«نۇرلى جول» مەملەكەتتىك باعدارلاماسى اياسىندا مىڭداعان شاقىرىم اۆتوجولدار كۇردەلى جوندەۋدەن ءوتىپ, كولىك قاتىناسى ارتقان. ينفراقۇرىلىم جاقسارىپ, تاسىمال كۇشەيگەن. بۇل تۋرالى كەشە ۇكىمەت ۇيىندە وتكەن ءباسپاسوز ءماسليحاتىندا ايتىلدى.
بريفينگكە ينۆەستيتسيالار جانە دامۋ مينيسترلىگىنىڭ كولىك كوميتەتى مەن اۆتوموبيل جولدارى كوميتەتىنىڭ باسشىلارى قاتىسىپ, «نۇرلى جول» باعدارلاماسىن ىسكە اسىرۋدىڭ ناتيجەلەرىن باياندادى. اۆتوموبيل جولدارى كوميتەتىنىڭ توراعاسى مەرەكە پىشەمباەۆتىڭ ايتۋىنشا, نۇرلى جول» باعدارلاماسى اياسىندا 2015-2016 جىلدار ارالىعىندا I جانە II تەحنيكالىق ساناتتارعا اۋىستىرۋ ارقىلى 1,3 مىڭ شاقىرىم اۆتوجول قالپىنا كەلتىرىلگەن.
«باتىس ەۋروپا–باتىس قىتاي ترانزيتتىك دالىزىندە, استانا–تەمىرتاۋ, الماتى–قاپشاعاي, قاپشاعاي–بالپىق بي, بەينەۋ–شەتپە جانە كوكشەتاۋ–پەتروپاۆل باعىتتارىنداعى قوزعالىس تولىعىمەن اشىلدى. سونداي-اق پاۆلودارداعى ەرتىس وزەنى ارقىلى وتەتىن ۇزىندىعى 12 شاقىرىمدىق ءىرى كوپىر وتكەلىنىڭ قۇرىلىسى اياقتالدى», دەدى كوميتەت توراعاسى.
بيىل تەمىرتاۋ – قاراعاندى ۋچاسكەسىندە, ورتالىق–وڭتۇستىك جوبالارىندا, جالپى ۇزىندىعى 1,2 مىڭ شاقىرىم بولاتىن استانا – پاۆلودار – سەمەي – قالباتاۋ, بەينەۋ – اقتاۋ, اقتوبە – اتىراۋ, قاپشاعاي – تالدىقورعان, استانا – پەتروپاۆل جانە ورال – كامەنكا ۋچاسكەسىندە ورتالىق – شىعىس جوبالارى اياسىندا قۇرىلىس جۇمىستارى جالعاستىرىلدى. سونىمەن قاتار ۇزىندىعى 511 شاقىرىم بولاتىن بەينەۋ – اقجىگىت, ششۋچە – زەرەندى, تاسكەسكەن – باحتى, ءۇشارال – دوستىق, وسينوۆ تاس جولى, قوستاناي – دەنيسوۆ سەكىلدى التى جوبا بيۋدجەتتىك قاراجات ەسەبىنەن ىسكە اسىرىلۋدا.
سونداي-اق ەلىمىزدىڭ كولىكتىك الەۋەتىن دامىتۋ ماقساتىندا جەتەكشى حالىقارالىق قارجى ينستيتۋتتارىمەن بىرلەسە وتىرىپ, ۇزىندىعى 3 مىڭ شاقىرىمنان اساتىن 12 جوبانى جۇزەگە اسىرۋ جوسپارلانىپ وتىر. بۇل وڭىرلەردەگى ەكونوميكالىق بەلسەندىلىكتىڭ ءوسۋىن قامتاماسىز ەتپەك.
باعدارلاما اياسىندا 2020 جىلعا قاراي جوندەۋ جۇمىستارى جوسپارلانعان, ونىڭ جىل سايىنعى قامتۋى – 1,5 مىڭ شاقىرىمعا جۋىق.
«نۇرلى جول» باعدارلاماسىن ىسكە اسىرۋدىڭ الەۋمەتتىك ماڭىزى دا وراسان. بۇل رەتتە كوميتەت توراعاسى 2015 جىلدان باستاپ 70 مىڭنان استام جۇمىس ورنى اشىلعانىن, 2018 جىلى تاعى 25 مىڭىن اشۋ جوسپاردا بار ەكەنىن ايتتى. سونىمەن قاتار قازاقستاندىق قامتۋ ۇلەسى 90 پايىزعا تەڭ.
ال كولىك كوميتەتى توراعاسىنىڭ ورىنباسارى دميتري پوتلوۆتىڭ مالىمدەۋىنشە, الماتى – شۋ ۋچاسكەسىندە جالپى ۇزىندىعى 112,37 شاقىرىم ەكىنشى جولدى سالۋ جوباسىن جۇزەگە اسىرۋ بويىنشا جۇمىستار بيىلعى جىلدىڭ قاراشاسىندا اياقتالعان. جوبانى جۇزەگە اسىرۋ ۋچاسكەنىڭ وتكىزۋ قۋاتىن كۇنىنە 17-دەن 68 جۇپ پويىزعا دەيىن ارتتىردى جانە پويىزدىڭ جول ءجۇرۋ ۋاقىتىن 1,5 ەسەگە قىسقارتۋعا مۇمكىندىك بەردى. ونىڭ ايتۋىنشا, 2016 جىلعى جەلتوقساندا قۇرىق پورتىندا جىلىنا 4 ملن توننا جۇك تاسىمالدايتىن تەمىر جول پاروم تەرمينالى ىسكە قوسىلدى. وندا وپەراتسيالار باستالعان كەزدەن بەرى شامامەن 1,3 ميلليون توننا جۇك وڭدەلگەن. قازىرگى ۋاقىتتا جىلىنا 2 ملن توننا جۇكتى وڭدەيتىن جوبانىڭ ەكىنشى كەزەڭىن ىسكە اسىرۋ جالعاسۋدا. بيىل 6 جەلتوقساندا وتكەن يندۋستريالاندىرۋ كۇنى اياسىندا قۇرىق پورتىنداعى اۆتوكولىك پاروم تەرمينالى سىناقتان وتكىزىلدى. 2018 جىلى 2 كەزەڭ نىساندارىنىڭ قۇرىلىسىن اياقتاۋ جوسپارلانۋدا. جالپى العاندا, جوبانى اياقتاعاننان كەيىن كاسپي تەڭىزىندەگى تەڭىز پورتتارىنىڭ وتكىزۋ مۇمكىندىكتەرى جىلىنا 26 ملن تونناعا دەيىن جەتكىزىلمەك.
2017 جىلدىڭ 30 مامىرىندا استانادا جاڭا «نۇرلى جول» ۆوكزال كەشەنى ىسكە قوسىلدى. جاڭا ۆوكزال كەشەنى 52 پويىزعا قىزمەت كورسەتەدى. ولاردىڭ ىشىندە 16 جوعارى جىلدامدىقتى «تۇلپار-تالگو», 22 جانە 14 قالا ماڭىنداعى ەلەكترلى پويىزدار بار.
دينارا بىتىك, «ەگەمەن قازاقستان»