مەملەكەت باسشىسى جاسىل ەكونوميكا تۋرالى وي ءبولىستى.
پرەزيدەنت الەمدە كومىرتەگى, لاستانۋ ماسەلەسى تالقىلانىپ جاتقانىن ايتا كەلىپ, قازاقستان ەكونوميكاسى ۇلكەن بولماعاندىقتان ەكولوگياسى ناشار ەلدەردىڭ كوشىندە ەمەس ەكەنىن جەتكىزدى. سونداي-اق, ەكونوميكاسى ۇلكەن بولعاندىقتان اقش بۇل تىزىمدە ءبىرىنشى ورىندا ەكەنىن ايتتى.
«ەكسپو بارىسىندا 190 جاڭا عىلىمي باستاما كوتەرىلدى. ءبارىن قولدانىسقا ەنگىزۋگە بولادى. مەن ولاردى وزىمىزگە جازىپ الىپ, ساقتاۋىمىز كەرەكتىگىن ايتىپ كەلەمىن. قازىر ەلىمىزدىڭ ۋنيۆەرسيتەتتەرى وسى جاسىل ەكونوميكانى ويلاپ شىعارعاندارمەن بىرگە مەموراندۋمعا قول قويدى. ولار قازىر بىرگە جۇمىس ىستەپ ءجۇر. سونداي-اق, قازاقستاننىڭ ۇلتتىق كومپانيالارى دا وسىنداي جوبالاردى جۇزەگە اسىرۋ ءۇشىن باس-اياعى 45 مەموراندۋمعا قول قويدى. ەكسپو اياقتالعانمەن, مۇندا جاسىل ەكونوميكا ورتالىعى قۇرىلادى», دەدى ەلباسى.
مەملەكەت باسشىسى جاھاندىق كورمە بارىسىندا ۇسىنىلعان باستامالاردى الداعى ۋاقىتتا قولدانىسقا ەنگىزۋ جايى قارالاتىنىن جەتكىزدى. سونداي-اق, ەكسپو-نى وتكىزۋ ءۇشىن 160 مەملەكەتپەن تالاسقا تۇسكەنىن ەسكە سالىپ ءوتتى.
بۇدان بولەك, ەلىمىزدەگى كۇن, جەل ستانسالارى تۋرالى دا ايتىپ ءوتتى.
«بىزدە وتە ماڭىزدى كۇن ستانسالارى بار. جامبىل وبلىسىندا, استانا ماڭىندا, قاراعاندىدا بولماعان, قازىر پايدا بولدى. ەكىنشىدەن, جەل ستانسالارى دا ەلىمىزدە اشىلدى. ونى ەرەيمەنتاۋعا بارىپ كورۋگە بولادى», دەدى نۇرسۇلتان نازارباەۆ.
ەلباسى سونداي-اق, 2025 جىلعا قاراي ەنەرگيانىڭ 3%-ى بالامالى كوزدەردەن بولۋى كەرەكتىگىن, سونداي-اق, ەنەرگيانىڭ 15%-ىن ءوندىرۋىمىز قاجەت ەكەنىن ايتتى.
«قازاقستان كومىرگە باي مەملەكەت. ەنەرگيامىزدىڭ 66%-ى كومىردىڭ ەسەبىنەن وندىرىلەدى. قازىر اتموسفەراعا قالدىق زاتتاردى شىعارمايتىنداي بلوكتار قويىلىپ جاتىر. ال الماتى قالاسى نەمەسە وزگە دە ورىندار اۆتوموبيلدەردىڭ ەسەبىنەن لاستانىپ وتىر», دەدى ەلباسى.
ول سونداي-اق, 3040 قوعامدىق كولىك قۇراستىرىلعانىن, ونىڭ جارتىسى گازبەن جۇرەتىنىن ايتىپ ءوتتى. بۇدان وزگە قوستانايدا ەلەكتروموبيلدەر قۇراستىرىلىپ جاتقانىن, ولاردى الدىمەن ەلىمىزدىڭ ەكولوگياسى اقساپ تۇرعان وڭىرلەرگە جىبەرۋ كەرەكتىگىن ايتتى. سونىمەن قاتار, 1998 جىلعا تامان قازاقستاندا 700 مىڭ اۆتوكولىك بولسا, قازىر 5 ميلليونعا جەتكەنىن ايتىپ ءوتتى.
«مويىنداۋ كەرەك, بالامالى ەنەرگيا كوزدەرى, ياعني كۇن, جەل كوپتەگەن ماسەلەلەردى شەشەدى. قازىر ەكولوگيالىق قيىندىققا تاپ بولعان بىرنەشە مەملەكەت وسى ءىستى قولعا الىپ, كوپ قارجىسىن ءبولىپ وتىر», دەدى نۇرسۇلتان نازارباەۆ.