قازاقستان پرەزيدەنتى قىرعىز رەسپۋبليكاسىنىڭ پرەزيدەنتى سوورونباي جەەنبەكوۆپەن كەزدەستى, دەپ حابارلايدى اقوردانىڭ ءباسپاسوز قىزمەتى.
مەملەكەتتەر باسشىلارىنىڭ رەسمي كەزدەسۋ راسىمىنەن سوڭ شاعىن قۇرامداعى كەلىسسوزدەر جۇرگىزىلدى.
نۇرسۇلتان نازارباەۆ قازاقستانعا رەسمي ساپارمەن كەلۋگە شاقىرۋىن قابىل العانى ءۇشىن سوورونباي جەەنبەكوۆكە ريزاشىلىق ءبىلدىرىپ, قىرعىز رەسپۋبليكاسى پرەزيدەنتىنىڭ العاشقى ساپارى ەكى ەل اراسىندا ورنىققان ديپلوماتيالىق قارىم-قاتىناستىڭ 25 جىلدىعىمەن تۇسپا-تۇس كەلىپ وتىرعانىن اتاپ ءوتتى.
مەملەكەت باسشىسى قازاقستان مەن قىرعىزستان قارىم-قاتىناستارىنىڭ تاريحي تۇرعىدان دوستىق سيپاتى بار ەكەنىن ايتتى.
– قازاقستان مەن قىرعىزستان – باۋىرلاس ءارى وداقتاس مەملەكەتتەر. ءبىزدىڭ ارامىزداعى بارلىق سالادا سىندارلى جانە سەنىمدى ديالوگ ورناعان, – دەدى قازاقستان پرەزيدەنتى.
سوورونباي جەەنبەكوۆ نۇرسۇلتان نازارباەۆقا قازاقستانعا رەسمي ساپارمەن كەلۋگە مۇمكىندىك تۋعىزعانى ءۇشىن جانە وتكەن سايلاۋداعى جەڭىسىمەن قۇتتىقتاعانى ءۇشىن العىس ايتتى.
– مەنىڭ قازاقستانعا ءبىرىنشى ساپارىم قوس مەرەيتوي – ەلدەرىمىز اراسىنداعى ديپلوماتيالىق قارىم-قاتىناستاردىڭ 25 جىلدىعى مەن ماڭگىلىك دوستىق تۋرالى شارتقا قول قويىلۋىنىڭ 20 جىلدىعى قارساڭىندا وتۋدە. ءبىزدىڭ تاريحىمىز دا, ءتىلىمىز دە, ءدىنىمىز بەن مادەنيەتىمىز دە ءبىر, – دەدى قىرعىزستان پرەزيدەنتى.
مەملەكەتتەر باسشىلارى كەزدەسۋ سوڭىندا بۇگىنگى كەلىسسوزدەر مەن ولاردىڭ قورىتىندىسى بويىنشا قول قويىلعان قۇجاتتار ەكىجاقتى قارىم-قاتىناستاردى ودان ءارى نىعايتۋعا سەپتىگىن تيگىزەتىنىنە سەنىم ءبىلدىردى.