جول ءجۇرۋ ەرەجەسىن بۇزىپ, كامەراعا ءتۇسىپ قالعان اۆتوكولىك يەلەرى ءبىر اپتا ىشىندە ايىپپۇل تولەيتىن بولسا 50% جەڭىلدىك قاراستىرىلعان, دەپ حابارلايدى kolesa.kz.
28 جەلتوقسان كۇنى ەلباسى نۇرسۇلتان نزارباەۆ «قر اكىمشىلىك قۇقىق بۇزۋشىلىق تۋرالى كودەكسىنە وزگەرىستەر ەنگىزۋ تۋرالى» زاڭعا قول قويدى. قازىرگى زاڭناماعا سايكەس قازاقستاندا اۆتوماتتى جۇيەدە تىركەلگەن جول ءجۇرۋ ەرەجەسىن بۇزۋ جايتتارى بويىنشا قازاقستاندىقتارعا 50 پايىز جەڭىلدىك قاراستىرىلعان.
سونىمەن بىرگە ەرەجەنى بۇزۋ فيكساتسياسى بويىنشا 1 جىل جانە 25 تاۋلىك وتكەن بولسا ءارى ءىس سوت ورىنداۋ جازاسىنا وتپەگەن جاعدايدا ەسكى ايىپپۇل كۇشىن جويۋى مۇمكىن.
890-باپتىڭ تاقىرىبى مەن ءبىرىنشى بولىگى «اكىمشىلىك قۇقىق بۇزۋشىلىق تۋرالى ءىس بويىنشا قاۋلىنى, ايىپپۇل تولەۋ قاجەتتىگى تۋرالى نۇسقامانى ورىنداۋدىڭ ەسكىرۋى 1. ەگەر اكىمشىلىك قۇقىق بۇزۋشىلىق تۋرالى ءىس بويىنشا قاۋلى, ايىپپۇل تولەۋ قاجەتتىگى تۋرالى نۇسقاما – زاڭدى كۇشىنە ەنگەن كۇنىنەن باستاپ ءبىر جىل ىشىندە, ال سالىق سالۋ جانە قازاقستان رەسپۋبليكاسىنىڭ مونوپولياعا قارسى زاڭناماسى سالاسىنداعى قۇقىق بۇزۋشىلىقتار ءۇشىن زاڭدى كۇشىنە ەنگەن كۇنىنەن باستاپ بەس جىل ىشىندە ورىندالماسا, ول ورىندالۋعا جاتپايدى», دەگەن رەداكتسيادا جازىلعان.
جوحار وتەبەكوۆ ەسىمدى زاڭگەردىڭ سوزىنشە, مەرزىمى وتكەن ايىپپۇلداردى الىپ تاستاۋ ءۇشىن كولىك جۇرگىزۋشىلەرى ايماقتىق ءىىد قىزمەتىنە ارنايى ءوتىنىش جازۋى ءتيىس. ءوتىنىش ۇلگىسىن مىنا تۇستان كوشىرىپ الۋعا بولادى.