شىعىسقازاقستاندىق شاڭعىشى شۆەيتساريانىڭ لەنتسەرحايد قالاسىندا وتكەن «تۋر دە سكي» كەزەڭىندە ەرلەر اراسىندا 15 شاقىرىمدى كلاسسيكالىق ادىسپەن جۇگىرۋدە جۇلدەگەرلەر قاتارىنان كورىندى.
اتالمىش سايىستا وبلىستىق دەنە شىنىقتىرۋ جانە سپورت باسقارماسىنىڭ «شقو قىسقى سپورت تۇرلەرى بويىنشا جوعارى سپورت شەبەرلىگى مەكتەبى» كمم سپورتشىسى الەكسەي پولتورانين جوعارى ناتيجە كورسەتتى. 15 شاقىرىم قاشىقتىقتى 35.30.01 ۋاقىتپەن باعىندىرعان شاڭعىشى «تۋر دە سكي» كەزەڭىنىڭ كۇمىس مەدالىن جەڭىپ الدى.
جارىس جولىنا ۇزىن سانى 75 شاڭعىشى شىقتى. جۇلدە ءۇشىن تالاستا شىعىسقازاقستاندىققا تاجىريبەلى شۆەيتساريالىق, نورۆەگيالىق سپورتشىلار قارسىلىق تانىتتى. ناتيجەسىندە نەبارى 0.6 سەكۋند باسىمدىقپەن, ياعني 35.29.5 ۋاقىتپەن شۆەيتساريالىق داريو كولونيا جەڭىمپاز اتاندى. ال نورۆەگيالىق مارتين سۋندبيۋ ۇزدىك ۇشتىكتى تۇيىندەدى.
ايتا كەتۋ كەرەك, الەكسەي پولتورانين بۇعان دەيىن يتاليانىڭ توبلاح قالاسىندا وتكەن الەم كۋبوگى كەزەڭىندە وسى قاشىقتىقتا قولا مەدال ەنشىلەگەن بولاتىن.
ازامات قاسىم,
«ەگەمەن قازاقستان»
شىعىس قازاقستان وبلىسى