«جانۋبي قوزوعيستون» وبلىستىق قوعامدىق-ساياسي گازەتىنىڭ ۇجىمى ەلباسىمىزدىڭ حالىققا جولداۋلارىن وزبەك تىلىنە اۋدارىپ, كىتاپ ەتىپ شىعاردى.
شىمكەنت قالاسىنداعى «وتىرار» عىلىمي-امبەباپ كىتاپحاناسىندا قوس كىتاپتىڭ تۇساۋكەسەرى ءوتتى. اتاپ ايتقاندا, «ەلباسى جولداۋلارى وركەندەۋ كەپىلى. ەلبوشي ماكتۋبلاري – تاراققيەت كافولاتي» كىتابى جانە «تۇركىستان – تۇركى الەمىنىڭ مادەني استاناسى» اتتى فوتوالبومى.
وزبەك تىلىندە جارىق كورگەن «ەلباسى جولداۋلارى – وركەندەۋ كەپىلى. ەلبوشي ماكتۋبلاري – تاراققيەت كافولاتي» كىتابىندا 20 جىل ىشىندەگى 21 جولداۋ جانە «بولاشاققا باعدار: رۋحاني جاڭعىرۋ», «100 ناقتى قادام» ۇلت جوسپارى سىندى تاريحي قۇجاتتار توپتاستىرىلعان. جيناق ەل تاۋەلسىزدىگىنىڭ 26 جىلدىعى مەن «قازاقستان-2030» ستراتەگيالىق باعدارلاماسىنىڭ جاريالانعانىنا 20 جىل تولۋىنا وراي 1000 دانامەن جارىققا شىقتى.
«تۇركىستان – تۇركى الەمىنىڭ مادەني استاناسى» فوتوالبومىندا تۇركىتىلدەس ەلدەردىڭ رۋحاني-مادەني استاناسى تۇركىستان قالاسى بولىپ جاريالانۋىنا وراي وتكەن ءىس-شارالار تولىق قامتىلعان. حالىقارالىق باسقوسۋلار مەن بايقاۋلار, جالپى اتاۋلى جىلدىڭ ءوتۋ بارىسى جايلى مالىمەتتەر مەن فوتوسۋرەتتەر جيناقتالىپ, تارالىمى 500 دانامەن شىعىپ وتىر.
– وتانىمىزدىڭ دامۋ تاريحى ەلباسى نۇرسۇلتان نازارباەۆ اتىمەن تىعىز بايلانىستى, – دەيدى گازەتتىڭ باس ديرەكتورى الىشەر ساتىبالديەۆ. – قازاقستان رەسپۋبليكاسىنىڭ اتا زاڭىندا كەلتىرىلگەن قۇزىرەتتىلىكتەر اياسىندا دايىندالعان وسىناۋ قۇجاتتار مەملەكەتىمىزدىڭ دامۋىندا ۇلكەن ءارى ماڭىزدى ماعىناعا يە بولدى. وبلىس اكىمى جانسەيىت تۇيمەباەۆتىڭ ۇسىنىسىمەن باستاۋ العان كىتاپتا رەداكتسيانىڭ جيىرما جىلدىق ەڭبەگى كورسەتىلىپ, پايدالانۋعا ىڭعايلى جيناق دايىندالدى.
ەلىمىزدە وزبەك تىلىندە جاريالاناتىن مەملەكەتتىك گازەت «جانۋبي قوزوعيستون» رەداكتسياسى مەملەكەت ساياساتىن ناسيحاتتاۋمەن قاتار, وزبەك ادەبي مۇراسىن جيناقتاۋعا ىقپال ەتىپ كەلەدى. رەداكتسيا تاراپىنان وسىعان دەيىن «يستيقلول يوعدۋسي», «ەل جۇرەگىندە», «تўيونا», «يرموقلار تۋتاشگاندا», «قانات-قاقتى» سياقتى قوعامدىق-ساياسي, مادەني-اعارتۋشىلىق جانە ادەبي كىتاپتار باسىپ شىعارعان.
باقتيار تايجان, «ەگەمەن قازاقستان»
وڭتۇستىك قازاقستان وبلىسى