ەكى-ءۇش كۇننەن بەرى شىعىستا اۋا-رايى كۇرت قۇبىلىپ, كۇن جىلىنىپ, جاڭبىر جاۋىپ, قاتتى داۋىل سوعىپ, وڭىردەگى جۇرتتى ابىگەرگە سالىپ تۇر.
بۇگىن كوكتايعاق پەن قاتتى داۋىلعا بايلانىستى وسكەمەندەگى مەكتەپتەردىڭ 1-9, سەمەيدەگى مەكتەپتەردىڭ 1-4 سىنىپ وقۋشىلارىنا ساباق توقتاتىلدى.
ايماقتاعى اۋا-رايىنىڭ قولايسىزدىعىنان كولىكتەردىڭ جولدان شىعىپ كەتۋ فاكتىلەرى دە تىركەلۋدە. ماسەلەن, كەشە ريددەرگە باعىت العان جولاۋشىلار اۆتوبۋسى بىسترۋحا اۋىلىنىڭ ماڭىندا جولدان شىعىپ كەتىپ, اۋدارىلعان. وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى اۆتوبۋستا 13 جولاۋشىنىڭ بولعانىن, 7 ادام زارداپ شەگىپ, ونىڭ التاۋى گلۋبوكوە اۋدانىنداعى اۋرۋحاناعا, اۆتوبۋس جۇرگىزۋشىسى «مەديتسينالىق اپاتتار ورتالىعى» دارىگەرلەرىنىڭ كومەگىمەن وسكەمەندەگى №1 قالالىق اۋرۋحاناعا جەتكىزىلگەنىن حابارلادى.
سەمەيدە قاتتى جەل كەسىرىنەن قۇلاعان اعاش ءبىر جەڭىل اۆتوكولىكتى باسىپ قالعان. قالالىق توتەنشە جاعداي باسقارماسىنىڭ ماماندارى كولىكتە ادام بولماعانىن, ەشكىمنىڭ زارداپ شەكپەگەنىن مالىمدەدى.
ازامات قاسىم,
«ەگەمەن قازاقستان»
شىعىس قازاقستان وبلىسى