جاڭا جىل قارساڭىندا قىزىلوردا قالاسىندا 230 وتباسى سىرداريا وزەنىنىڭ جاعالاۋى ماڭىندا ورنالاسقان دەمەسىنوۆ كوشەسىندەگى جاڭا تۇرعىن اۋدانىندا باسپانا الدى.
قىزىلوردا وبلىسىنىڭ اكىمى قىرىمبەك كوشەرباەۆ پاتەر يەلەرىن كەلە جاتقان جاڭا 2018 جىل مەن قونىس تويلارىمەن قۇتتىقتادى.
«الاشتىڭ اناسى - سىر ءوڭىرى قارقىندى قۇرىلىس الاڭىنا اينالدى. بيىلدىڭ وزىندە 61 كوپقاباتتى تۇرعىن ءۇي قۇرىلىسى جۇرگىزىلۋدە. ونىڭ ىشىندە جەكە ينۆەستورلاردىڭ ءوز قارجىسى ەسەبىنەن 957 پاتەرلىك 24 كوپقاباتتى تۇرعىن ءۇي, مەملەكەتتىك باعدارلامالار ارقىلى 2 مىڭ 14 پاتەرلى 37 كوپقاباتتى تۇرعىن ءۇي سالىنۋدا. بۇگىنگە دەيىن سونىڭ ىشىنەن 34 كوپقاباتتى تۇرعىن ءۇي پايدالانۋعا بەرىلدى, ال ەندى تاعى دا 230 وتباسى جايلى دا, جارىق باسپانالى بولدى. جاڭا قونىستارىڭىز قۇتتى بولسىن! شاڭىراقتارىڭىز شاتتىققا تولىپ, بالانىڭ كۇمىس كۇلكىسىنە بولەنسىن», - دەدى ايماق باسشىسى.
سونداي-اق, بۇگىن 3 بولمەلى پاتەردىڭ كىلتىن العان جەكە كاسىپكەر, 3 بالانىڭ اكەسى رۋسلان ارىستانبەكوۆ جاڭا ءۇي تۇرعىندارىنىڭ اتىنان العىسىن ءبىلدىردى. «بۇگىن بارلىعىمىزدىڭ ارمانىمىز ورىندالدى دەپ ويلايمىن. ايماق باسشىلىعىنا زور العىسىمدى بىلدىرەمىن. وسى ۇيلەردى سالعان قۇرىلىسشىلارعا دا كوپ راحمەت», - دەدى ول.
ەستەرىڭىزگە سالا كەتەيىك, دەمەسىنوۆ كوشەسىنەن قۇنى 2 ملرد. 637 ملن. تەڭگەنى قۇرايتىن, جالپى اۋدانى 15,6 مىڭ شارشى مەتر بولاتىن 230 پاتەرلىك 4 كوپقاباتتى تۇرعىن ءۇي «سامۇرىق-قازىنا» جىلجىمايتىن م ۇلىك قورى» اكتسيونەرلىك قوعامى ارقىلى سالىندى. قۇرىلىستىڭ باس مەردىگەرى - «باق-بەرەكە-2030» جشس.