ەلىمىز بويىنشا قولىنا قارۋ ۇستاپ, باتىسقا اتتانعان بوزداقتاردىڭ سانى 1 ميلليون 200 مىناداي بولسا, تورتتەن ءبىرى ۋكراينانى ازات ەتۋ جورىقتارىنا قاتىسقان ەكەن.
سولاردىڭ ءبىرى– سولتۇستىكقازاقستاندىق ءايىپ رامازانوۆ. ەسەپشىلىك قىزمەت اتقارىپ جۇرگەن ول تەپسە تەمىر ۇزەتىن ەكى مۇشەل شاعىندا العاش رەت نەمىس باسقىنشىلارمەن بەتپە-بەت كەزدەسەدى. تالاي قاندى شايقاستاردى باسىنان وتكەرىپ, بىرىندە قازا تابادى. كەيىن تۋعان-تۋىستارى قانشا ىزدەۋ سالسا دا, «حابار-وشارسىز كەتتى» دەگەن قىسقا عانا جاۋاپ الىپ وتىرادى. بيىل كۇزدە بەرەزان قالاسى ماڭىندا جۇرگىزىلگەن قازبا جۇمىستارى بارىسىندا ەكى جاۋىنگەردىڭ سۇيەگى تابىلادى. ۋكراينانىڭ قاۋىپسىزدىك قىزمەتى اكادەمياسىنىڭ كۋرسانتتارى ۇيىمداستىرعان ەكسپەديتسيا مەدالونداعى جازبالار ارقىلى قازاق سولداتى ءايىپ رامازانوۆ ەكەنىن انىقتايدى.
كيەۆتەگى وفيتسەرلەر ۇيىندە قىزىل اسكەر جاۋىنگەرىنىڭ مايىتى قازاقستان ەلشىلىگىنە تاپسىرىلىپ, قازاقستاننىڭ وسىنداعى توتەنشە جانە وكىلەتتى ەلشىسى سامات ورداباەۆ ءوز سوزىندە بۇل اكتسيا تاريحىمىزدى قاستەرلەۋدىڭ, وتان ءۇشىن وت كەشكەن باۋىرلارىمىزعا كورسەتىلگەن ەرەكشە قۇرمەت ەكەنىن جەتكىزدى. وسىلايشا ەكىجاقتى كەلىسىم اياسىندا اتقارىلعان شارا بارىسىندا باتىردىڭ دەنەسى تۋعان جەرىنە جەتكىزىلىپ, جەرلەندى. مارقۇمدى جەر قوينىنا تاپسىرۋ راسىمىنە اۋىلداستارى مەن تۋىستارى, ىشكى ىستەر, قورعانىس ىستەرى جونىندەگى دەپارتامەنتتەردىڭ, ۇلتتىق ۇلان پەتروپاۆل اسكەري ينستيتۋتىنىڭ وكىلدەرى جينالىپ, اۋىلدىق مەموريالعا گۇل شوقتارىن قويدى. ارۋاقتارعا تاعزىم ەتتى.
اعامنىڭ اتا-اناسى قاشان كوزدەرى جۇمىلعانشا ۇلدارىنىڭ ءتىرى ورالاتىنا سەندى, باتىس جاققا قارايلاۋمەن ءوتتى. سوعىس جىلدارى ورمان دەپ اتالعان قازىرگى لەنين ەلدى مەكەنىنەن سوعىسقا 95 ازامات اتتانىپ, 61 عانا امان-ەسەن ورالعان, دەيدى نەمەرە قارىنداسى كۇلبارشىن قامىسپاەۆا.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى