پارلامەنت سەناتىنىڭ دەپۋتاتتارى ماناپ كوبەنوۆ پەن نۇرجان نۇرسيپاتوۆ جۇمىس بابىنداعى ساپارمەن پاۆلودار وبلىسىندا بولدى, دەپ حابارلايدى سەناتتىڭ ءباسپاسوز قىزمەتى.
سەناتورلارعا اقسۋ فەرروسپلاۆ زاۋىتىندا مەتاللۋرگتەر جۇمىسىنىڭ ناتيجەلەرى كورسەتىلدى. «قازحروم» ترانسۇلتتىق كومپانياسى» اق فيليالى بولىپ تابىلاتىن كاسىپورىن فەرروسپلاۆ ءوندىرىسى بويىنشا دۇنيەجۇزىندە العاشقى ورىنعا يە بولىپ وتىر. زاۋىتتا 28 ەلەكتر پەشىمەن جابدىقتالعان 4 بالقىتۋ تسەحى, شيحتا دايىنداۋ تسەحى مەن كومەكشى بولىمشەلەر بار. اقسۋدا جىل سايىن 1,2 ميلليون توننا فەرروسپلاۆ وندىرىلەدى.
دەپۋتاتتار ەۆگەنەۆ اۋىلدىق وكرۋگىندە وتكەن جىلى پايدالانۋعا بەرىلگەن بىرقاتار الەۋمەتتىك نىسانداردا بولدى. سەناتورلار سۋمەن جابدىقتاۋ جەلىسىمەن تانىسىپ, قۇرىلىسىنا 160 ميلليون تەڭگە جۇمسالعان دەنە شىنىقتىرۋ-ساۋىقتىرۋ كەشەنىن ارالادى. ساپار بارىسىندا «اقسۋ جىلىجاي كەشەنىندە» بولعان كەزدە م. كوبەنوۆ پەن ن. نۇرسيپاتوۆ ەكولوگيالىق تازا كوكونىس ونىمدەرىن ءوسىرۋ ماسەلەلەرىنە نازار اۋداردى.
اقسۋ مەن ەۆگەنەۆ اۋىلىندا بولعان ساپاردى قورىتىندىلاي كەلىپ, سەناتورلار ايماقتىڭ الەۋمەتتىك دامۋىنداعى تابىستار مەن اۋىل شارۋاشىلىعى سالاسىن كوتەرۋدەگى جەرگىلىكتى كاسىپكەرلەر مەن شارۋا قوجالىقتارىنىڭ زور ۇلەستەرىن اتاپ ءوتتى. دەپۋتاتتار جۇزدەسۋ بارىسىندا وتاندىق ءونىم وندىرۋشىلەردى قولداۋعا قاتىستى ايتىلعان ۇسىنىستار زاڭ شىعارۋ جۇمىستارى بارىسىندا ەسكەرىلەتىنىن ايتتى.