاي” حالىقارالىق اۆتوماگيسترالى سول تاس جول ءۇستىنە ءتۇستى دە, الىپ بۋلدوزەرلەر تامىرى تەرەڭگە كەتكەن اعاشتاردى قيراتتى دا تاستادى. حالىقارالىق جول كەرەك. سۇلۋ قىزداي تارالعان الۋان ءتۇرلى اعاشتار دا كەرەك ەدى. ءىشىڭ ۋداي اشيدى.
وبلىس اكىمدىگى وسى ولقىلىقتاردىڭ ورنىن تولتىرىپ جاتىر.
قابىلدانعان “جاسىل ايماق” باعدارلاماسىنا سايكەس قالا, اۋداندارداعى ەلدى مەكەندەردى كوگالداندىرۋدا 2011 جىلدىڭ كوكتەم ايلارىندا 4304 گا جەرگە 1821 ءتۇپ اعاش كوشەتتەرى وتىرعىزىلدى.
اعىمداعى جىلدىڭ كۇز ايلارىندا 4154 گا جەر كولەمىنە 1855 ءتۇپ اعاش كوشەتتەرى ەگىلەتىن بولادى.
كۇزگى ءىس-شارادا قالا, اۋداندار بويىنشا ارىستا – 436,9 گا, ءبايدىبەكتە – 469,1 گا, قازىعۇرتتا – 460,4 گا, كەنتاۋدا – 216 گا, ورداباسىدا – 214,3 گا, وتىراردا – 56 گا, سايرامدا – 556 گا, سارىاعاشتا – 390 گا, سوزاقتا – 200 گا, تولەبيدە – 82 گا, تۇلكىباستا – 214 گا, تۇركىستاندا – 353,3 گا, شاردارادا – 151,2 گا, شىمكەنتتە 355 گەكتار جەردە كوگالداندىرۋ جۇمىستارى جۇرگىزىلەدى. ونىڭ ىشىندە, اۋدان, قالالارداعى كوگالداندىرۋ ءىس-شاراسىندا ءبىلىم, سپورت, دەنساۋلىق ساقتاۋ ءجانە مادەنيەت سالالارىنداعى مەكەمەلەر, ەلدى مەكەن كوشەلەرى, ەلدى مەكەندەردى قوساتىن جولدار مەن وزەن-كولدەردىڭ بويلارىندا اعاش ەگۋ جۇمىستارى جالعاسا بەرەدى.
سونىمەن قاتار, كوكتەم ايلارىندا ەگىلىپ, شىلدە, تامىز ايلارىندا قۋراعان كوشەتتەردىڭ ورنىن تولىقتىرۋ, ەگۋ جۇمىستارى قوسا جۇرگىزىلەدى.
وسىنداي يگى جۇمىستاردان جەكەمەنشىك مەكەمەلەردە شەت قالىپ جاتقان جوق. سارىاعاشتاعى “التىناي” ءساناتوريىنىڭ اتقارۋشى ديرەكتورى اسىلحان ويساەۆ ەمدەۋ ورنىنا كەلەتىن تاس جول بويىنا 200 ءتۇپ قىرىم ۇيەڭكىسىن ەككەندىكتەرىن حابارلادى.
– قازاقستاننىڭ تورقالى تويىنا ءار ازامات وزىندىك ۇلەسىن قوسۋ كەرەك دەيدى, – اسەكەڭ. – ەرتەدە ءبىر اقىلمان: “ماعان مەملەكەت نە بەرەدى دەپ ەمەس, مەن مەملەكەتكە نە بەرەمىن دەپ ويلانۋى كەرەك”, دەپتى. ەلباسىمىز قازاقستان الەمدەگى ۇزدىك مەملەكەتتەردىڭ ءبىرى بولۋ ءۇشىن جيىرما جىلدىڭ ەنشىسىنە سىيمايتىنداي جۇمىستاردىڭ جۇزەگە اسۋىنا ىقپال ەتتى. جەكە مەكەمەلەردىڭ كولەڭكەدە قالىپ كەتپەۋىن ءوتىندى. ءبىز جاقىن ارادا تاعى دا 800 كوشەت وتىرعىزباقپىز. مىڭ ءتۇپ اعاشتىڭ تامىر بايلانۋىن قىزمەتكەرلەرىمىز جاۋاپكەرشىلىكتەرىنە الىپ وتىر.
ءبىر ساۋىقتىرۋ ورتالىعى وسىنشا كوشەت وتىرعىزدى.
ەگەر ءاربىر مەكەمە قولىنا كوشەت ۇستاپ, كۇرەك السا شە...
شىمكەنتتىڭ ءتۇبىرى جاسىل قالا. تەرىس قاداعان كوشەت تامىر الىپ كەتەدى. وبلىس اكىمدىگى قالانى بويلاي “جاسىل بەلدەۋ” جاساۋعا شىنداپ نيەتتەندى. ەرتەگىدەي يران باعى سياقتى...
باقتيار تايجان,
وڭتۇستىك قازاقستان وبلىسى.